Read Samoan Old Version Bible – O LE TUSI PAIA IEREMIA, 24 Bible Online

IEREMIA, 24 - Samoan Old Version Bible – O LE TUSI PAIA bible

IEREMIA, 24

¹Ua faaali mai e Ieova ia te au, faauta foi, o ato mati e lua, ua tuu i luma o le malumalu o Ieova, ina ua mavae ona tāfea e Nepukanesa le tupu o Papelonia, o Iekonia le atalii o Ioakima le tupu o Iuta, ma alii o Iuta, atoa ma tufuga, ma e galulue i uamea, mai Ierusalema, ma ua avea i latou i Papelonia.

²O le tasi ato mati e matuā lelei, e pei o mati muai otata; a o le tasi ato mati e matuā leaga, e le mafai ona ‘aina ina ua leaga.

³Ona faapea mai lea o Ieova ia te au, Ieremia e, se a ea se mea ua e iloa? Ona ou faapea atu lea, O mati; o mati lelei, e matuā lelei ia; a o mati leaga, e matuā leaga ia, e le mafai ona ‘aina, ina ua leaga.

⁴Ona oo mai ai lea o le afioga a Ieova ia te au, ua faapea mai,

⁵Ua faapea ona fetalai mai o Ieova le Atua o Isaraelu, E pei o ia mati lelei, e faapea ona ou faailogaina o le tafeaga o Iuta, ua ou aauina atu nai lenei mea i le nuu o Kaletaia, ina ia lelei ai i latou.

⁶Ou te faasaga atu o‘u mata ia te i latou ia lelei ai, ma ou faafoisia mai i latou i lenei nuu; ou te atiina ae i latou, a e le lepetia; ou te totōina i latou, a e le liaiina.

⁷Ou te avatu foi ia te i latou le loto e iloa ai a‘u, o a‘u lava o Ieova; e fai foi i latou mo‘u nuu, e fai foi a‘u mo latou Atua; pe a latou toe foi mai ia te au ma o latou loto atoa.

⁸E pei o mati leaga, e le mafai ona ‘aina, ina ua leaga; ua faapea ona fetalai mai ai o Ieova, E faapea ona ou tuuina atu o Setekaia le tupu o Iuta, ma alii ua ia te ia, ma e o totoe i Ierusalema, o e o totoe i lenei nuu, ma e o nonofo i le nuu o Aikupito;

⁹ou te tuuina atu i latou ia faaatuatuvaleina, ma ia malaia i malo uma o le lalolagi, e fai a‘i luma, ma upu faatusa, ma tauemuga, ma faafanoga, i mea uma ou te tulia ai i latou.

¹⁰Ou te aauina atu ia te i latou le pelu, ma le oge, ma le faamai, seia faaumatia i latou i le laueleele na ou foaiina atu ai ia te i latou ma o latou tamā.