Read Samoan Old Version Bible – O LE TUSI PAIA IEREMIA, 33 Bible Online

IEREMIA, 33 - Samoan Old Version Bible – O LE TUSI PAIA bible

IEREMIA, 33

¹Na o mai foi le afioga a Ieova ia Ieremia, o le atu lua lea, a o puipuia pea o ia i le lotoā o le fale puipui, ua faapea mai,

²O loo faapea ona fetalai mai o Ieova le na te faia, o Ieova le na te saunia, ina ia faatumauina; o Ieova o lona suafa lea;

³ia e valaau mai ia te au, ona ou tali atu ai lea ia te oe, ma ou faaali atu ia te oe o mea tetele ma le faigata, o mea ua e le iloa.

⁴Auā o loo faapea ona fetalai mai o Ieova, le Atua o Isaraelu, i fale o lenei aai, ma fale o tupu o Iuta, ua sŏloia i mea mautietie, ma le pelu;

⁵ua latou o mai e tau ma Kaletaia, ma faatumu ia te i latou i tino o tagata oti e ua fāsia e a‘u i lo‘u tiga, ma lo‘u ita, auā ua ‘alo o‘u mata i lenei aai, ona o a latou amio leaga uma.

⁶Faauta, ou te faia se fusi o lona ma‘i, ma se togafiti e malolo a‘i; ou te faamalolo lava ia te i latou, ma ou faaali atu ia te i latou le silisili o le manuia ma le faamaoni.

⁷Ou te faafoisia foi le tafeaga o Iuta, ma le tafeaga o Isaraelu, ma ou atiina ae i latou e pei o anamua.

⁸Ou te faamamā ia te i latou i a latou amioletonu uma, na latou agasala ai ia te au; ou te faamagalo i a latou amioletonu uma, na latou agasala ai ia te au, ma latou fouvale ai ia te au.

⁹E fai foi i latou ma igoa fiafia ia te au, e fai foi ma viiga, ma matagofie i nuu uma o le lalolagi, o e faalogo i mea lelei uma ou te faia ia te i latou; latou te fefefe foi, ma latou gatete, auā o mea lelei uma, i le ma le manuia uma ou te faia mo i latou.

¹⁰O loo faapea ona fetalai mai o Ieova, E toe lagona i lenei mea ua outou faapea mai ai, Ua faatafunaina ia, e le o i ai se tagata, e le o i ai foi se manu, o aai o Iuta, o ala foi o Ierusalema o loo faatafunaina nei, e le o i ai se tagata, e leai foi se nofo ai, e le o i ai foi se manu,

¹¹e lagona ai le leo fiafia ma le leo olioli, o le leo o le faatoafaiavā ma le leo o le faatoanofotane, o le leo o e fai mai, Ia outou vivii atu ia Ieova o ‘au, auā e lelei Ieova, auā e faavavau lava lona alofa; o i latou ia o e avatua le taulaga faaneenee i le fale o Ieova. Auā ou te foafoisia le tafeaga o le nuu, e pei o anamua, ua fetalai mai ai Ieova.

¹²O loo faapea ona fetalai mai o Ieova o ‘au, O lenei mea, o loo faatafunaina nei, e le o i ai se tagata po o se manu, ma ona aai uma, e i ai mea e nonofo ai leoleo mamoe, o e ave i ai lafu mamoe e taoto ai.

¹³E toe ui ane lafu mamoe i lalo o lima o le na te faitaulia, o loo fetalai mai ai Ieova, i aai i atu mauga, ma aai i le itu maulalo, ma aai i le itu i toga, i le nuu foi o Peniamina, ma mea e vagavagai i Ierusalema, ma aai o Iuta.

¹⁴Faauta, e oo lava i ona aso, o loo fetalai mai ai Ieova, ou te faataunuuina ai le upu lelei na ou folafolaina i le aiga o Isaraelu ma le aiga o Iuta.

¹⁵O ia ona po, ma lena lava tausaga, ou te faatupuina ai ia Tavita o le La laau amiotonu; e faia foi e ia le faamasinoga ma le amiotonu i le nuu.

¹⁶O ona po ia e faaolaina ai Iuta, e nofo ai foi Ierusalema ma le filemu; o le igoa foi lenei e ta‘ua ai o ia, O IEOVA LA TATOU AMIOTONU.

¹⁷Auā o loo faapea ona fetalai mai Ieova, E le motu le gafa o Tavita i le nofoālii o le aiga o Isaraelu;

¹⁸e le motu foi i o‘u luma le gafa o le au ositaulaga, o sa Levī, e osi ai taulaga mu, ma susunu taulaga i mea e ‘ai, ma osi taulaga i aso uma.

¹⁹Na oo mai foi le afioga a Ieova ia Ieremia, ua faapea mai,

²⁰O loo faapea ona fetalai mai o Ieova, Afai tou te mafaia ona lepeti i la‘u feagaiga ma le ao, ma la‘u feagaiga ma le po, ina ia le toe ai se ao, po o se po i ona lava itu aso;

²¹ona mafai ai lea ona lepeti o la‘u feagaiga ma Tavita la‘u auauna, ina ia le ia te ia se atalii e fai ma tupu i lona nofoālii; atoa foi ma sa Levī, le au ositaulaga, o a‘u auauna.

²²E pei ona le mafaitauina o ‘au a le lagi, ma ona le mafuatia le oneone o le sami; e faapea ona ou faatoateleina o le fanau a Tavita la‘u auauna, ma sa Levī o e auauna ia te au.

²³Na oo mai foi le afioga a Ieova ia Ieremia, ua faapea mai,

²⁴E te le iloa ea mea ua tautala ai lenei nuu, ua faapea, O aiga e lua na filifilia e Ieova, ua lafoaiina i latou e ia? Ua latou ‘ino‘ino foi i lo‘u nuu, ina ia le toe fai ma nuu i o latou luma.

²⁵O loo faapea ona fetalai mai o Ieova, Afai ua leai sa‘u feagaiga ma le ao ma le po, afai foi ua le faia e a‘u tulafono i le lagi ma le lalolagi;

²⁶ona lafoaiina lea e a‘u o le fanau a Iakopo, ma Tavita la‘u auauna, ou te le ave foi nisi o ana fanau e fai ma alii e pule i le fanau a Aperaamo, ma Isaako, ma Iakopo; auā ou te faafoisia mai lo latou tafeaga, ma ou alofa atu ia te i latou.