Read Samoan Old Version Bible – O LE TUSI PAIA IEREMIA, 21 Bible Online

IEREMIA, 21 - Samoan Old Version Bible – O LE TUSI PAIA bible

IEREMIA, 21

¹O le afioga a Ieova na oo ia Ieremia, ina o aauina atu ia te ia e le tupu o Setekaia o Pasura le atalii o Malekia, atoa ma Sefanaia le atalii o Maaseia le faitaulaga, ua faapea atu,

²Se‘i e fesili atu ia Ieova mo i tatou; auā o loo ua sii mai le taua ia te i tatou e Nepukanesa le tupu o Papelonia; atonu e faia e Ieova ia te i tatou e tusa ma ona vavega uma, ina ia alu ese ai o ia ia te i tatou.

³Ona fai mai ai lea o Ieremia ia te i latou, Ia faapea ona outou fai atu ia Setekaia,

⁴O loo faapea ona fetalai mai o Ieova le Atua o Isaraelu, Faauta, ou te faaliliueseina auupega o le taua o i o outou lima, ua outou tau a‘i ma le tupu o Papelonia ma tagata o Kaletaia, o e vagaia outou i tuapa, ma ou faapotopoto ia te i latou i totonu o lenei aai.

⁵O a‘u nei foi, ou te tau ma outou i le lima faaloaloa, ma le lima malosi, o le tiga foi, ma le ita, ma le ita tele.

⁶Ou te taia e o nonofo i lenei aai, o tagata atoa ma manu, e oti i latou i le faamai tele.

⁷O loo fetalai mai Ieova, E mulimuli ane ou te tuuina atu Setekaia le tupu o Iuta, ma ana auauna, ma le nuu, ma e o totoe i lenei aai i le faamai, ma le pelu, ma le oge, i le lima o Nepukanesa le tupu o Papelonia, ma lima o e ita ia te i latou, ma lima o e sailiili ia te i latou ia oti; e fasia i latou i le pelu, e le faasaoina e ia o i latou, e le faapelepele, e le alofa lava.

⁸E te fai atu foi i lenei nuu, O loo faapea ona fetalai mai o Ieova, Faauta, ou te tuuina atu i o outou luma le ala o le ola, ma le ala o le oti.

⁹O lē nofo i lenei aai e oti o ia i le pelu, ma le oge, ma le faamai; a o lē alu atu, ma vavae atu i tagata o Kaletaia o e vagaia outou, e ola o ia, e avea foi lona ola ma ana vete.

¹⁰Auā ou te faasaga atu i lenei aai ia leaga ai, a e le ina ia manuia ai, o loo fetalai mai ai Ieova; e tuuina atu ai i le lima o le tupu o Papelonia, e susunuina foi e ia i le afi.

¹¹A ia e fai atu i le aiga o le tupu o Iuta, Ina faalogologo ia outou i le afioga a Ieova;

¹²Le aiga o Tavita e, o loo faapea ona fetalai mai o Ieova, Ia faia le faamasinoga i le taeao, ma ia laveaiina le ua faoa ana mea ai le lima o le tagata saua, ina ne‘i alu atu lo‘u ita e pei o le afi, ma mu ai, a e le mafai ona tineia e se tasi, ona o le leaga o a outou amioga.

¹³Faauta, o oe lē nofo i le vanu, o le papa o i le mea laugatasi, ua ou tiga ia te oe, o loo fetalai mai ai Ieova; o e fai ane, Po o ai ea e o ifo e tau ma i tatou? po o ai foi e ulufale mai i o tatou fale?

¹⁴Ou te taui atu ia te outou e tusa ma le fua o a outou amioga, o loo fetalai mai ai Ieova; ou te faamuina foi le afi i lona vao, e faaumatia ai foi ona itu uma.