Read Samoan Old Version Bible – O LE TUSI PAIA IEREMIA, 29 Bible Online

IEREMIA, 29 - Samoan Old Version Bible – O LE TUSI PAIA bible

IEREMIA, 29

¹O upu nei a le tusi na avatua e Ieremia le perofeta ai Ierusalema i e na totoe o toeaina na tāfea, ma faitaulaga, ma perofeta, ma le nuu uma lava, na tāfea ia Nepukanesa mai Ierusalema i Papelonia;

²ina ua mavae ona o atu nai Ierusalema o Iekonia le tupu, ma le sa‘o tamaitai, ma eunuka, ma alii o Iuta ma Ierusalema, o tufuga foi, ma e galulue i uamea.

³Na ave e Eliasa le atalii o Safana, ma Kemaria le atalii o Hilikia, o e na aauina e Setekaia le tupu o Iuta i Papelonia ia Nepukanesa le tupu o Papelonia ua faapea,

⁴O loo faapea ona fetalai mai o Ieova o ‘au, le Atua o Isaraelu, i le tafeaga uma, na ou faatāfea mai Ierusalema i Papelonia,

⁵Ia outou fāi fale, ma nonofo ai; ma ia outou totōina faatoaga, ma aai ai ona fua;

⁶ina fai avā ia outou, ma ia fananau ai atalii ma afafine ia te outou; ia outou aumaia foi avā mā o outou atalii, ma fai ni tane mā o outou afafine, ina ia latou fananau mai tama ma teine; ia faatoateleina outou i lea mea, a e aua le faatoaitiitia.

⁷Ia outou sailiili foi ia manuia le aai ua ou faatāfea ai outou; ma ia outou tatalo atu ia Ieova mo lena aai; auā o lona manuia e manuia ai outou.

⁸Auā o loo faapea ona fetalai mai o Ieova o ‘au, le Atua o Isaraelu, Aua ne‘i faaseseina outou e o outou perofeta ua ia te outou, ma o outou taulāitu; aua foi ne‘i faalogo i miti, ua faia talu outou;

⁹auā ua latou vavalo i le pepelo ia te outou i lo‘u igoa; ou te lei aauina atu i latou, o loo fetalai mai ai Ieova.

¹⁰Auā o loo faapea ona fetalai mai o Ieova, A faaatoatoaina tausaga e fitugafulu i Papelonia, ona ou asiasi ai lea ia te outou, ma ou faataunuuina la‘u upu lelei ia te outou, i le faafoisia mai outou i lenei mea.

¹¹Auā o a‘u nei, ua ou iloa manatu ua ou manatu ai ia te outou, o manatu i le manuia, a e le o le malaia, o loo fetalai mai ai Ieova, e foaiina atu ia te outou le iuga e i ai le faamoemoe.

¹²Ona outou valaau ai lea ia te au, e ō foi outou ma tatalo ia te au, ou te faalogo foi ia te outou.

¹³E saili mai outou ia te au, tou te maua foi, pe a outou saili mai ia te au ma outou loto atoa.

¹⁴E maua lava a‘u e outou, o loo fetalai mai ai Ieova; ou te faafoisia la outou tafeaga, ma ou faapotopotoina outou ai nuu uma, ma mea uma na ou tulia ai outou, o loo fetalai mai ai Ieova; ou te faafoisia foi outou i le mea ua ou faatāfea ai outou.

¹⁵Ua outou fai ane, Ua faatuina mo i tatou e Ieova o perofeta i Papelonia;

¹⁶o le mea lea o loo faapea ona fetalai mai ai o Ieova i le tupu, o lē tietie i le nofoālii o Tavita, ma le nuu uma o loo nonofo i lenei aai, o outou uso ia e na le o atu faatasi ma outou i le tafeaga;

¹⁷o loo faapea ona fetalai mai o Ieova o ‘au, Faauta, ou te aauina atu ia te i latou o le pelu, ma le oge, ma le faamai, ou te faia foi i latou ia pei o mati e matuā leaga, e le mafai ona ‘aina, ina ua leaga.

