Read Samoan Old Version Bible – O LE TUSI PAIA IEREMIA, 25 Bible Online

IEREMIA, 25 - Samoan Old Version Bible – O LE TUSI PAIA bible

IEREMIA, 25

¹O le afioga na oo mai ia Ieremia i le nuu uma o Iuta i le fa o tausaga o Ioakima le atalii o Iosia, le tupu o Iuta, o le tausaga muamua lea o Nepukanesa le tupu o Papelonia,

²na fai atu ai le perofeta o Ieremia i le nuu uma o Iuta ma i latou uma sa nonofo i Ierusalema, ua faapea atu,

³E afua i le tausaga e sefulu ma le tolu o Iosia le atalii o Amone, le tupu o Iuta, e oo i le aso nei, o tausaga ia e lua sefulu ma le tolu, ua oo mai ai ia te au le afioga a Ieova, ua ou fai atu ai foi ia te outou, ua ou ala fai atu lava; a ua outou le faalogo mai.

⁴Ua aauina atu ia te outou e Ieova o ana auauna uma, o perofeta, ua ala aauina atu lava i latou;; a ua outou le faalogo mai, ma ua le uai mai o outou taliga e faalogologo mai ai.

⁵Ua latou faapea atu, Ia outou taitasi ma liliu mai i lona ala leaga, ma le leaga o a outou amioga, tou te nonofo ai i le laueleele ua foaiina mai e Ieova ia te outou ma o outou tamā mai le vavau e oo i le faavavau.

⁶Aua le mulimuli atu i atua ese e auauna i ai, ma ifo i ai; aua ne‘i faaonoono foi ia te au i mea e faia e o outou lima, ona ou le faatigaina lea o outou;

⁷a ua outou le faalogo mai ia te au, o loo fetalai mai ai Ieova; o lea ua outou faaonoono mai ai ia te au i mea e faia e o outou lima, ia tiga ai outou.

⁸O le mea lea ua faapea ona fetalai mai ai o Ieova o ‘au, Ua outou le faalogo mai i a‘u upu,

⁹o loo fetalai mai ai Ieova, faauta, o le mea lea ou te avatu ai le feau, ma aami atu i aiga uma o i le itu i matu, ma Nepukanesa le tupu o Papelonia la‘u auauna, ou te aumaia foi i latou e tau ma lenei nuu, ma e o nonofo ai, ma ia nuu uma ua vagavagai, e faaumatia lava i latou, ma faia i latou ma mea faatafunaina, ma mea e uisa ai, ma mea gaogao e faavavau.

¹⁰Ou te faaumatia le leo fiafia ia te i latou, ma le leo olioli, o le leo o le faatoafaiavā, ma le leo o le faatoanofotane, o le taalili o maaolo, ma le malamalama o le lamepa.

¹¹E avea lenei laueleele uma ma mea gaogao, ma mea faatafunaina; a e auauna ia nuu i le tupu o Papelonia i tausaga e fitugafulu.

¹²A faaatoatoaina tausaga e fitugafulu, ona ou taui atu ai lea i le tupu o Papelonia, ma lena nuu, o loo fetalai mai o Ieova, ona o la latou agasala; o le laueleele lava o Kaletaia, ou te faia lea ma mea faatafunaina e faavavau.

¹³Ou te faaoo foi i lena nuu o a‘u upu uma na ou fai atu e oo i ai, o upu uma lava ua tusia i lenei tusi na valoia e Ieremia i atu nuu uma.

¹⁴Auā e faapologaina i latou, o i latou lava, o atu nuu e tele, ma tupu sili, ou te taui atu foi ia te i latou e tusa ma la latou amioga, e tusa foi ma mea ua faia e o latou lima.

¹⁵Auā ua faapea ona fetalai mai o Ieova le Atua o Isaraelu ia te au, Ia e ave le ipu uaina o lo‘u nei ita ai lo‘u lima, ma faainu a‘i atu nuu uma ou te auina atu ai oe ia te i latou.

¹⁶Latou te feinu, ma tautevateva, ma faavālea, ona o le pelu ou te auina atu ai ia te i latou.

