Read Samoan Old Version Bible – O LE TUSI PAIA IEREMIA, 52 Bible Online

IEREMIA, 52 - Samoan Old Version Bible – O LE TUSI PAIA bible

IEREMIA, 52

¹O le tausaga o Setekaia e luafulu ma le tasi na fai ai o ia ma tupu; e sefulu ma le tasi tausaga na fai ai o ia ma tupu i Ierusalema; o le igoa o lona tinā o Hamutala, le afafine o Ieremia le Lipena.

²Na ia faia le amio leaga i luma o Ieova, pei o mea uma na faia e Ioakima.

³Auā o le toasa o Ieova ia Ierusalema ma Iuta, ua iu ai ina lafoaiina i latou ai ona luma, na foua ai foi le tupu o Papelonia e Setekaia.

⁴O le iva o tausaga o lana nofoaiga o le sefulu o masina, o le aso e sefulu o le masina, na sau ai Nepukanesa, le tupu o Papelonia, i Ierusalema, o ia ma ana ‘au uma; ua to lauapi foi e tau ma ia, ua latou fai foi ‘olo e vagaia a‘i.

⁵Na vagaia le aai ua oo i le sefulu ma le tasi o tausaga o le tupu o Setekaia.

⁶O le fa o masina foi, o le aso iva o le masina na velavela ai le oge i le aai, ua leai foi se mea e ‘ai mā tagata o le nuu.

⁷Na lepetia le aai, ona sosola ai lea o ‘au uma, ma latou tuua le aai i le po, ua ui i le ala i le faitotoa i le va o pa e lua, e latalata i le fanua o le tupu; (na vagaia foi le aai e Kaletaia;) na latou o foi i le ala i le eleele laugatasi.

⁸Ona tuliloa ai lea e le itu taua a Kaletaia i le tupu, ma latou maua atu ia Setekaia i le eleele laugatasi o Ieriko; na taapeape foi lana itu taua uma na ia te ia.

⁹Ona latou pue ai lea i le tupu, ma avatu ia te ia i le tupu o Papelonia i Ripelu, i le nuu o Amato; ona faasala ai lea o ia ia te ia.

¹⁰Ua fasioti foi e le tupu o Papelonia i atalii o Setekaia i ona luma; ua ia fasioti foi i alii uma o Iuta i Ripelu.

¹¹Ua ia faatauaso foi ia Setekaia, ma fusifusi ia te ia i faamau ‘apa memea e lua; ua ave foi ia te ia e le tupu o Papelonia i Papelonia, ma na tuuina atu ia te ia i le fale puipui, ua oo lava i le aso na oti ai o ia.

¹²O le lima o masina, o le aso e sefulu o le masina, o le tausaga e sefulu ma le iva lea o le tupu o Nepukanesa, o le tupu o Papelonia, na sau ai i Ierusalema o Nepusatana, lē pule i le ‘au e faafeao, o le na tu i luma o le tupu o Papelonia;

¹³na ia susunuina le fale o Ieova, ma le fale o le tupu, atoa ma fale uma o Ierusalema; o fale tetele uma foi ua susunuina e ia i le afi.

¹⁴Na sŏloia foi pa uma na faataaliolioina ai Ierusalema e ‘au uma a Kaletaia, sa i le na pule i le ‘au e faafeao.

¹⁵O isi foi o e matitiva o le nuu, ma e na totoe o le nuu sa i ai pea i le aai, ma e na sosola, na sosola atu i le tupu o Papelonia, ma e na totoe o le vao tagata, na tāfea i latou e Nepusatana lē pule i le ‘au e faafeao.

¹⁶A ua tuua e Nepusatana lē pule i le ‘au e faafeao, nisi o e matitiva o le nuu, e fai ma teu vine, ma ē galulue i le fanua.

¹⁷O pou ‘apa memea foi sa i le fale o Ieova, ma tuugātanoa, atoa ma le vai ‘apa memea sa i le fale o Ieova, na taei e Kaletaia, ma latou ave le ‘apa memea uma i Papelonia.

