Read Samoan Old Version Bible – O LE TUSI PAIA IEREMIA, 37 Bible Online

IEREMIA, 37 - Samoan Old Version Bible – O LE TUSI PAIA bible

IEREMIA, 37

¹Ua pule foi Setekaia le tupu le atalii o Iosia e sui a‘i Konia le atalii o Ioakima, ua tofia foi o ia e fai ma tupu i le nuu o Iuta e Nepukanesa le tupu o Papelonia.

²A e le faalogo o ia, po o ana auauna, po o tagata o le nuu, i afioga a Ieova, na ia fetalai mai i le perofeta o Ieremia.

³Ua auina mai e Setekaia le tupu o Iukali le atalii o Selemia, ma Sefanaia le atalii o Maaseia le faitaulaga, ia Ieremia le perofeta, ua faapea mai, Ia e faatoga mo i matou ia Ieova lo tatou Atua.

⁴A ua fealuai faasa‘oloto Ieremia i le nuu; auā e lei tuuina atu o ia e i latou i le fale puipui.

⁵Ua o mai le itu taua a Farao mai Aikupito; ua faalogo foi Kaletaia e na vagaia Ierusalema i le tala ia te i latou, ona latou o ese ai lea i Ierusalema.

⁶Ona oo mai ai lea o le afioga a Ieova ia Ieremia le perofeta, ua faapea mai,

⁷O loo faapea ona fetalai mai o Ieova, le Atua o Isaraelu, Ia faapea ona outou fai atu i le tupu o Iuta, o le na auina mai outou ia te au e fesili mai ia te au, Faauta, o le itu taua a Farao, o loo ua o mai e fesoasoani ia te outou, e foi atu i latou i lo latou nuu o Aikupito.

⁸A e toe foi mai Kaletaia, ma latou tau ma le aai nei, e aea ai foi e i latou, ma latou susunuina ai i le afi.

⁹O loo faapea ona fetalai mai o Ieova. Aua ne‘i olegia outou e outou, e faapea, E matuā o ese Kaletaia ia te i tatou; auā latou te le o ese lava.

¹⁰Auā pe afai ana fāsia e outou le itu taua uma a Kaletaia o e ua tau ma outou, ma ua totoe ia te i latou na o tagata manunua, latou te tutū taitasi i lona fale ie, ma latou susunuina lenei aai i le afi.

¹¹Ua o ese le itu taua a Kaletaia i Ierusalema ona o le itu taua a Farao,

¹²ona alu atu ai lea o Ieremia nai Ierusalema, e alu i le nuu o Peniamina, ia maua e ia lona tofi i lea mea i totonu o le nuu.

¹³Ua i ai foi o ia i le faitotoa o Peniamina, ua i ai foi le alii leoleo, o lona igoa o Iria, le atalii o Selemia, o le atalii o Hanania; ona pue ai lea o ia ia Ieremia le perofeta, ua faapea atu, O le a e sola ia Kaletaia.

¹⁴A ua fai atu Ieremia, Tala pepelo; ou te le sola ia Kaletaia. A e le faalogo o ia ia te ia; a ua pue Iria ia Ieremia, ma au mai ia te ia i alii.

¹⁵Ua ita foi alii ia Ieremia, ma latou fasi ia te ia, ma tuuina atu o ia i le fale puipui i le fale o Ionatana le tusiupu; auā na latou faia lea ma fale puipui.

¹⁶Ua ulu atu Ieremia i le fale puipui i ana lava ua i ai, ua nofo foi Ieremia i lea mea i aso e tele;

¹⁷ona aau mai lea e Setekaia le tupu nisi e aami ia te ia; ua fesili faalilolilo foi le tupu ia te ia i lona fale, ua faapea mai, Pe ai ea se afioga mai ia Ieova Ona fai atu ai lea o Ieremia, E i ai lava; ua fai atu foi o ia, E tuuina oe i le lima o le tupu o Papelonia.

¹⁸Ua fai atu foi Ieremia ia Setekaia le tupu, Se a ea se mea ua ou agaleaga ai ia te oe, po o au auauna, po o lenei nuu, ina ua outou tuuina o a‘u i le fale puipui?

¹⁹O fea o i ai foi a outou perofeta, na vavalo ia te outou, ua faapea, E le sau le tupu o Papelonia e tau ma outou ma le nuu nei?

²⁰O lenei, le alii e le tupu, ia e faafofoga mai, ia paū atu i ou luma la‘u faatoga; aua ne‘i e faafoi atu ia te au i le fale o Ionatana le tusiupu, ne‘i ou oti ai.

²¹Ona poloai ane lea o Setekaia le tupu ia latou tuuina o Ieremia i le lotoā o le fale puipui, ia avatu foi ia te ia i lea aso ma lea aso se potoi areto mai le ala o e fai areto, seia uma le areto uma lava o i le aai. Ona nofo ai lea o Ieremia i le lotoā o le fale puipui.