Read Samoan Old Version Bible – O LE TUSI PAIA IEREMIA, 50 Bible Online

IEREMIA, 50 - Samoan Old Version Bible – O LE TUSI PAIA bible

IEREMIA, 50

¹O le afioga na fetalai mai ai Ieova ia Papelonia ma le nuu o Kaletaia, na aumaia e le perofeta o Ieremia.

²Ina ta‘u atu ia outou i atu nuu, ma faailoa atu ai; sii i luga foi le tagavai; ina faailoa atu ia, aua le natia; ia outou faapea atu, Ua aea Papelonia, ua faamaina Pele, ua matautuia Merota; ua faamaina ona tupua, ua matautuia ana tupua.

³Auā e alu ae e tau ma ia le nuu ai le itu i matu, o le na te faia lona laueleele ma faatafunaga, e leai foi se nofo ai; ua sosola tagata atoa ma manu, ua latou ō.

⁴O na ona po, ma lena tausaga, ua fetalai mai Ieova, e o mai ai le fanauga a Isaraelu, o i latou ma le fanauga a Iuta faatasi, latou te fetagisi fano mai; latou te o ane, ma saili ia Ieova lo latou Atua.

⁵Latou te fesili i le ala i Siona, o faasaga mai iinei o latou mata, ua faapea, Ina o mai ia, se‘i faatasi atu i tatou ia Ieova i le feagaiga e faavavau, e le galo lava.

⁶O lo‘u nuu ua se lafu mamoe ua sē i latou; ua faaseseina i latou e o latou leoleo, ma latou faaliliuina i latou i le atu mauga; ua latou feoai i lea mauga ma lea mauga, ua galo ia i latou le mea sa latou taooto ai.

⁷O i latou uma na maua i latou, ua latou ‘aina i latou; na fai ane foi o e na saua mai ia te i latou, Matou te le nofo sala, auā ua latou agasala ia Ieova, o le mea e mau ai lē amiotonu, o Ieova, o le faamoemoe o latou tamā.

⁸Ina sosola ia ai totonu o Papelonia, ma o atu ai nai le laueleele o Kaletaia; ia outou faapei o ‘oti poa i luma o le lafu.

⁹Auā faauta, ou te faaosoina, ma aveina ae le faapotopotoga o atu nuu tetele mai le nuu i le itu i matu, e tau ma Papelonia; latou te sauniuni e tau ma ia; e aea foi o ia ai lena mea; o a latou u fanafana e pei o u fanafana a le toa poto; ua le foi fua mai.

¹⁰E fai foi Kaletaia ma vete; e malilie atoa uma o e vetea o ia, ua fetalai mai ai Ieova.

¹¹Auā na outou fiafia, auā na outou olioli, o outou na vetea lo‘u tofi; auā ua outou osooso e pei o le povi fafine i le vao, ma outou tagi e pei o solofanua malolosi;

¹²e matuā ma lo outou tinā; e masiasi lava le na fanauina outou; faauta, e fai le nuu aupito mulimuli ma vao lafulafua ma nuu naumati, ma toafa.

¹³E le āina ia ona o le toasa o Ieova, a e faatafunaina uma lava; o i latou uma o e ui ane i Papelonia e taitasi ma ofo, ma uisa i ona mala uma.

¹⁴Ina sauniuni ia outou e tau ma Papelonia i ona itu uma; o outou uma o e lolo‘u aufana, ina fanafana atu ia ia te ia, aua ne‘i tuu ni u fanafana; auā ua na agasala ia Ieova.

¹⁵Ia outou alalaga ia te ia i ona itu uma; ua na tuuina mai lona lima; ua pauu ona faavae, ua sŏloia ona pa; auā o le taui ma sui lenei a Ioeva; ia outou taui atu ia te ia; e pei ona faia e ia, ia faapea ona outou faia ia te ia.

¹⁶Ia vavaeeseina i Papelonia lē lulu saito, atoa foi ma lē tago i le selesaito, i ona po o le seleselega; latou te taitasi ma liliu i lona lava nuu, latou te taitasi foi ma sola i lona lava laueleele, ai luma o le pelu saua.

¹⁷O Isaraelu o le lafu mamoe o ia ua faataapeapeina; ua tulia o ia e leona; o lē na muai ‘ai ia te ia, o le tupu o Asuria lea; a o lē mulimuli, o lenei tupu o Papelonia o Nepukanesa lea, ua pagugu e ia ona ivi.

¹⁸O le mea lea o loo faapea ona fetalai mai ai o Ieova o ‘au, le Atua o Isaraelu, Faauta, ou te taui atu i le tupu o Papelonia ma lona nuu, e pei ona ou taui atu i le tupu o Asuria.

¹⁹Ou te faafoisia Isaraelu i le mea na ia mau ai; e ‘ai o ia i Karamelu ma Vasana, e ma‘ona foi o ia i le mauga o Efaraima ma Kiliata.

²⁰O na ona po, ma lena tausaga, ua fetalai mai Ieova e sailia ai le amioletonu a Isaraelu, a e leai; e sailia foi agasala a Iuta, a e le maua; auā ou te faamagaloina atu ia te i latou o e ua faatotoeina e a‘u.

²¹Ina alu ae ia i le nuu o Merataimo e tau ma ia, ma e o nonofo i Pekota; ia e faatafunaina ma matuā faaumatia o mulimuli atu ia te i latou, ua fetalai mai ai Ieova; ia e faia foi i ai e tusa ma mea uma na ou fai atu ai ia te oe.

²²O loo i le nuu le vāvāō o le taua, ma le olopalaina e tele.