¹⁸Na latou ave foi o ulo, ma suo, ma selelamepa, ma ipu, ma ipu e asu a‘i, atoa ma mea ‘apa memea uma lava na latou fai a‘i sauniga.

¹⁹O tanoa foi, ma salefu, ma ipu, ma ulo, ma tuugā lamepa, ma ipu e asu a‘i, ma ipu e sasaa a‘i; o le auro o mea na faia i auro, ma le ario o mea na faia i ario, na ave e le alii e pule i le ‘au e faafeao.

²⁰O pou e lua, o le vai e tasi, ma povi ‘apa memea e sefulu ma le lua sa i lalo, ma le tuugātanoa, na faia e le tupu o Solomona mo le fale o Ieova; ua le fuatia lava le mamafa o ‘apa memea o na mea uma.

²¹O pou foi, o le umi o le tasi pou o kupita e sefulu ma le valu; o le fua foi na faataaliolio ai, e sefulu ma le lua o kupita ia; o lona mafiafia e tusa lea ma le lautele o le alofilima; sa faaōō lava.

²²O le kapetala ‘apa memea foi na i ona luga; o le umi o le tasi kapetala e lima kupita, o le mea faaupega atoa ma rimoni sa i le kapetala e faataaliolio ai, o ‘apa memea uma ia; e faapei o ia mea foi sa i ai i lona lua o pou, atoa foi ma rimoni.

²³Na i ai foi rimoni e ivagafulu ma le ono i itu; o rimoni uma sa i luga o le mea faaupega, e tasi le selau o faataaliolio ai.

²⁴Na ave foi e le alii e pule i le ‘au e faafeao o Seraia le faitaulaga sili, ma Sefanaia le faitaulaga e aupito ane ia te ia, atoa ma leoleo o faitotoa e toatolu;

²⁵na ia ave foi nai le aai le tasi auauna sili na tofia e pule i ‘au; ma tagata e toafitu o e na iloa fofoga o le tupu, na maua i latou i le aai; ma le alii sili i e tusi‘au, o le na faapotopoto i tagata o le nuu; atoa ma tagata o le nuu e toaonogafulu, sa maua i latou i totonu o le aai.

²⁶Na ave foi i latou e Nepusatana lē pule i le ‘au e faafeao, ma na avatua i latou i le tupu o Papelonia i Ripelu.

²⁷Ona fasia ai lea o i latou e le tupu o Papelonia, ua na fasioti ia te i latou i Ripelu, i le nuu o Amato, na tāfea foi Iuta nai lo latou laueleele.

²⁸O le nuu lenei na tāfea ia Nepukanesa; o le fitu o tausaga na tāfea ai tagata Iuta e tolu o afe ma le toaluafulu ma le toatolu.

²⁹O le tausaga o Nepukanesa e sefulu ma le valu, na tāfea ai nai Ierusalema, o tagata e toavalugalau ma le toatolugafulu ma le toalua.

³⁰O le lua sefulu ma le tolu o tausaga o Nepukanesa na tāfea ai ia Nepusatana lē pule i le ‘au e faafeao, o tagata Iuta e toafitu galau ma le fa o sefulu ma le toalima. O le atoa o tagata e toafa gaafe ma le toaono galau.

³¹Ua oo i le tolugafulu ma le fitu o tausaga o le tafeaga a Ioakina le tupu o Iuta, o le sefulu ma le lua foi o masina, o le aso e luafulu ma le lima o le masina, ona faaeaina ai lea o le ulu o Ioakina le tupu o Iuta e Evilemarota, le tupu o Papelonia, i le tausaga na fai ai o ia ma tupu, ma na aumaia o ia nai le fale puipui;

³²na ia tautala ma le alofa ia te ia, ua tuu atu foi lona nofoālii ia sili i nofoālii o tupu na ia te ia i Papelonia;

³³na ia sui foi ona ofu sa ofu ai i le fale puipui; na ‘ai foi o ia e le aunoa i ona luma i aso uma o lona ola.

³⁴O lana tufaaga foi, o le tufaaga e le aunoa, na tuuina atu ia te ia e le tupu o Papelonia i lea aso ma lea aso, ua oo lava i le aso o lona oti, o aso uma o lona ola.