Read Samoan Old Version Bible – O LE TUSI PAIA IEREMIA, 41 Bible Online

IEREMIA, 41 - Samoan Old Version Bible – O LE TUSI PAIA bible

IEREMIA, 41

¹Ua oo i le fitu o masina, ona o mai ai lea o Isamaeli le atalii o Netanaia, le atalii o Elisama, o le aiga to tino o le tupu, ma alii sa i le tupu, ma tagata e toasefulu faatasi ma ia, ia Ketalia le atalii o Aikamo i Mesepa; ua latou aai foi faatasi i lea mea i Mesepa.

²Ona tulai ai lea o Isamaeli le atalii o Netanaia, ma ia tagata e toasefulu na ia te ia, ma latou fasi ia Ketalia le atalii o Aikamo le atalii o Safana, i le pelu, na fasiotia e i latou o ia na tofia e le tupu o Papelonia e pule i le nuu.

³Ua fasia foi e Isamaeli o Iuta uma sa ia Ketalia i Mesepa, ma Kaletaia, o tagata tau, ua latou maua i lea mea.

⁴Ua oo i le lua o aso talu ona fasiotia e ia o Ketalia, ma ua le iloa e se tasi;

⁵ona o mai ai lea o tagata mai Sekema, ma Sailo, ma Samaria, o tagata e toavalugafulu, ua tafi a latou ‘ava, ma ua saei o latou ofu, ua selei foi i latou e i latou, sa i o latou lima o taulaga i mea e ‘ai ma pulu lipano, e avatua i le fale o Ieova.

⁶Ona alu atu ai lea ai Mesepa o Isamaeli le atalii e Netanaia, e faafetaiai ia i latou, ua savali ia ma tagi fano; ua oo ina fetaiai o ia ma i latou, ona fai atu ai lea o ia ia te i latou, Ina o mai ia ia Ketalia le atalii o Aikamo.

⁷Na oo foi i latou i totonu o le aai, ona fasiotia ai lea o i latou e Isamaeli le atalii o Netanaia ma lafo ia te i latou i totonu o le lua, o ia lava, ma tagata na ia te ia.

⁸A e peitai sa ia te i latou o tagata e taosefulu, na fai mai ia Isamaeli, Aua e te fasiotia i matou; auā ua ia te i matou mea ua natia i le vao, o saito, ma karite, ma suāuu, ma meli; ona tuu lea e ia, ua na le fasiotia i latou faatasi ma o latou uso.

⁹O le lua foi na lafo i ai e Isamaeli tino o tagata oti uma na ia fasia ona o Ketalia, o le lua lea na faia e Asa e tupu, ona o Paasa le tupu o Isaraelu; na faatumuina ai e Isamaeli le atalii o Netanaia i e na fasia.

¹⁰Ona ave ai lea faatagataotaua e Isamaeli o e na totoe uma o le nuu na i Mesepa, o afafine foi o le tupu, ma le nuu uma na totoe i Mesepa, na tuuina atu e Nepusatana le pule i le ‘au e faafeao ia Ketalia le atalii o Aikamo e pule ai; ua ave i latou faatagataotaua e Isamaeli le atalii o Netanaia, ua alu atu foi ia e sopoia atu i le fanauga a Amoni.

¹¹A ua faalogo e Ioanana le atalii o Karea, ma alii uma sa ia te ia na ave ‘au, i le leaga uma na faia e Isamaeli le atalii o Netanaia,

¹²ona latou ave ai lea o tagata uma, ma latou o e tau ma Isamaeli le atalii o Netanaia, na latou maua foi o ia e lata ane i le vai tele i Kipeona.

¹³Ua iloa e le nuu uma sa ia Isamaeli, o Ioanana le atalii o Karea, ma alii uma sa ia te ia na ave ‘au, ona latou fiafia ai lea.

¹⁴Ua liliu mai foi le nuu uma na ave faatagataotaua e Isamaeli ai Mesepa, ma latou foi mai, ma o mai ia Ioanana le atalii o Karea.

¹⁵A ua sola Isamaeli le atalii o Netanaia ma tagata e toavalu ai Ioanana, ua alu atu foi ia i le fanauga a Amoni.

¹⁶Ona ave ai lea e Ioanana le atalii o Karea, ma alii uma sa ia te ia na ave ‘au, o e na totoe uma o le nuu, o e na ia faafoisia mai ai ia Isamaeli le atalii o Netanaia nai Mesepa, ina ua uma ona fasia e ia o Ketalia le atalii o Aikamo, o toa malolosi, ma fafine, ma tama iti, ma eunuka, o e na ia faafoisia mai mai Kipeona;

¹⁷ona latou o ai lea, ma latou nonofo i le fale o Kimeama, o loo lata ane i Peteleema, o le a o atu lava i Aikupito,

¹⁸ona o Kaletaia; auā sa fefefe i latou ia te i latou, ona ua fasia e Isamaeli le atalii o Netanaia o Ketalia le atalii o Aikamo, o le na tofia e le tupu o Papelonia e pule i le nuu.