Read Samoan Old Version Bible – O LE TUSI PAIA IEREMIA, 36 Bible Online

IEREMIA, 36 - Samoan Old Version Bible – O LE TUSI PAIA bible

IEREMIA, 36

¹O le fa o tausaga o Ioakima le atalii o Iosia le tupu o Iuta, na oo mai ai lenei afioga ia Ieremia mai ia Ieova, ua faapea mai,

²Ia e ave se tusi taai, ma e tusi i ai upu uma ua ou fai atu ai ia te oe ia Isaraelu, ma Iuta, ma nuu uma, e afua i ona po na ou tautala atu ai ia te oe, ona po lava o Iosia, e oo i le aso nei.

³Atonu e faalogo le aiga o Iuta i le malaia uma ou te manatu e faaoo ia te i latou; ina ia latou toe foi mai, taitasi le tagata ai lona ala leaga, ma ou faamagaloina atu i la latou amioletonu ma la latou agasala.

⁴Ona valaau ai lea o Ieremia ia Paruka le atalii o Neria; ua tusia foi i le tusi taai e Paruka mai le fofoga o Ieremia o afioga uma a Ieova, na ia fetalai mai ai ia te ia.

⁵Ua fai atu foi Ieremia ia Paruka, ua faapea atu, Ua puipuia a‘u; ou te le mafai ona alu atu i le fale o Ieova;

⁶a ia e alu, ma faitau i le tusi taai, ua e tusia mai lo‘u gutu, o afioga a Ieova i luma o le nuu i le fale o Ieova i le aso e anapopogi ai; e te faitauina foi i luma o Iuta uma o e o mai mai o latou aai.

⁷Atonu latou te faapauu ma tatalo i luma o Ieova, ma latou toe foi mai, taitasi le tagata ai lona ala leaga; auā ua tele le tiga ma le toasa ua fetalai mai ai Ieova i lenei nuu.

⁸Ua faia foi e Paruka le atalii o Neria e tusa ma mea uma na fai atu ai Ieremia le perofeta; ua ia faitau i le tusi o afioga a Ieova i le fale o Ieova.

⁹O le lima o tausaga o Ioakima le atalii o Iosia le tupu o Iuta, o le iva o masina, ua latou tala‘i atu ai le anapogi i luma o Ieova i tagata uma o i Ierusalema, ma tagata uma na o mai i Ierusalema mai aai o Iuta.

¹⁰Ona faitau ai lea o Paruka i le tusi, a o faalogo ai le nuu uma, o upu a Ieremia i le fale o Ieova, i le potu o Kimaria le atalii o Safana le tusiupu, i le lotoā i luga, i le mea e ui ai i le faitotoa fou o le fale o Ieova.

¹¹Ua faalogo Mekaio le atalii o Kimaria, le atalii o Safana, i afioga uma a Ieova nai le tusi;

¹²ona alu ifo ai lea o ia i le fale o le tupu, i le potu o le tusiupu; faauta foi, sa nonofo ai o alii uma, o Elisama le tusiupu, ma Tilaia le atalii o Semaia, ma Elenatana le atalii o Akepora, ma Kimaria le atalii o Safana, ma Setekaia le atalii o Hanania, ma alii uma.

¹³Ona ta‘u atu ai lea e Mekaio ia te i latou o upu uma na ia faalogo ai, ina o faitau e Paruka le tusi i luma o le nuu.

¹⁴Ona auina atu ai lea e alii uma o Ieuti le atalii o Netania, le atalii o Selemia, le atalii o Kusi, ia Paruka, ua faapea atu, Ia e au mai i lou lima le tusi taai sa e faitauina i luma o le nuu, ma e sau. Ona ave ai lea e Paruka le atalii o Neria le tusi taai i lona lima, ma ua alu atu ia te i latou.

¹⁵Ona latou fai mai ai lea ia te ia, Se‘i e nofo i lalo, ma faitau mai a o matou faalogo atu. I le ua faitau ai e Paruka o faalogo mai i latou.

