Read Samoan Old Version Bible – O LE TUSI PAIA IEREMIA, 34 Bible Online

IEREMIA, 34 - Samoan Old Version Bible – O LE TUSI PAIA bible

IEREMIA, 34

¹O le afioga na oo mai ia Ieremia mai ia Ieova, a o tau ma Ierusalema ma ona aai uma o Nepukanesa le tupu o Papelonia, ma lana itu taua uma, ma malo uma o le lalolagi na ia pule i ai, ma nuu uma, ua faapea mai,

²O loo faapea ona fetalai mai o Ieova, le Atua o Isaraelu, Ina alu ia ma fai atu ia Setekaia le tupu o Iuta, ia faapea atu ia te ia, O loo faapea ona fetalai mai o Ieova, Faauta, ou te tuuina atu lenei aai i le lima o le tupu o Papelonia, e susunuina ai foi e ia i le afi;

³o oe foi e te le sao i lona lima, a e puea lava oe, ma tuuina i lona lima; e fesilafa‘i oulua ma le tupu o Papelonia, lua te tautala faafesaga‘i ma ia, e te maliu atu foi i Papelonia.

⁴A ia e faafofoga mai i le afioga a Ieova, Setekaia e, le tupu o Iuta; o loo faapea ona fetalai mai o Ieova ia te oe, E te le maliu i le pule;

⁵e te maliu ma le filemu; e pei ona muina o afi mo ou tamā, o tupu anamua sa muamua ia te oe, e faapea foi ona latou muina o le afi mo oe; latou te taufaitagitu‘i foi ona o oe, e faapea, Aue! le alii e; auā ua ou fai atu le upu, ua fetalai mai ai Ieova.

⁶Ona fai atu ai lea o Ieremia le perofeta ia Setekaia le tupu o Iuta ia upu uma i Ierusalema,

⁷ina o tau le itu taua a le tupu o Papelonia ma Ierusalema, ma aai uma sa totoe i Iuta, o Lakisa ma Aseka; auā o aai nofo ‘olo ia sa totoe i aai o Iuta.

⁸O le afioga na oo mai ia Ieremia mai ia Ieova, ina ua mavae ona osia o le feagaiga e Setekaia le tupu ma le nuu uma sa i Ierusalema, e tala‘i atu ia te i latou le saolotoga;

⁹ia latou taitasi ma tuusaolotoina lana auauna tane, ma lana auauna fafine, o le tane Eperu, ma le fafine Eperu; ina ia le faapologaina e so latou se tagata Eperu, lona uso.

¹⁰Ua faalogo alii uma, ma le nuu uma na faia le feagaiga, ia latou taitasi ma tuusaolotoina lana auauna tane, ma lana auauna fafine, ina ia latou le toe faapologaina i latou; ona latou usiusitai ai lea, ma tuuina atu i latou ia o.

¹¹A e mulimuli ane ua latou toe faafoisia mai auauna tane ma auauna fafine na latou tuusaolotoina; ma latou faapologaina i latou e fai ma auauna tane ma auauna fafine.

¹²Ona oo mai ai lea o le afioga a Ieova ia Ieremia mai ia Ieova, ua faapea mai,

¹³O loo faapea ona fetalai mai o Ieova, le Atua o Isaraelu, O a‘u lava, na a‘u osia le feagaiga ma o outou tamā i le aso na ou aumai ai i latou mai le nuu o Aikupito, o le mea sa nofo pologa ai, ua faapea,

¹⁴A atoa tausaga e fitu, ia outou taitasi ma tuuina atu e alu lona uso o le Eperu, o le na faatauina ia te oe; e auauna o ia ia te oe i tausaga e ono, ona e tuusaolotoina ai lea o ia; a e lei faalogo mai o outou tamā ia te au, e lei uai mai foi o latou taliga.

¹⁵O outou foi, na outou liliu mai i ona po nei, ma outou faia le mea tonu i o‘u luma, i lo outou tala‘i atu le saolotoga o le tasi i le tasi; na outou osia foi le feagaiga i o‘u luma i le fale ua ta‘ua ai lo‘u igoa.

¹⁶A ua outou liliu ese, ma faaleagaina lo‘u igoa, ma taitasi ma faafoisia mai lana auauna tane, ma lana auauna fafine, na tuusaolotoina i la latou faitalia, ua outou faapologaina i latou e fai ma auauna tane ma auauna fafine ia te outou.

¹⁷O le mea lea o loo faapea ona fetalai mai ai o Ieova, Ua outou le faalogo mai ia te au e tala‘i atu le saolotoga, o le tagata i lona uso, ma le tagata i lē la te tuaoi; faauta, ua fetalai mai Ieova, Ou te tala‘i atu ia te outou le saolotoga, i le pelu, ma le faamai, ma le oge; ou te tuuina atu foi outou ia faaatuatuvaleina i malo uma o le lalolagi.

¹⁸Ou te tuuina atu foi ia tagata ua solia la‘u feagaiga, o e ua le faataunuuina upu o le feagaiga na latou osia i o‘u luma, o le tamai povi na latou isiluaina, ma latou ui ane i le va o mea na isiluaina,

¹⁹o alii o Iuta, ma alii o Ierusalema, o eunuka, ma faitaulaga, ma tagata uma o le nuu, na ui ane i le va o le tamai povi na isiluaina;

²⁰ou te tuuina atu lava i latou i lima o e ita ia te i latou, ma lima o e saili e fasioti ia te i latou; o latou tino foi ua oti e fai ma mea e ‘ai i manu felelei, ma manu e tataa.

²¹Ou te tuuina atu foi o Setekaia le tupu o Iuta, ma alii ua ia te ia, i lima o e ita ia te i latou, ma lima o e saili e fasioti ia te i latou, ma lima o le itu taua a le tupu o Papelonia, o e ua o ae nai ia te outou.

²²Faauta, ou te fai atu, ua fetalai mai Ieova, ma ou faafoisia mai i latou i lenei aai; latou te sii i ai le taua, latou le aea foi, ma susunuina i le afi; ou te tuuina atu foi o aai o Iuta, ia faatafunaina, ia leai sē nofo ai.