Read Samoan Old Version Bible – O LE TUSI PAIA IEREMIA, 23 Bible Online

IEREMIA, 23 - Samoan Old Version Bible – O LE TUSI PAIA bible

IEREMIA, 23

¹Oi talofa i le au leoleo mamoe o e ua fano ai ma faataapeapeina mamoe na ou fagaina! o loo fetalai mai ai Ieova.

²O le mea lea ua faapea ona fetalai mai ai o Ieova le Atua o Isaraelu i le au leoleo mamoe o e leoleo i lo‘u nuu, Ua outou faataapeapeina la‘u lafu mamoe, ma tulia i latou, ma ua le asiasi ia te i latou; faauta, ou te taui atu ia te outou ona o le leaga o a outou amioga, o loo fetalai mai ai Ieova,

³Ou te faapotopoto foi i e totoe o la‘u lafu mamoe mai nuu uma na ou tulia ai i latou, ma ou toe faafoi mai ia te i latou i o latou lotoā; latou te fanafanau ai ma uluola ai.

⁴Ou te tofia foi mo i latou o leoleo mamoe e leoleo ia te i latou; latou te le toe fefefe, latou te le matatau foi, e leai so latou e le iloa o loo fetalai mai ai Ieova.

⁵Faauta, e oo mai ona aso, o loo fetalai mai ai Ieova, ou te faatupuina ai mo Tavita le La laau amiotonu, e pule foi le Tupu, e manuia o ia, e faia foi e ia le faamasinoga ma le amiotonu i le lalolagi.

⁶O lana nofoaiga e faaolaina ai Iuta, e nofo foi Isaraelu ma le filemu; o le suafa foi lenei e ta‘ua ai o ia, O IEOVA LA TATOU AMIOTONU.

⁷O le mea lea faauta, o loo fetalai mai ai Ieova, e oo mai ona po e le toe fai ane ai tagata, O loo soifua Ieova, o le na aveina ae le fanauga a Isaraelu nai le nuu o Aikupito;

⁸a e faapea, O loo soifua Ieova, o le na aveina ae, ma le na aumaia le fanau a le aiga o Isaraelu mai le nuu i le itu i matu, ma nuu uma na a‘u tulia ai i latou; e nonofo foi i latou i lo latou laueleele.

⁹Ua momomo lo‘u loto i totonu ia te au ona o perofeta; ua gatete o‘u ivi uma; ua avea a‘u e pei o le tagata onā, e pei o le tagata ua faiaina i le uaina, ona o Ieova ma ana afioga paia.

¹⁰Auā ua tumu le nuu i e mulilulua; auā ua faanoanoa le nuu ona ua faafanoina; ua magumagu mea i le vao e tataa ai manu, auā ua leaga lo latou taufetuliga, ua le tonu foi lo latou malosi.

¹¹Auā o perofeta atoa ma faitaulaga ua faalematau i latou; ua iloa e a‘u la latou amio leaga i lo‘u lava fale, o loo fetalai mai ai Ieova.

¹²O le mea lea e avea ai lo latou ala ia te i latou e pei o mea maseesee i le pouliuli; e tulia i latou, ma latou pauu i ai; auā ou te faaooina le malaia i luga ia te i latou, o le tausaga lea e asiasia mai ai i latou, o loo fetalai mai ai Ieova.

¹³Ua ou iloa le faavalea o perofeta o Samaria; ua latou vavalo i le igoa o Paala, ma faaseseina lo‘u nuu o Isaraelu.

¹⁴Ua ou iloa foi le mea e inosia i perofeta o Ierusalema; ua latou mulilulua, ma savavali ma le pepelo; ua faamalolosia foi e i latou lima o e amio leaga, ina ia le toe foi mai se tasi ai lana amio leaga; ua avea i latou uma ia te au e pei o Sotoma, ma e o nonofo ai e pei o Komoro.

¹⁵O le mea lea ua faapea ona fetalai mai ai o Ieova o ‘au i perofeta, Faauta, ou te fafaga ia te i latou i le laena, ma faainu ia te i latou i vai oona; auā o perofeta o Ierusalema ua oo atu ai le amio faalematau i le nuu uma.

¹⁶O loo faapea ona fetalai mai o Ieova o ‘au, Aua tou te faalogologo i upu a perofeta o e vavalo ia te outou; ua latou faasese ia te outou e fai mea faatauvaa; ua latou tautala atu i le faaaliga mai o latou lava loto, a e le mai le fofoga o Ieova.

¹⁷O loo tautala atu pea i latou i e ‘ino‘ino mai ia te au, O loo fetalai mai Ieova, E manuia outou; ma ua latou faapea atu ia te i latou uma o e savavali e tusa ma le finau vale o latou loto, E le oo ia te outou se malaia.

¹⁸A o ai ea ua tu atu a o fai le pule a Ieova, ma ua iloa ma faalogologo i lana afioga? Po o ai ua uai atu ona taliga i ana afioga, ma faalogologo i ai?

