Read Samoan Old Version Bible – O LE TUSI PAIA IEREMIA, 32 Bible Online

IEREMIA, 32 - Samoan Old Version Bible – O LE TUSI PAIA bible

IEREMIA, 32

¹O le afioga na oo mai ia Ieremia mai ia Ieova i le sefulu o tausaga o Setekaia le tupu o Iuta, o le sefulu ma le valu o tausaga lea o Nepukanesa.

²O ona po ia na vagaia ai Ierusalema e le itu taua a le tupu o Papelonia; sa puipuia foi Ieremia le perofeta i le lotoā o le fale puipui sa i le fale o le tupu o Iuta.

³Auā na puipuia o ia e Setekaia le tupu o Iuta, ua ia faapea, Se a ea le mea ua e vavalo ai, ua faapea mai, O loo faapea ona fetalai mai o Ieova, Faauta, ou te tuuina atu lenei aai i le lima o le tupu o Papelonia, na te aea;

⁴e le sao foi Setekaia le tupu o Iuta ai lima o Kaletaia, a e tuuina lava o ia i le lima o le tupu o Papelonia, la te tautala faafesaga‘i ma ia, ma la feiloa‘i ma ia;

⁵e ta‘ita‘iina foi e ia o Setekaia i Papelonia, e i ai foi o ia i lea mea seia ou asiasi atu ia te ia, ua fetalai mai ai Ieova; e ui lava ina outou tau ma Kaletaia e le manuia outou.

⁶Ua fai atu Ieremia, Ua oo mai le afioga a Ieova ia te au, ua faapea mai.

⁷Faauta, e sau ia te oe o Hanameali, le atalii o Saluma, o le uso o lou tamā, e faapea mai, Ia e faatau mo oe lo‘u fanua o loo i Anatota; auā ua ia te oe le pule i le faatau e faatau ai.

⁸Ona sau ai lea ia te au i le lotoā o le fale puipui o Hanameali, le atalii o le uso o lo‘u tama, e pei o le afioga a Ieova, ua faapea mai ia te au, Se‘i e faatau lo‘u fanua, o loo i Anatota o i le nuu o Peniamina; auā e āu le pule e fai mou le fanua, e ou foi le faatau; ina faatau ia mo oe. Ona ou iloa ai lea, o le afioga a Ieova lea.

⁹Ona ou faatauina lea mai ia Hanameali, le atalii o le uso o lo‘u tamā, o le fanua o loo i Anatota, ma ou fuatia ia te ia o tupe, o sekeli ario e sefulu ma le fitu.

¹⁰Ona ou tusia lea i le tusi, ma ou faamaufaailogaina ai, ma ou amia mai molimau, ma ou fuatia le ario i le fua faatautau.

¹¹ona ou ave ai lea o le tusi o le faatau, o le ua faamaufaailogaina e tusa ma le poloaiga ma tulafono, atoa ma le ua le faamauina;

¹²ua ou ave foi le tusi o le faatau ia Paruka, le atalii o Neria, le atalii o Maaseia, i luma o Hanameali, le atalii o le uso o lo‘u tamā, i luma foi o molimau na tusi i le tusi o le faatau, i luma foi o tagata Iuta uma sa nonofo i le lotoā o le fale puipui.

¹³Ua ou matuā fai atu foi ia Paruka i o latou luma, ua faapea atu,

¹⁴O loo faapea ona fetalai mai o Ieova o ‘au, le Atua o Isaraelu, Ia e ave nei tusi, o lenei lava tusi o le faatau, o le ua faamaufaailogaina, atoa foi ma lenei tusi ua le faamauina, ia e tuu ai foi i se ipu omea, ina ia tumau i aso e tele;

¹⁵auā o loo faapea ona fetalai mai o Ieova o ‘au, le Atua o Isaraelu, E toe faatauina i le nuu nei o fale, ma fanua, ma tovine.

¹⁶Ua ou tuuina le tusi o le faatau ia Paruka le atalii o Neria, mulimuli ane ona ou tatalo atu lea ia Ieova, ua faapea atu,

¹⁷Aue! le Alii e Ieova, faauta, o oe na e faia le lagi ma le lalolagi i lou malosi tele, ma lou aao faaloaloa, e le faigata foi ia te oe se mea e tasi;

¹⁸ua e alofa i afe o tupulaga, ua e taui atu foi le amioletonu a tamā i fatafata o a latou fanau pe a mavae atu i latou; o le Atua sili, ma le malosi, o Ieova o ‘au, o lona suafa lea,

¹⁹e sili i faautauta, e silisili foi i au mea e fai; auā ua silasila ou fofoga i ala uma o tagata; e tuuina atu i tagata taitasi e tusa ma ona ala, e tusa foi ma le fua o ana amioga;

²⁰o le na faatuina foi o faailoga ma vavega i le nuu o Aikupito, ua oo i le aso nei, ma le nuu o Isaraelu, atoa ma nuu o tagata ese; ua e faia foi mo oe le suafa, e pei ona faia i le aso nei.

²¹Na e aumaia foi lou nuu o Isaraelu mai le nuu o Aikupito, ma faailoga, ma vavega, ma le aao malosi, ma le aao faaloaloa, ma mea matua matautia.

²²Ua e foaiina mai foi ia te i latou lenei nuu, na e tauto ai i o latou tamā e foai ia te i latou, o le nuu o tafe ai le suāsusu ma le meli;

²³na latou o mai ai, ma fai ai mo latou; a ua latou le faalogo i lou siufofoga, ma latou le savavali e tusa ma au tulafono; ua latou le faia mea uma na e poloai ai ia te i latou ia faia; o le mea lea ua e faaoo ai nei mea leaga uma ia te i latou.

