Read Samoan Old Version Bible – O LE TUSI PAIA IEREMIA, 46 Bible Online

IEREMIA, 46 - Samoan Old Version Bible – O LE TUSI PAIA bible

IEREMIA, 46

¹O le afioga a Ieova na oo mai ia Ieremia le perofeta i mea a oo i nuu ese,

²o Aikupito ma le itu taua a Farao Neko le tupu o Aikupito, sa latalata ane i le vaitafe o Eufirate i Karekimisa, o e na fasia e Nepukanesa le tupu o Papelonia i le fa o tausaga o Ioakima le atalii o Iosia le tupu o Iuta.

³Ina sauni ia e outou le talita ma le talipupuni, ma faalatalata atu i le taua.

⁴Ina nonoa ia solofanua i kariota; ma ia tietie outou i solofanua, ma tutū atu ma o outou puloutau; ina faapupula ia o tao, ma ia oofu i ofutau uamea.

⁵O le a ea le mea ua ou iloa atu ai i latou ua matautuia? Ua liutuaina, ua fasia foi o latou toa, ma ua alu lo latou tuli, ua latou le tepa i tua; o i ai le mata‘u i itu uma, ua fetalai mai ai Ieova.

⁶E le sola le tagata tele vave, e le sao foi le toa; e tausuai i latou, ma latou pauu i le itu i matu, e lata ane i le vaitafe o Eufirate.

⁷O ai ea lenei ua alu ae e pei ona oso o se vaitafe, ua fāti tetele mai lona vai e pei o tafega?

⁸O loo alu ae Aikupito e pei ona oso o se vaitafe, ua fāti tetele mai lona vai e pei o tafega; ua faapea foi o ia, Ou te alu ae, ou te ufitia le lalolagi; ou te faaumatia le aai, ma e o nonofo ai.

⁹Ina tietie ia outou i solofanua; ma ia matuā feasofai kariota; ina o atu ia o toa; o tagata Aitiope, ma Futu, o e masani ma le talita; ma Luti, o e masani ona lolo‘u o le aufana.

¹⁰Auā o le aso lenei o le Alii o Ieova o ‘au, o le aso o le taui ma sui, e taui atu ai i e ua ita ia te ia; e ‘ai foi le pelu, ma ma‘ona, ma onā i o latou toto; auāo loo i le Alii o Ieova o ‘au ona fai o le taulaga i le nuu i le itu i matu e lata ane i le vaitafe o Eufirate.

¹¹Le taupou e, le tama teine a Aikupito, ina alu ae ia oe i Kiliata, ma au mai pulu pasama; ua e faateleina vailaau a e fai fua; e leai se togafiti e malolo ai oe.

¹²Ua lagona e nuu ese lou faamaina, ua tumu foi le lalolagi i lau alaga; auā ua tausuai le toa i le toa, ua pauu faatasi i laua.

¹³O le afioga na fetalai mai ai Ieova ia Ieremia le perofeta, ina ua sau o Nepukanesa le tupu o Papelonia e fasi le nuu o Aikupito.

¹⁴Ia outou ta‘u atu i Aikupito, ma faailoa atu i Mekatala, ma faailoa atu i Nafi, ma Tapanesa; ia outou faapea atu, Ina tu mai ia, ma ia e sauni; auā e ‘ai e le pelu i ou itu uma.

¹⁵O le a ea le mea ua taatitia ai e ua malolosi ua ia te oe? e lei tutū i latou, auā ua tuleia i latou e Ieova.

¹⁶Ua faatoateleina e ia o e ua tausuai, ua pauu lava i latou le tasi i luga o le tasi; ona latou faapea ai lea, Ina tulai ia, se‘i tatou foi atu i lo tatou nuu, ma le laueleele na fananau ai i tatou, ona o le pelu saua.

¹⁷Na latou alalaga i lea mea, O Farao le tupu o Aikupito, ua malaia, ua mavae ona po na atofaina.

¹⁸O loo fetalai mai le Tupu, o Ieova o ‘au lona suafa, Ou te ola a‘u, e sau ia, e pei o Tapora i le atu mauga, ma Karamelu i tai.

¹⁹O oe na le tama fafine ua nofo i Aikupito, ina sauni ia o mea e alu ma oe i le tafeaga; auā e gaogao Nafi, ma faatafunaina, e leai se nofo ai.

²⁰O Aikupito o le povi fafine e matuā tino lelei, a e oo mai lava le malaia mai le itu i matu.

²¹O ona tagata foi na faaoloatauaina, o loo i totonu ia te ia e pei ni povi ai le fale povi; a ua liutuaina lava i latou, ua latou sosola faatasi, ua latou le tutū; auā ua oo mai ia te i latou le aso o lo latou malaia, o ona po e asia mai ai i latou.

²²E alu atu lona leo e pei se gata; auā latou te o mai ma ‘au, ma latou o mai ia te ia ma mătau, e pei o tagata ta laau.

²³Latou te ta lona vao, ua fetalai mai ai Ieova, auā e le masuesueina; auā e sili ona tele i latou i sē akerise, e le mafaitaulia foi i latou.

²⁴Ua faamaina le tama fafine a Aikupito; e tuuina atu foi o ia i lima o tagata mai le itu i matu.

²⁵O loo fetalai mai Ieova o ‘au, le Atua o Isaraelu, Faauta, ou te taui atu ia Amoni i No, ma Farao, ma Aikupito, ma ona atua, ma ona tupu; o Farao lava, ma i latou o e faatuatua ia te ia;

²⁶ou te tuuina atu foi i latou i lima o e saili e fasioti ia te i latou, ma le lima o Nepukanesa le tupu o Papelonia, ma lima o ana auauna; e mulimuli ane ona toe āina ai lea, e pei o ona po anamua, ua fetalai mai ai Ieova.

²⁷A o oe; Iakopo e, la‘u auauna, aua e te fefe; aua foi e te mata‘u o oe Isaraelu e, auā faauta, ou te faaola ia te oe ai le nuu mamao, ma lau fanau ai le nuu ua tāfea ai i latou; e foi mai lava Iakopo, e toto‘a foi o ia ma nofo filemu, e leai foi se tasi e faamatau ia te ia.

²⁸O oe Iakopo e, la‘u auauna, ua fetalai mai Ieova, aua e te fefe; auā ou te ia te oe; e ui lava ina ou matuā faaumatia nuu uma ua ou tulia ai oe, a e ou te le matuā faaumatia oe; ou te aoai faatatau foi ia te oe, a e ou te le matuā faasaoina oe.