¹⁷Ona ou talia ai lea o le ipu ai le aao o Ieova, ma ou faainu a‘i atu nuu uma na auina i ai a‘u e Ieova;

¹⁸o Ierusalema, ma aai o Iuta, ma ona tupu, ma ona alii, e faia i latou ma mea gaogao, ma mea faatafunaina, ma mea e uisa ai, ma faafanoga e pei ona fai i le aso nei;

¹⁹o Farao, o le tupu o Aikupito, ma ana auauna, ma alii ua ia te ia, ma lona nuu uma;

²⁰o tagata eseese uma, ma tupu uma o le nuu o Usa, ma tupu uma o le nuu o Filisitia, ma Asekelona, ma Kasa, ma Ekerona, ma e o totoe o Asetota;

²¹o Etoma, ma Moapi, ma le fanauga a Amoni;

²²o tupu uma foi o Turo, ma tupu uma o Saitonu, ma tupu o nuu tu matafaga i tala atu o le sami;

²³o Titana, ma Tema, ma Pusa, ma i latou uma o e sala a latou pito ‘ava;

²⁴o tupu uma foi o Arapi, ma tupu uma o tagata eseese o e mau i le vao;

²⁵o tupu uma foi o Semeri, ma tupu uma o Elama, ma tupu uma o Metai;

²⁶ma tupu uma o le itu i matu, o e latalata ma e mamao, o le tasi ma le tasi, ma malo uma o le lalolagi o i le fogāeleele; a e mulia‘i inu le tupu o Sesaka ia te i latou.

²⁷E te fai atu foi ia te i latou, Ua faapea ona fetalai mai o Ieova o ‘au, le Atua o Isaraelu, Ia feinu outou, ma ia onā, ma ia puai, ma ia pauū, aua foi le toe tutū, ona o le pelu ou te auina atu ai ia te outou.

²⁸A e afai latou te le mafafai ona tali i le ipu ai lou lima e feinu ai, ona e fai atu ai lea ia te i latou, O loo faapea ona fetalai mai o Ieova o ‘au, Tou te matuā feinu lava.

²⁹Auā faauta, ou te amata ona faaoo o le malaia i le aai ua igoa i lo‘u igoa, a o outou, e faasaoina ea outou? E le faasaoina lava outou; auā ou te valaau atu i le pelu e oo ia te i latou uma o e ua nonofo i le lalolagi, o loo fetalai mai ai Ieova o ‘au.

³⁰O oe foi, ia e vavalo ia te i latou i nei upu uma, ma e faapea atu ia te i latou, E leo tele mai Ieova mai lugā, ma tŭlei mai lona siufofoga ai lona afioaga paia; e matuā leo tele mai i lona afioaga; e alaga o ia, e pei o i latou o e soli fua vine, ia te i latou uma o e nonofo i le lalolagi.

³¹E oo le vāvāō i tuluiga o le lalolagi; auā o loo ia Ieova le finauga ma nuu ese, e faamasinoina e ia tagata uma; e tuuina atu e ia o e amio leaga i le pelu, o loo fetalai mai ai Ieova.

³²O loo faapea ona fetalai mai o Ieova o ‘au, Faauta, e alu atu le malaia e afua i le tasi nuu e oo atu i le tasi nuu, e tupu mai le afā tele mai tuluiga o le lalolagi.

³³O le fasi a Ieova i lea aso e afua mai i le tasi pito lalolagi e oo atu i le tasi pito lalolagi; e leai ni e taufaitagitu‘i ia te i latou, e le aofia i latou, e le tanumia foi i latou; e fai i latou ma otaota i luga o le laueleele.

³⁴Outou leoleo mamoe, ia outou uio, ma alalaga; outou tā‘ita‘i o le lafu, ia outou taafili i le lefulefu, auā ua oo i o outou aso e fāsia ma faataapeapeina ai outou; e pauū outou e pei o le ipu matagofie.

³⁵E le maua e leoleo mamoe se mea e sola i ai, e le sao foi tā‘ita‘i o le lafu.

³⁶E lagona le leo o le alaga o leoleo mamoe, ma le uio o tā‘ita‘i o le lafu; auā ua faaumatia e Ieova o mea e tataa ai o latou lafu.

³⁷O mea sa tataa ai manu ma le filemu, ua faaumatia ia ona o le toasa tele o Ieova.

³⁸Ua tuua lona apitaga, e pei o le leona; auā e avea lo latou nuu ma faatafunaga ona o le ita faasaua, ma lona ita tele lava.