Read Samoan Old Version Bible – O LE TUSI PAIA IEREMIA, 40 Bible Online

IEREMIA, 40 - Samoan Old Version Bible – O LE TUSI PAIA bible

IEREMIA, 40

¹O le afioga na oo mai ia Ieremia mai ia Ieova, ina ua mavae ona tuuina atu o ia mai Rama e Nepusatana lē pule i le ‘au e faafeao, ina o maua o ia e ia, a o fusifusia o ia i maea uamea faatasi ma le tafeaga uma a Ierusalema ma Iuta e na tāfea i Papelonia.

²Ona ave ai lea e lē pule i le ‘au e faafeao ia Ieremia, ma ua faapea mai ia te ia, O Ieova, lou Atua, na fetalai mai lenei malaia i lenei mea.

³O Ieova foi ua faaoo ai, ma na faia e pei ona fetalai mai ai o ia; auā na outou agasala ia Ieova, ma outou le faalogo i lona siufofoga, o le mea lea ua oo ai ia te outou lenei mea.

⁴O lenei, faauta mai, ua ou tatalaina oe i lenei aso ai maea uamea sa i ou lima. Afai e lelei ia te oe ona ta o ma a‘u i Papelonia, sau ia, ou te tausi ia te oe; a e afai e leaga ia te oe ona ta o ma a‘u i Papelonia, soia; ina vaai atu ia, o loo i ou luma le nuu uma; o le mea e lelei ma tatau ia te oe ona alu i ai, o le mea lea ia e alu i ai.

⁵A o lei tali atu o ia, na ia faapea mai, Ina foi atu ia ia Ketalia le atalii o Aikamo, o le atalii lea o Safana, o le ua tofia e le tupu o Papelonia e pule i aai o Iuta, ma ia e nofo ma ia faatasi ma le nuu; a le o lea, o le mea e tatau ia te oe ona e alu i ai, ina alu lava ia i ai. Ona foai mai ai lea ia te ia e lē pule i le ‘au e faafeao o mea e ‘ai, ma se mea alofa, ma na tuuina o ia e alu.

⁶Ona alu ai lea o Ieremia ia Ketalia le atalii o Aikamo i Mesepa; ua nofo foi ma ia, faatasi ma le nuu o e na totoe i le nuu.

⁷O alii uma na ave ‘au o e sa i le vao, o i latou ma o latou tagata, ua faalogo i latou ua tofia e le tupu o Papelonia o Ketalia le atalii o Aikamo e pule i le nuu, ua na tofia foi o ia e pule i tane, ma fafine, ma tama iti, o isi foi o e matitiva o le nuu, o i latou na le tāfea i Papelonia;

⁸ona latou o mai ai lea ia Ketalia i Mesepa, o Isamaeli le atalii o Netanaia, ma Ioanana ma Ionatana o atalii o Karea, ma Seraia le atalii o Tanumeta, o atalii foi o Efai le Netopa, ma Iaasenaia le atalii o le Maaka, o i latou ma o latou tagata.

⁹Ona tauto ai lea o Ketalia le atalii o Aikamo, le atalii o Safana ia te i latou ma o latou tagata, ua faapea atu, Aua tou te fefefe i auauna ia Kaletaia; ia outou nonofo i le nuu, ma auauna i le tupu o Papelonia, ona manuia ai lea o outou.

¹⁰O a‘u nei foi, faauta, ou te nofo i Mesepa, e tu ai i luma o Kaletaia o e o mai ia te i matou; a o outou, ia outou faapotopoto uaina, ma fua otata, ma suāuu, ma tuu ai i a outou fagu, ia outou nonofo foi i a outou aai ua outou maua.

¹¹O tagata Iuta uma foi na i ai i Moapi, ma le nuu o le fanauga a Amoni, ma Etoma, ma e na i ai i nuu uma, ua latou faalogo ua tuua e le tupu o Papelonia e na totoe o Iuta, ma ua tofia e ia e pule ia te i latou o Ketalia le atalii o Aikamo, le atalii o Safana;

¹²ona foi mai ai lea o Iuta uma i mea uma na tulia ai i latou, ma latou o mai i le nuu o Iuta ia Ketalia i Mesepa, ma latou faapotopoto i uaina ma fua otata e matua tele.

¹³O Ioanana foi le atalii o Karea, ma alii uma na ave ‘au, sa i le vao, ua latou o mai ia Ketalia ia Mesepa;

¹⁴ona latou fai mai lea ia te ia, Ua e silafia lava ea ua auina mai e Paaliso le tupu o le fanauga a Amoni, o Isamaeli le atalii o Netanaia e fasioti ia te oe? A e lei talia la latou tala e Ketalia le atalii o Aikamo.

¹⁵Ona fai faalilolilo mai ai lea o Ioanana le atalii o Karea ia Ketalia i Mesepa, ua faapea mai, Se‘i ou alu, ma ou fasi ia Isamaeli le atalii o Netanaia, e le iloa foi e se tasi; se a ea le mea na te fasioti ai ia te oe, e faataapeapeina ai Iuta uma ua faapotopotoina ia te oe, e faaumatia foi o Iuta ua totoe?

¹⁶Ona fai atu ai lea o Ketalia le atalii o Aikamo ia Ioanana le atalii o Karea, Aua e te fai lena mea; auā o le mea pepelo ua e fai mai ai ia Isamaeli.