Read Samoan Old Version Bible – O LE TUSI PAIA IEREMIA, 35 Bible Online

IEREMIA, 35 - Samoan Old Version Bible – O LE TUSI PAIA bible

IEREMIA, 35

¹O le afioga na oo mai ia Ieremia mai ia Ieova, i ona po o Ioakima le atalii o Iosia le tupu o Iuta, ua faapea mai,

²Ina alu ia oe i le aiga o sa Rakapā, ma tautala atu ia te i latou, ma au mai ia te i latou i le fale o Ieova, i se tasi potu, ma avatu ia te i latou le uaina e inu ai.

³Ona ou ave ai lea o Iaasenaia le atalii o Ieremia, le atalii o Havasinia, ma ona uso, ma ona atalii uma, ma le aiga uma o sa Rakapā;

⁴ma ou au mai ia te i latou i le fale o Ieova, i le potu o atalii o Hanana le atalii o Iketalia, o le tagata o le Atua, sa tuaoi ma le potu o alii, na i ai i luga o le potu o Maaseia le atalii o Saluma, o le leoleo o le faitotoa;

⁵ona ou tuuina atu lea i luma o le fanauga a le aiga o sa Rakapā o ipu faaofuofu ua tutumu i uaina, ma ipu e inu ai; ma a‘u fai atu ia te i latou, Ia outou feinu i le uaina.

⁶A ua latou fai mai, Matou te le inu uaina; auā na poloai mai ia te i matou o Ionatapa le atalii o Rakapa, o lo matou tamā, ua faapea mai, Aua tou te inu uaina, o outou, ma o outou fanau, e oo i le faavavau;

⁷aua foi tou te fai se fale, aua tou te lulu saito, aua tou te totō se tovine, aua foi ne‘i ia te outou ia mea; auā e nonofo outou i fale ie i o outou aso uma; ina ia tele ni aso e ola ai outou i le laueleele tou te āumau ai.

⁸Ua matou usiusitai i le upu a Ionatapa le atalii o Rakapa, lo matou tamā, i mea uma na ia poloai mai ai ia te i matou, aua matou te inu uaina i o matou aso uma, o i matou, ma a matou avā, o matou atalii foi, ma o matou afafine;

⁹aua foi matou te fai fale e nonofo ai; e le ia te i matou foi se tovine, po o se fanua, po o saito;

¹⁰a ua matou nonofo i fale ie; ua matou usiusitai, ma matou faia e tusa ma mea uma na poloai mai ai Ionatapa lo matou tamā ia te i matou.

¹¹Na oo foi ina sau o Nepukanesa le tupu o Papelonia i le nuu, ona matou faapea ai lea, Ina o mai ia, se‘i tatou o i Ierusalema auā o ‘au a Kaletaia, ma ‘au a Suria; o le mea lea ua matou nonofo ai i Ierusalema.

¹²Ona oo mai ai lea o le afioga a Ieova ia Ieremia, ua faapea mai,

¹³O loo faapea ona fetalai mai o Ieova o ‘au, le Atua o Isaraelu, Ia e alu, ma e fai atu i tagata o Iuta, ma e o nonofo i Ierusalema, E le talia ea e outou mea ua a‘oa‘oina atu, ia faalogo ai i a‘u upu? ua fetalai mai ai Ieova.

¹⁴O upu a Ionatapa le atalii o Rakapa, na ia poloai atu ai i ona atalii, e aua le inu uaina, ua tausia lava, ua latou le inu ai ua oo lava i le aso nei, auā ua latou usiusitai i le poloaiga a lo latou tamā; a o a‘u nei, ua ou fai atu ia te outou, ua ou ala fai atu lava; a ua outou le faalogo mai ia te au.

¹⁵Ua ou aauina atu foi ia te outou o a‘u auauna uma o perofeta, ua ou ala aauina lava i latou, ua faapea atu, Ia outou toe foi mai taitasi le tagata ai lona ala leaga, ia outou sauni lelei foi a outou amioga, aua foi tou te mulimuli atu i atua ese e auauna i ai, ona nonofo ai lea o outou i le laueleele na ou foaiina atu ai ia te outou ma o outou tamā; a ua le uai mai o outou taliga, ma outou le faalogo mai ia te au.

¹⁶Auā ua tausia e atalii o Ionatapa le atalii o Rakapa le poloaiga a lo latou tamā, na ia poloai atu ai ia te i latou; a o lenei nuu, ua latou le faalogo lava ia te au;

¹⁷o le mea lea o loo faapea ona fetalai mai ai o Ieova, le Atua o ‘au, le Atua o Isaraelu, Faauta, ou te faaoo ia Iuta, ma i latou uma o e nonofo i Ierusalema, le malaia uma na ou fai atu ai e oo ia te i latou; auā na ou fai atu ia te i latou, a ua latou le faalogo mai; na ou valaau foi ia te i latou, a ua latou le tali mai.

¹⁸Ua fai atu foi Ieremia i le aiga o sa Rakapā, O loo faapea ona fetalai mai o Ieova o ‘au, le Atua o Isaraelu, Ua outou usiusitai i le poloaiga a Ionatapa lo outou tamā, ma ua outou tausia ana poloaiga uma, ma ua outou faia e tusa ma mea uma na ia poloai mai ai ia te outou;

¹⁹o le mea lea o loo faapea ona fetalai mai ai o Ieova o ‘au, le Atua o Isaraelu, E le motu le gafa o Ionatapa le atalii o Rakapa, a e tu mai sona tagata i o‘u luma i aso uma lava.