Read Samoan Old Version Bible – O LE TUSI PAIA IEREMIA, 28 Bible Online

IEREMIA, 28 - Samoan Old Version Bible – O LE TUSI PAIA bible

IEREMIA, 28

¹O lea lava tausaga, o le amataga o le nofoaiga a Setekaia, le tupu o Iuta, o lona fa o tausaga, ma le lima o masina, na fai mai ai ia te au o Hanania le atalii o Asura le perofeta, o le Kipeona, i le fale o Ieova, i luma o faitaulaga ma le nuu uma, ua faapea mai,

²O loo faapea ona fetalai mai o Ieova o ‘au, le Atua o Isaraelu. ua faapea mai, Ua ou gauia le amo a le tupu o Papelonia.

³A o lei mavae tausaga e lua ou te toe aumaia i lenei mea o ipu uma o le fale o Ieova, na aveesea e Nepukanesa le tupu o Papelonia ai lenei mea, ma na avatu ai i Papelonia;

⁴ou te faafoisia mai foi i lenei mea o Iekonia, le atalii o Ioakima, le tupu o Iuta, ma le tafeaga uma a Iuta, na o atu i Papelonia, o loo fetalai mai ai Ieova; auā ou te gauia le amo a le tupu o Papelonia.

⁵Ona fai atu ai lea o Ieremia le perofeta ia Hanania le perofeta i luma o faitaulaga, ma luma o le nuu uma o e na tutū mai i le fale o Ieova;

⁶ua fai atu lava Ieremia le perofeta, Amene; ia faapea ona fai e Ieova; ia faamauina e Ieova au upu ua e vavalo ai, i le toe aumaia ipu o le fale o Ieova, ma le tafeaga uma mai Papelonia i lenei mea.

⁷A se‘i e faalogo mai i lenei upu ou te fai atu ai nei i ou luma, ma luma o le nuu uma,

⁸O perofeta na muamua ia te au, na muamua foi ia te oe, talu mai anamua lava, ua latou vavalo i nuu e tele, ma malo tetele, i taua, ma malaia, ma faamai;

⁹o le perofeta ua vavalo i le manuia, a taunuu le upu a lea perofeta, ona iloa ai lea, e moni, o le perofeta lea ua auina mai e Ieova.

¹⁰Ona tago ai lea o Hanania le perofeta i le amo nai le ua o Ieremia le perofeta, ma na gauia.

¹¹Ona fai mai ai lea o Hanania i luma o le nuu uma, ua faapea mai, O loo faapea ona fetalai mai o Ieova, E faapea lava ona ou gauia le amo a Nepukanesa le tupu a Papelonia i ua o nuu uma, a o lei mavae tausaga e lua. Ona alu ese ai lea o Ieremia le perofeta.

¹²A ua oo mai le afioga a Ieova ia Ieremia, ina ua mavae ona gauia e Hanania le perofeta o le amo nai le ua o Ieremia le perofeta, ua faapea mai,

¹³Ina alu ia ma fai atu ia Hanania, ia faapea atu, O loo faapea ona fetalai mai o Ieova, Ua e gauia amo laau; a e te faia amo uamea e sui a‘i.

¹⁴Auā o loo faapea ona fetalai mai o Ieova o ‘au, le Atua o Isaraelu, Ua ou faaeetia le amo uamea i ua o ia nuu uma, ina ia latou auauna ia Nepukanesa le tupu o Papelonia; latou te auauna foi ia te ia; ua ou tuuina atu foi ia te ia o manu feai.

¹⁵Ona fai atu ai lea o Ieremia le perofeta ia Hanania le perofeta, Hanania e, ina faalogologo mai ia; e lei auina mai oe e Ieova; a ua e faatupuina i lenei nuu le faatuatua i le pepelo.

¹⁶O le mea lea, o loo faapea ona fetalai mai ai o Ieova, Faauta, ou te lafoai ia te oe ai le fogāeleele, e te oti i le tausaga nei; auā ua e tautala i le fouvale ia Ieova.

¹⁷Ona oti ai lea o Hanania le perofeta i lea lava tausaga, i le fitu o masina.