Read Samoan Old Version Bible – O LE TUSI PAIA IEREMIA, 44 Bible Online

IEREMIA, 44 - Samoan Old Version Bible – O LE TUSI PAIA bible

IEREMIA, 44

¹O le upu na oo mai ia Ieremia ia Iuta uma sa nonofo i le nuu o Aikupito, sa nonofo i Mekatala, ma Tapenesa, ma Nafi, ma le nuu o Patoro, ua faapea mai,

²O loo faapea ona fetalai mai o Ieova o ‘au, le Atua o Isaraelu, Ua outou vaaia le malaia uma na ou faaoo i luga o Ierusalema, ma luga o aai uma o Iuta; faauta foi, ua faatafunaina i le aso nei, e leai foi se tagata ua nofo ai;

³ona o a latou amio leaga na latou faia, e faaonoono mai ai ia te au, ina ua latou ō e faamu mea manogi e auauna ai i atua ese, o e na latou le iloa, o i latou, po o outou, po o outou tamā.

⁴Na a‘u aauina atu foi ia te outou a‘u auauna uma o perofeta, na ou ala aauina atu i latou, ua faapea atu, Aua lava ne‘i outou faia lena mea inosia, o le mea lava ou te ‘ino‘ino i ai.

⁵A e lei faalogo mai i latou, ma ua le uai mai o latou taliga, ina ia liliu mai i a latou amio leaga, aua le faamu mea manogi i atua ese.

⁶O lea ua liligiina ifo ai lo‘u ita ma lo‘u tiga, ma ua mu ai i aai o Iuta, ma ala o Ierusalema; ua faatafunaina foi ia, ua tuufua, e pei ona fai i le aso nei.

⁷O lenei, o loo faapea ona fetalai mai o Ieova, le Atua o ‘au, le Atua o Isaraelu, Se a le mea ua outou fai ai le leaga tele e malaia ai outou, ia faaumatia ia te outou le tane ma le fafine, o le tama itiiti ma le tama meamea, ai totonu o Iuta, ina ia le faatotoeina ni o outou;

⁸ina ua outou faaonoono mai ia te au i mea ua faia e o outou lima, ua faamu mea manogi i atua ese i le nuu o Aikupito, ua outou o i ai e āumau ai, ina ia faaumatia outou, ma ia fai outou ma faafanoga e fai a‘i luma foi i nuu uma o le lalolagi?

⁹Po ua galo ea ia te outou amio leaga a o outou tamā, ma amio leaga a tupu o Iuta, ma amio leaga a latou avā, ma o outou amio leaga, ma amio leaga a outou avā, na latou faia i le nuu o Iuta, ma ala o Ierusalema?

¹⁰E le tigaina o latou loto e oo i le aso nei, ma latou le fefefe, ma latou le savavali i la‘u tulafono, ma a‘u sauniga, na ou tuuina atu i o outou luma, ma luma o outou tamā.

¹¹O le mea lea o loo faapea ona fetalai mai ai o Ieova o ‘au, le Atua o Isaraelu, Faauta, ou te faasaga o‘u mata ia te outou e malaia ai outou, ina ia faaumatia Iuta uma.

¹²Ou te ave foi i e o totoe o Iuta, o e ua faasaga o latou mata e o atu i le nuu o Aikupito e āumau ai, e faaumatia foi i latou uma i le nuu o Aikupito; e oti i latou i le pelu ma le oge, e faaumatia i latou, o tagatānuu atoa ma alii; e oti i latou i le pelu ma le oge; e fai foi i latou ma faafanoga, ma mea e ofo ai, ma mea e fetuu ai, ma fai a‘i luma.

¹³Auā ou te taui atu i e o nonofo i le nuu o Aikupito, e pei ona ou taui atu i Ierusalema i le pelu, ma le oge, ma le faamai;

¹⁴o e na totoe o Iuta, na o mai e āumau i lenei mea i le nuu o Aikupito, e leai se tasi e sao pe totoe, e toe foi atu i le nuu o Iuta, o le mea ua latou mananao tele ai e toe foi atu e nonofo ai; auā e leai ni e foi atu, na o e sosola lava.

