Read Samoan Old Version Bible – O LE TUSI PAIA IEREMIA, 39 Bible Online

IEREMIA, 39 - Samoan Old Version Bible – O LE TUSI PAIA bible

IEREMIA, 39

¹O le iva o tausaga o Setekaia le tupu o Iuta, o le sefulu o masina, na o mai ai Nepukanesa le tupu o Papelonia, ma lana itu taua uma, i Ierusalema, ma latou vagaia.

²O le tausaga o Setekaia e sefulu ma le tasi, o le fa o masina, ma le aso iva o le masina, na lepetia ai le aai.

³Ona o mai ai lea o alii uma ua i le tupu o Papelonia, ma latou nonofo i le faitotoa i totonu, o Nekala-saresa, o Samekanepo, o Sasekimo o le matai o eunuka, o Nekala-saresa o le matai o makoi, ma nisi alii uma ua i le tupu o Papelonia.

⁴Ua iloa i latou e Setekaia le tupu o Iuta, ma ‘au uma, ona latou sosola ai lea, ma latou tuua le aai i le po, ua ui i le ala o le fanua o le tupu i le faitotoa i le va o pa e lua; ua alu atu foi o ia i le ala i le eleele laugatasi.

⁵Ona tuliloa ai lea e le itu taua a Kaletaia ia te i latou, ua latou maua atu ia Setekaia i le eleele laugatasi o Ieriko; ua latou pue ia te ia, ona latou avatu ai lea o ia ia Nepukanesa le tupu o Papelonia i Ripelu, i le nuu o Amato, ona faasala ai lea o ia ia te ia.

⁶Ua fasiotia foi e le tupu o Papelonia o atalii o Setekaia i ona luma i Ripelu; ua fasiotia foi e le tupu o Papelonia o alii uma o Iuta.

⁷Ua ia faatauaso foi ia Setekaia, ma fusifusi ia te ia i faamau ‘apa memea e lua e ave ia te ia i Papelonia.

⁸Ua susunuina foi e Kaletaia le fale o le tupu, ma fale o le nuu i le afi, ma latou sŏloia le pa o Ierusalema.

⁹A o e na totoe o le nuu sa i ai pea i le aai, ma e na sosola na sosola ia te ia, ma e na totoe o le nuu sa i ai pea, na tāfea i latou i Papelonia e Nepusatana, lē pule i le ‘au e faafeao.

¹⁰A ua tuua i le nuu o Iuta e Nepusatana lē pule i le ‘au e faafeao, nisi o le nuu o e matitiva, e leai sa latou mea, ua ia foai atu foi ia te i latou o tovine ma fanua i lea aso.

¹¹Na poloai foi Nepukanesa le tupu o Papelonia ia Nepusatana lē pule i le ‘au e faafeao ia Ieremia, ua faapea atu,

¹²Ia e ave ia te ia, ia e tausi foi ia te ia, aua ne‘i fai se mea leaga ia te ia; a e pei ona fai mai o ia ia te oe, ia faapea ona e fai ia te ia.

¹³Ua aauina atu foi nisi e Nepusatana lē pule i le ‘au e faafeao, ma Nepusapana o le matai o eunuka, ma Nekala-saresa o le matai o makoi, ma alii uma ua i le tupu o Papelonia;

¹⁴ua latou aauina atu, ma latou aami atu ia Ieremia ai le lotoā o le fale puipui, ona latou tuuina atu lea o ia ia Ketalia le atalii o Aikamo, le atalii o Safana, ia na au mai ia te ia i le fale; ona nofo ai lea o ia faatasi ma le nuu.

¹⁵Na oo mai le afioga a Ieova ia Ieremia, ina o puipuia o ia i le lotoā o le fale puipui, ua faapea mai,

¹⁶Ina alu ia, ma e fai atu ia Epetemeleka le Aitiope, ia faapea atu, O loo faapea ona fetalai mai o Ieova o ‘au, le Atua o Isaraelu, Faauta, ou te faaoo a‘u upu i lenei aai ia malaia, a e le ina ia manuia; e oo foi ia i ou luma i lea aso.

¹⁷A e ou te laveai ia te oe i lea aso, o loo fetalai mai ai Ieova, e le tuuina foi oe i lima o tagata ua e fefe ai.

¹⁸Auā ou te faasaoina lava oe, e te le oti foi i le pelu, a e avea lou ola māu vete; auā ua e faatuatua ia te au, o loo fetalai mai ai Ieova.