¹⁸Ou te tuliloa foi ia te i latou i le pelu, ma le oge, ma le faamai, ou te tuuina atu foi i latou ia faaatuatuvaleina i malo uma o le lalolagi, e fai ma faafanoga, ma mea e ofo ai, ma uisa ai, ma fai a‘i luma, i nuu uma ua ou tulia ai i latou.

¹⁹Auā ua latou le faalogo i a‘u upu, o loo fetalai mai ai Ieova, na ou avatua ia te i latou i a‘u auauna o le au perofeta, na ala aauina i latou; a ua outou le faalogo lava, o loo fetalai mai ai Ieova.

²⁰A o outou, ia outou faalogo mai i le afioga a Ieova, o outou uma o le tafeaga e na aauina atu e a‘u mai Ierusalema i Papelonia.

²¹O loo faapea ona fetalai mai o Ieova o ‘au, le Atua o Isaraelu, ia Aapo le atalii o Kulaia, ma Setekaia le atalii o Maaseia, o e vavalo i le pepelo ia te outou i lo‘u igoa, Faauta, ou te tuuina i laua i le lima o Nepukanesa le tupu o Papelonia, na te fasiotia i laua i o outou luma;

²²e avea foi i laua e fai a‘i faafanoga e le tafeaga uma o Iuta, o i Papelonia, e faapea, Ia faia oe e Ieova ia pei o Setekaia, ma ia pei o Aapo o e na tunua e le tupu o Papelonia i le afi;

²³auā na la fai le mea leaga i Isaraelu, ma la mulilulua ma avā a ē sa latou tuaoi, ma la fai upu i lo‘u igoa i le pepelo, na ou le poloai atu ai ia te i laua; ua ou iloa ma molimau ai, o loo fetalai mai ai Ieova.

²⁴Ia e fai atu foi ia Semaia o le Neelami, ia faapea atu,

²⁵O loo faapea ona fetalai mai o Ieova o ‘au, le Atua o Isaraelu, ua faapea mai, Auā ua e aumaia tusi i lou igoa i le nuu uma o loo i Ierusalema, ma Sefanaia, le atalii o Maaseia le faitaulaga, ma faitaulaga uma, ua faapea atu,

²⁶Ua tofia oe e Ieova e fai ma faitaulaga e sui a‘i Ioiata le faitaulaga, ina ia faia ni e pule i le fale o Ieova, i tagata e taitoatasi ua valea, ma fai o ia e ia ma perofeta, ma ia e tuuina atu o ia i laau faamau, ma le fale puipui.

²⁷O lenei, se a le mea ua e le aoai atu ai ia Ieremia le Anatota, o le ua fai o ia e ia ma perofeta ia te outou?

²⁸Auā lava ua au mai ai lana feau ia te i matou i Papelonia, ua faapea mai, E tuai lenei tafeaga; ia outou fāi fale, ma nonofo ai, ma ia outou totōina faatoaga, ma aai ai o latou fua.

²⁹Ua faitau e Sefanaia le faitaulaga lenei tusi i taliga o Ieremia le perofeta.

³⁰Ona oo mai ai lea o le afioga a Ieova ia Ieremia, ua faapea mai,

³¹Ia e avatu le feau ia te i latou uma o le tafeaga, ia faapea atu, O loo faapea ona fetalai mai o Ieova ia Semaia, le Neelami, Ua vavalo ia te outou Semaia, a o a‘u, na ou le auina atu o ia, ua faatupuina foi e ia ia te outou le faatuatua i le pepelo;

³²o le mea lea o loo faapea ona fetalai mai ai o Ieova, Faauta, ou te taui atu ia Semaia le Neelami, ma lana fanau; e le i ai ia te ia se tasi e nofo faatasi ma lenei nuu; e le iloa foi e ia le manuia ou te faia mo lo‘u nuu, o loo fetalai mai ai Ieova; auā ua ia tautala i le fouvale ia Ieova.