¹⁵Ona tali mai ai lea ia Ieremia o tagata uma o e na iloa ua faamuina mea manogi e a latou avā i atua ese, ma fafine uma na tutū mai, o le faapotopotoga tele, o le nuu uma foi sa nonofo i le nuu o Aikupito, i Patoro, ua faapea mai,

¹⁶O le upu ua e fai mai ai ia te i matou i le suafa o Ieova, matou te le faalogo ai lava ia te oe;

¹⁷a e peitai matou te faia lava mea uma ua matou fai atu ai, e faamu mea manogi i le tupu fafine o le lagi, ma sasaa i ai taulaga i mea e inu, e pei ona matou faia, o i matou, ma o matou tamā, o matou tupu, ma o matou alii, i aai o Iuta, ma ala o Ierusalema; auā o ona po ia sa maoona ai i matou i mea e ‘ai, sa manuia foi, ma matou le iloa se malaia.

¹⁸A e talu ina matou tuua ona faamu o mea manogi i le tupu fafine o le lagi, ma sasaa atu ia te ia taulaga i mea e inu, ua matou matitiva i mea uma, ua faaumatia foi i matou i le pelu ma le oge.

¹⁹Na matou faamu mea manogi i le tupu fafine o le lagi, ma matou sasaa ia te ia taulaga i mea e inu, sa le i ai ea a matou tane ina ua matou faia mo ia ni faapāpā areto e auauna ia te ia, ma matou sasaa ia te ia taulaga i mea e inu?

²⁰Ona fai atu ai lea o Ieremia i le nuu uma, o tane, ma fafine, ma le nuu uma e na tali mai ia te ia i lea upu, ua faapea atu,

²¹O mea manogi na outou faamuina i aai o Iuta, ma ala o Ierusalema, o outou, ma o outou tamā, ma o outou tupu, ma o outou alii, ma tagata o le nuu na le manatua ea e Ieova lea mea? na le mafaufau ea o ia i ai?

²²Na le toe lavā onosai Ieova, ona o le leaga o a outou amioga, ona o mea inosia na outou faia; o le mea lea ua fai ai lo outou nuu ma mea gaogao, ma mea e ofo ai, ma faafanoga, e leai sē nofo ai, e pei ona fai i le aso nei.

²³Auā ua outou faamu mea manogi, auā foi ua outou agasala ia Ieova, ma ua outou le faalogo i le siufofoga o Ieova, ma outou le savavali i lana tulafono, ma ana sauniga, ma ana poloaiga; o mea ia ua oo ai lenei malaia ia te outou, e pei ona fai i le aso nei.

²⁴Ua fai atu foi Ieremia i le nuu uma, ma fafine uma, Ina faalogologo mai ia i le afioga a Ieova, o outou Iuta uma, o i le nuu o Aikupito;

²⁵o loo faapea ona fetalai mai o Ieova o ‘au, le Atua o Isaraelu, ua faapea mai, O outou ma a outou avā, ua outou tautala mai i o outou gutu, ua faataunuuina foi i o outou lima, ua faapea mai, Matou te faia lava a matou tautoga ua matou tauto ai, e faamu mea manogi i le tupu fafine o le lagi, ma sasaa ia te ia taulaga i mea e inu; e faatumauina lava e outou a outou tautoga, e matuā faia foi e outou a outou tautoga.

²⁶O le mea lea ia faalogologo mai i le afioga a Ieova, o outou Iuta uma o e o nonofo i le nuu o Aikupito; Faauta, ua ou tauto a‘u i lo‘u igoa tele, o loo fetalai mai ai Ieova, e le toe ta‘ua lo‘u igoa i le gutu o se tasi tagata o Iuta o loo i ai i le nuu o Aikupito uma, e faapea, O loo soifua le Alii o Ieova.

²⁷Faauta, ou te mataala ia malaia i latou, a e le ina ia manuia; e faaumatia tagata uma o Iuta o e o i le nuu o Aikupito i le pelu, ma le faamai, seia faaumatia lava i latou.

²⁸A o e sao i le pelu latou te foi atu nai le nuu o Aikupito i le nuu o Iuta, e toaitiiti i latou; e iloa foi e Iuta uma o e totoe, e ua o atu i le nuu o Aikupito e āumau ai, po o upu a ai e taunuu, po o a‘u, po o a latou.

²⁹O lenei foi le faailoga ia te outou, ua fetalai mai ai Ieova, e tauia outou e a‘u i lenei mea, ina ia outou iloa e matuā taunuu a‘u upu ia te outou ia malaia ai outou.

³⁰O loo faapea ona fetalai mai o Ieova, Faauta, ou te tuuina atu Farao Hofero le tupu o Aikupito i lima o e ua ita mai ia te ia, ma lima o e saili e fasioti ia te ia; e pei ona ou tuuina atu o Setekaia le tupu o Iuta i le lima o Nepukanesa le tupu o Papelonia, o le na ita mai ia te ia, ma na saili e fasioti ia te ia.