²³E! ua gauia ma nutililiia le samala o le lalolagi uma. E! ua avea Papelonia ma mea e ofo ai i atu nuu.

²⁴Papelonia e, ua ou tuu le mailei mo oe, ua maua ai oe, a ua e le iloa; ua maua oe, ua puea foi, auā na e sii le taua ia Ieova.

²⁵Ua tatalaina e Ieova lana mea e teu ai auupega, ua na au mai ai auupega o lona toasa; auā o le galuega lena ua i le Alii o Ieova o ‘au i le nuu o Kaletaia.

²⁶Ina o mai ia ia te ia ai mea aupito mamao, ina tatalaina ia ona fale e tuu ai mea e ‘ai; ia outou faafaupue ia te ia ia pei o faupuegāsaito, ma matuā faaumatia o ia; aua ne‘i ai se mea e totoe ia te ia.

²⁷Ina faaumatia ia o ana povi poa taanoa uma, ia latou o ifo ia fasia; oi talofa ia te i latou! auā ua oo mai lo latou aso, o ona po e tauia ai i latou.

²⁸O le alaga o e ua sosola ma ua sao ai le nuu o Papelonia, e ta‘u atu i Siona le taui ma sui a Ieova lo tatou Atua, o le taui ma sui ona o lona malumalu.

²⁹Ia faalaei ‘au i e fanafana u e tau ma Papelonia, o i latou uma o e lolo‘u le aufana; ia outou to lauapi e vagavagai ia te ia, aua ne‘i ai sē sao; ia outou taui atu ia te ia e tusa ma ana galuega; e pei o mea uma na ia faia, ia faapea ona outou faia ia te ia; auā ua faamaualuga o ia ia Ieova, le Paia o Isaraelu.

³⁰O le mea lea e pauu ai o ona taulelea i ona malae, e fano foi i lea lava aso ona tagata tau uma, ua fetalai mai ai Ieova.

³¹O oe na le ua faamaualuga, faauta, ou te faia oe mo‘u fili, ua fetalai mai ai le Alii, o Ieova o ‘au; auā ua oo mai lou aso, o ona po ou te taui atu ai ia te oe.

³²E tausuai ma paū le ua faamaualuga, e leai foi se na te faatulai ia te ia; ou te faamuina le afi i ona aai, e susunuina ai ona itu uma.

³³O loo faapea ona fetalai mai o Ieova o ‘au, Na sauaina faatasi le fanauga a Isaraelu ma le fanauga a Iuta; o i latou uma e na avea i latou o tagata o taua na latou taofi mau ia te i latou; ua latou le mafafai ona tuuina i latou ia ō.

³⁴E malosi le na te togiolaina i latou, o Ieova o ‘au o lona suafa lea; e matuā faia e ia la latou finauga, ina ia faanofofilemuina e ia le lalolagi, ia faagateteina foi e o nonofo i Papelonia.

³⁵Ua fetalai mai Ieova, E oo le pelu ia Kaletaia, ma ē nonofo i Papelonia, ma ona alii, ma ona tagata popoto.

³⁶O le pelu i e pepelo, e faavālea foi i latou; o le pelu i ona toa, e matatau ai foi i latou.

³⁷O le pelu i ana solofanua, ma ona kariota, ma tagata eseese uma ua i totonu ia te ia; e avea foi i latou ma fafine; o le pelu i ana oloa, e vetea foi ia.

³⁸E oo le vevela i lona vai, ona mate ai lea; auā o le nuu lava lea o tupua ua ta, ua latou mitamita vale foi i mea matautia.

³⁹O le mea lea e nonofo ai manu feai o le vao, faatasi ma aie, e mau ai foi iaena; e le toe āina e faavavau; e le mau ai lava se tasi i lea tupulaga ma lea tupulaga.

⁴⁰E pei o le faaumatia e le Atua o Sotoma ma Komoro, ma e na latou tuaoi, o loo fetalai mai ai Ieova, e le nofo ai se tasi, e le mau ai foi se atalii o se tagata.

⁴¹Faauta, e o mai le nuu ai le itu i matu, o le nuu tele; e faaosoina foi tupu e toatele ai tuluiga o le lalolagi.

⁴²Latou te ‘u‘u le aufana ma le tao; ua saua i latou, ma latou le alolofa; e taalili o latou leo e pei o le sami, ua latou tietie i solofanua, o sauniuni e pei o tagata e ō i le taua, ina ia tau ma oe, le tama fafine Papelonia.

⁴³Ua faalogo le tupu o Papelonia i le tala ia te i latou, ona vaivai ai lea o ona lima; ua maua foi o ia i le puapuaga, o le tiga foi e pei o se fafine o le a fanau.

⁴⁴Faauta, e alu ae o ia e pei o le leona ai le matagofie o Ioritana, i le mea malosi e mau ai; a e ou te faaoso ia te i latou ia faavave ona o ese ia te ia, e pei o le emo o le mata; o ai foi le tagata filifilia ou te tofia e tau ma ia? auā po o ai ea e tusa ma a‘u? o ai foi e atofa ni aso ia te au? o ai foi lena leoleo mamoe e mafai ona tu i o‘u luma?

⁴⁵O le mea lea ia outou faalogologo mai ai i le pule a Ieova ua ia pule ai ia Papelonia, ma ona mafaufauga ua ia mafaufau ai ia leaga ai le nuu o Kaletaia, E moni, e tosina i latou e le aupito itiiti o le lafu mamoe; e moni, na te faatafunaina i o latou luga le mea e mau ai.

⁴⁶O le taalili ina ua maua Papelonia, ua luluina ai le lalolagi, ua lagona foi le alaga i nuu ese.