²⁴Faauta mai, o mea mautietie, ua oo mai lava i le aai e aea a‘i; ua tuuina foi le aai i lima o Kaletaia, o e ua faasaga tau mai ai, auā o le pelu, ma le oge, ma le faamai; o le mea lava na e fetalaia ua oo; faauta mai foi, ua e silafia.

²⁵A o oe, le Alii e Ieova, ua e fetalai mai ia te au, Ia e faatau le fanua mo oe i tupe, ma aami atu molimau; a o le aai, ua tuuina atu lea i lima o Kaletaia.

²⁶Ona oo mai ai lea o le afioga a Ieova ia Ieremia, ua faapea mai,

²⁷Faauta, o a‘u lava o Ieova, o le Atua o tagata uma; pe faigata ea ia te au se mea e tasi?

²⁸O lea o loo faapea ona fetalai mai ai o Ieova, Faauta, ou te tuuina atu lenei aai i lima o Kaletaia, ma le lima o Nepukanesa le tupu o Papelonia, e aea ai foi e ia;

²⁹e o mai foi Kaletaia, o e tau ma lenei aai, ma latou faamu lenei aai i le afi, e susunuina ai lava e i latou, atoa ma fale na faamuina ai mea manogi i o latou luga ia Paala, ma latou liligi ifo ai taulaga i mea e inu i atua ese, ina ia latou faaonoono mai ia te au.

³⁰Auā ua na o mea leaga ua faia i o‘u luma e le fanauga a Isaraelu ma le fanauga a Iuta talu ina o taulelea i latou; auā ua na ona faaonoono mai o le fanauga a Isaraelu ia te au i galuega a o latou lima, ua fetalai mai ai Ieova.

³¹Auā ua faia lenei aai ia te au ma mea ou te tiga ai, ma mea ou te ita ai, talu mai le aso na faia ai, ua oo lava i le aso nei, ina ia ou aveeseina ai i o‘u luma;

³²ona o amio leaga uma a le fanauga a Isaraelu, ma le fanauga a Iuta, ua latou faia e faaonoono ai ia te au, o i latou, o latou tupu, o latou alii, o latou faitaulaga, ma o latou perofeta, ma tagata Iuta, atoa ma e o nonofo i Ierusalema.

³³Ua u mai ia te au o latou tua, a e le o latou mata; ua ou a‘oa‘o atu ia te i latou, ua ou ala a‘oa‘o atu ai lava, a ua latou le faalogo lava ina ia talia mea ua a‘oa‘oina atu ai;

³⁴a ua latou tuuina a latou mea e inosia i le fale ua ta‘ua ai lo‘u igoa, ina ia latou faaleagaina ai.

³⁵Ua faia foi e i latou mea maualuluga ia Paala, ua i le vanu o le atalii o Hinoma, ina ia latou faaui ane o latou atalii ma o latou afafine i le afi ia Moloka; o le mea lava ou te lei poloai ai ia te i latou, ou te lei manatu foi i ai; ua faia e i latou lenei mea e inosia e faatupuina ai le agasala ia Iuta.

³⁶A o lenei, o loo faapea ona fetalai mai o Ieova, le Atua o Isaraelu, i le aai nei, o loo ua outou fai mai ai, Ua tuuina atu ia i le lima o le tupu o Papelonia i le pelu, ma le oge, ma le faamai;

³⁷faauta, ou te faapotopoto ia te i latou ai nuu uma ua ou tulia ai i latou i lo‘u tiga, ma lo‘u ita, ma le ita tele; ou te faafoisia mai i latou i lenei mea, ma ou faanonofoina ai i latou ma le filemu;

³⁸e fai foi i latou mo‘u nuu, e fai foi a‘u mo latou Atua.

³⁹Ou te foaiina atu ia te i latou le loto e tasi, ma le ala e tasi, ina ia latou matatau ia te au i aso uma lava, ia lelei ai i latou, atoa foi ma a latou fanau pe a mavae atu i latou;

⁴⁰ou te osia foi le feagaiga e faavavau ma i latou, ou te le liliu ese ai ia te i latou, a ou te agalelei atu ia te i latou; ou te tuuina atu foi le mata‘u ia te au i o latou loto, ina ia latou le liliu ese ia te au.

⁴¹Ou te fiafia lava ia te i latou, ma ou agalelei atu ia te i latou, ma ou totōina i latou i lenei nuu ma le faamaoni, ma lo‘u loto atoa, ma lo‘u agaga atoa.

⁴²Auā o loo faapea ona fetalai mai o Ieova, E pei ona ou faaoo i lenei nuu lenei malaia tele uma, e faapea foi ona ou faaoo ia te i latou le manuia uma ua ou folafolaina ia te i latou.

⁴³E faataulia foi fanua i le nuu nei, ua outou faapea mai ai, Ua faatafunaina ia, e le o i ai se tagata, po o se manu; ua tuuina atu ia i lima o Kaletaia.

⁴⁴E faataulia e i latou fanua i tupe, ma latou tusia ai i tusi, ma faamaufaailogaina ai, ma aami molimau i le nuu o Peniamina, ma mea e vagavagai i Ierusalema, ma aai o Iuta, ma aai i atu mauga, ma aai i le itu maulalo, ma aai i le itu i toga; auā ou te faafoisia lava lo latou tafeaga, ua fetalai mai ai Ieova.