Read Samoan Old Version Bible – O LE TUSI PAIA IEREMIA, 47 Bible Online

IEREMIA, 47 - Samoan Old Version Bible – O LE TUSI PAIA bible

IEREMIA, 47

¹O le afioga a Ieova ua oo mai ia Ieremia le perofeta ia Filisitia, a o le fasia Kasa e Farao.

²O loo faapea ona fetalai mai o Ieova, Faauta, e oso mai le vai mai le itu i matu, e fai foi ma vaitafe e lofia ai; e lofia ai le nuu, ma mea ua tumu ai, o le aai foi, ma e o nonofo ai; ona alalaga ai lea o tagata, ma uio atoa uma o e nonofo i le nuu.

³Ona o le pāō o le pāūū o atigivae o ona solofanua malolosi, ma le osooso o ona kariota, ma le taalili o ana mea taavavale, e le tetepa i tua o tamā i a latou fanau, auā e vaivai o latou lima;

⁴ona o le aso o le a oo mai e faatafunaina ai Filisitia uma, e vavaeeseina fesoasoani uma ua totoe i Turo ma Saitonu; auā e faatafunaina e Ieova o Filisitia, o e ua totoe o le nuu tuloto o Kafetori.

⁵Ua selemamāina ulu o e i Kasa; ua faaumatia Asekelona ma e o totoe i lo latou vanu; e te selei ea ia te oe seia afea?

⁶Aue! le pelu a Ieova e, e te le mapu ea seia afea? ia e foi atu i lou faamoega, ina malolo ia, ma ia e alāla.

⁷Pe faapefea ona e mapu? auā o Ieova ua ia fai atu i ai e tau ma Asekelona, ma nuu tu matafaga, ua ia totofi i ai i lea mea.