¹⁹Faauta, ua alu atu le afā mai ia Ieova i le toasa, o le afā fulifaō; e pesi tetele mai i luga o ulu o e amio leaga.

²⁰E le toe liliu le toasa o Ieova, seia faia e ia, seia faataunuuina foi e ia manatu o lona finagalo; tou te matuā mafaufau i ai i aso amuli.

²¹Ua ou le aauina atu o ia perofeta, a ua latou taufetuli; ua ou le tautala atu ia te i latou, a ua latou vavalo.

²²A e afai ana latou tutu mai a o fai la‘u pule, po ua latou faailoa atu a‘u upu i lo‘u nuu, ma latou faafoi ia te i latou ai o latou ala leaga, ma le leaga o a latou amioga.

²³O a‘u ea o le Atua e latalata, a e le o le Atua e mamao? o loo fetalai mai ai Ieova.

²⁴Pe mafai ea e se tagata ona lafi i mea lilo, ou te le iloa ai o ia? o loo fetalai mai ai Ieova. E le o tutumu ea le lagi ma le lalolagi ia te au? o loo fetalai mai ai Ieova.

²⁵Ua ou faalogo i mea ua fai atu ai perofeta, o e ua vavalo ma le pepelo i lo‘u igoa, ua faapea atu, Ua fai la‘u miti, ua fai la‘u miti.

²⁶E i ai lenei mea seia afea i loto o perofeta, o e vavalo mai ma le pepelo, o perofeta lava i latou o le pepelo ua i o latou loto?

²⁷o loo manatu i latou ia faagaloina e lo‘u nuu o lo‘u igoa i a latou miti ua latou talatala atu ai o le tasi i le tasi, e pei ona faagalogalo e o latou tamā o lo‘u igoa ona o Paala.

²⁸O le perofeta ua na fai le miti, ia talatala atu lana miti; ma le ua ia te ia la‘u upu, ia talatala atu e ia la‘u upu ma le faamaoni. E tusa ea le ‘au o saito i le fua o le saito? o loo fetalai mai ai Ieova.

²⁹E le pei o le afi ea la‘u upu? o loo fetalai mai ai Ieova; e le pei o le samala foi e tu‘imomoia ai le papa?

³⁰O le mea lea faauta, e fai ai mo‘u fili o perofeta, o e o fegaoiai a‘u upu, o loo fetalai mai ai Ieova.

³¹O loo fetalai mai Ieova, Faauta, e fai mo‘u fili o perofeta, o e tautala i o latou laulaufaiva, ua faapea atu, Ua fetalai mai o ia.

³²Faauta, e fai mo‘u fili i latou o e vavalo i miti pepelo, o loo fetalai mai ai Ieova, ma latou talatala atu ai, ma faaseseina ai lo‘u nuu i a latou upu pepelo, ma lo latou mitamita vale; a o a‘u na ou le aauina atu i latou, ma a‘u lei fai atu ia te i latou; o le mea lea e le aoga ai lava i latou i lenei nuu, o loo fetalai mai ai Ieova.

³³A fesili mai foi ia te oe lenei nuu, po o le perofeta, po o le faitaulaga, e faapea mai, Se a ea le avega mai ia Ieova? Ona e tali atu ai lea ia te i latou, Se a se avega? Ou te lafoaiina outou, o loo fetalai mai ai Ieova.

³⁴A o le perofeta, po o le faitaulaga, po o le nuu, e fai mai, O le avega mai ia Ieova; ou te taui atu lava i lena tagata atoa ma lona aiga.

³⁵Ia faapea ona outou tautala atu, o le tagata i lē la te tuaoi, ma le tagata i lona uso, Se a le tali mai ia Ieova? se a foi le afioga mai ia Ieova?

³⁶Tou te le toe ta‘uta‘ua foi le avega mai ia Ieova; auā e taitasi le tagata ma fai lana lava upu ma avega ia te ia; auā ua faauigaeseina e outou afioga a le Atua soifua, o Ieova o ‘au, lo tatou Atua.

³⁷Ia faapea ona e fai atu i le perofeta, Se a le tali mai ia Ieova ia te oe? se a foi le afioga mai ia Ieova?

³⁸A e afai tou te fai ane, O le avega mai ia Ieova; o le mea lea ua faapea ona fetalai mai ai o Ieova, Auā ua outou fai ane lenei upu, O le avega mai ia Ieova, a ua ou avatu le feau ia te outou, ua faapea atu, Aua tou te fai ane, O le avega mai ia Ieova;

³⁹o le mea lea faauta, ou te matuā faagaloina ai outou, ma ou lafoaiina ai outou ai o‘u luma, atoa ma le aai na ou foaiina atu ia te outou ma o outou tamā.

⁴⁰Ou te faaeeina atu foi ia te outou le luma e faavavau, ma le masiasi e faavavau, e le galo lava.