¹⁶Ua latou faalogo i ia upu uma, ona latou fefefe ai lea, o le tasi ma le tasi, ma latou fai mai ia Paruka, Matou te ta‘u atu lava ia upu uma i le tupu.

¹⁷Ua latou fesili mai foi ia Paruka, ua faapea mai, Ina ta‘u mai ia ia te i matou, pe na faapefea ea ona e tusia o ia upu uma mai lona fofoga?

¹⁸Ona fai atu ai lea o Paruka ia te i latou, Na ia fai mai ia te au ia upu uma ai ona fofoga, ona ou tusia ai lea i le tusi i le vaitusi.

¹⁹Ona fai mai ai lea o alii ia Paruka, Ina alu ia, lua te lalafi, oulua ma Ieremia, aua ne‘i iloa e se tasi po o fea lua te i ai.

²⁰Ua latou o atu i le tupu i le lotoā, a ua latou tuu le tusi taai i le potu o Elisama le tusiupu; ua latou faaali atu foi ia upu uma i luma o le tupu.

²¹Ona auina atu ai lea e le tupu o Ieuti e aami atu le tusi taai; i le ua au mai ai e ia ai le potu o Elisama le tusiupu; ona faitau ai lea e Ieuti i luma o le tupu, ma luma o alii uma o e na tutū i tafatafa o le tupu.

²²Sa nofo foi le tupu i le fale o le tau maalili i le iva o masina, sa mu foi le afi i le taigaafi i ona luma.

²³Ua oo ina ua faitaulia e Ieuti ni atu upu se tolu pe fa, ona titipi ai lea e ia i le polo o le tusi upu, ma na lafo i le afi sa i le taigaafi, ua oo ina faaumatia le tusi taai uma i le afi sa i le taigaafi.

²⁴E lei fefefe i latou, e lei saeia foi e i latou o latou ofu, o le tupu, ma ana auauna uma, na faalogo i ia upu uma.

²⁵A e peitai na aioi atu Elenatana, ma Tilaia, ma Kimaria i le tupu, aua na te susunuina le tusi taai; a e lei faalogo o ia ia te i latou.

²⁶A ua fai atu le tupu ia Ieramaelu le atalii o le tupu, ma Seraia le atalii o Aserielu, ma Selemia le atalii o Apitelu, latou te pupue ia Paruka le tusiupu, ma Ieremia le perofeta; a ua natia i laua e Ieova.

²⁷Ona oo mai ai lea o le afioga a Ieova ia Ieremia, ina ua uma ona susunuina e le tupu o le tusi taai, ma upu na tusia e Paruka mai le gutu o Ieremia, ua faapea mai,

²⁸Ina toe ave ia e oe se isi tusi taai, ma e tusi i ai upu muamua uma na i ai i le tusi taai muamua, na susunuina e Ioakima le tupu o Iuta.

²⁹E te fai atu foi ia Ioakima le tupu o Iuta, O loo faapea ona fai mai o Ieova, Ua e susunuina lena tusi taai, ua e faapea mai, Se a ea le mea na e tusia ai, ua faapea, E sau lava le tupu o Papelonia, ma faaumatia lenei nuu, ma aveeseina ai tagata atoa foi ma manu?

³⁰O le mea lea o loo faapea ona fetalai mai o Ieova ia Ioakima le tupu o Iuta, E le ia te ia se tasi e tietie i le nofoālii o Tavita; e tuulafoaiina foi lona tino ua oti i le vevela i le ao, ma le mālulu i le po.

³¹Ou te taui atu foi ia te ia, ma ana fanau, ma ana auauna, a latou amioletonu; ou te faaoo foi ia te i latou, ma e o nonofo i Ierusalema, ma tagata o Iuta, le malaia uma na ou fai atu ai ia te i latou; a ua latou le faalogo mai.

³²Ona ave ai lea e Ieremia o se isi tusi taai, ma na avatu ai i le tusiupu, o Paruka le atalii o Neria; ua tusi i ai foi e ia mai le gutu o Ieremia, o upu uma o le tusi na susunuina i le afi e Ioakima le tupu o Iuta; ua toe faaopoopoina foi i ai nisi upu faapea e tele.