Read Samoan Old Version Bible – O LE TUSI PAIA IEREMIA, 7 Bible Online

IEREMIA, 7 - Samoan Old Version Bible – O LE TUSI PAIA bible

IEREMIA, 7

¹O le afioga na oo mai ia Ieremia mai ia Ieova ua faapea mai,

²Ina tulai ia i le faitotoa o le fale o Ieova, ma tala‘i atu ai lenei upu, ia faapea atu, Ina faalogologo mai ia i le afioga a Ieova, o outou o Iuta uma, o e ulu mai i nei faitotoa e ifo atu ai ia Ieova.

³O loo faapea ona fetalai mai o Ieova o ‘au, le Atua o Isaraelu, Ia outou sauni lelei i o outou ala ma a outou amio, ona ou faatumauina ai lea o outou i lenei mea.

⁴Aua tou te faatuatua i upu pepelo, o loo faapea, O le malumalu o Ieova, O le malumalu o Ieova, O le malumalu o Ieova lenei.

⁵Auā afai tou te matuā sauni lelei i o outou ala ma a outou amio; afai foi tou te matuā faia le faamasinoga i le tasi tagata ma le tasi tagata;

⁶afai foi tou te le faasaua atu i le tagata ese, ma le ua aumatuā, ma le fafine ua oti lana tane, ma outou le faamaligi le toto o e ua le sala i lenei mea, ma outou le mulimuli atu i atua ese e i ai le malaia;

⁷ona ou faatumauina ai lea o outou i lenei mea, o le nuu na ou foaiina atu i o outou tamā e faavavau faavavau lava.

⁸Faauta, ua outou faatuatua i upu pepelo, e le aoga.

⁹Tou te gaoi ea, ma fasioti tagata, ma mulilua, ma tauto pepelo, ma faamu mea manogi ia Paala, ma mulimuli atu i atua ese ua outou le iloa;

¹⁰ma outou o mai, ma tutū i o‘u luma i lenei fale, o loo ta‘ua ai lo‘u igoa, ma outou fai mai, Ua laveaiina i matou, ina ia faia nei mea inosia uma?

¹¹O lenei fale foi ua ta‘ua ai lo‘u igoa ua avea ea lea ma ana o tagata faasaua i o outou manatu? Faauta mai, o a‘u nei lava ua ou vaai atu i ai, o loo fetalai mai ai Ieova.

¹²A ia outou o i le mea sa a‘u i ai i Sailo, na ou tuu ai lo‘u igoa i le amataga, ma ia outou matamata i mea na ou fai i ai ona o le amio leaga a lo‘u nuu o Isaraelu.

¹³O lenei, ua outou faia ia mea uma, o loo fetalai mai ai Ieova, ua ou tautala atu foi ia te outou, na ou ala tautala atu lava, a ua outou le faalogo mai; na ou valaau atu foi ia te outou, a ua outou le tali mai ai;

¹⁴o le mea lea ou te fai ai i le fale ua ta‘ua ai lo‘u igoa, o le fale ua outou faatuatua i ai, ma le nuu ua ou foaiina atu ia te outou ma o outou tamā, e pei ona ou faia i Sailo.

¹⁵Ou te lafoai foi ia te ia outou i o‘u luma, e pei ona ou lafoaiina o outou uso uma, o le fanauga uma a Efaraima.

¹⁶O oe na foi, aua e te faatoga mai mo lenei nuu, aua foi e te faia se auega, po o se faatoga mo i latou, aua e te fautua mai ia te au; auā ou te le faalogo lava ia te oe.

¹⁷Ua e iloa atu ea mea ua latou faia i aai o Iuta, ma ala o Ierusalema?

¹⁸Ua fai fafie e le fanau, ua tafu le afi e o latou tamā, ua lomi le paluga falaoa e fafine e fai a‘i faapapā areto mā le tupu fafine o le lagi, ua liligi foi taulaga i mea e inu i atua ese, ina ia latou faaonoono mai ai ia te au.

¹⁹O a‘u ea ua latou faaonoono i ai? o loo fetalai mai ai Ieova; e le o i latou lava ea, ina ia masiasi ai i latou?

²⁰O le mea lea o loo faapea ona fetalai mai ai o le Alii o Ieova, Faauta, ou te liligi ifo i luga o lenei mea lo‘u ita ma lo‘u tiga, i luga o tagata, ma luga o manu, i luga foi o laau i le fanua, ma le fua o le laueleele; e mu ai, a e le tineia lava.

²¹O loo faapea ona fetalai mai o Ieova o ‘au, o le Atua o Isaraelu, Ia outou faaopoopo a outou taulaga mu i a outou taulaga, ma ia outou aai i tufaaga.

²²Auā na ou le fai atu i o outou tamā, ma a‘u le poloai atu ia te i latou i le aso na ou au mai ai ia te i latou ai le nuu o Aikupito, se upu i taulaga mu ma taulaga.

²³A o le mea lava lenei na ou poloai atu ai ia te i latou, ua faapea atu, Ia outou faalogo mai i lo‘u leo, ona fai ai lea o a‘u mo outou Atua, e fai foi outou mo‘u nuu; ma ia outou savavali i le ala uma na ou poloai atu ai ia te outou, ina ia manuia ai outou.

²⁴A ua latou le faalogo mai, ma ua le uai mai o latou taliga, a ua latou savavali i mafaufauga ma le finau vale o latou loto leaga, ua latou tuumuli i tua, a ua le savavali i luma.

²⁵Talu le aso na o mai ai o outou tamā ai le nuu o Aikupito, e oo i le aso nei, na ou aauina atu ai ia te outou a‘u auauna uma o perofeta, na ou ala aauina atu i latou i lea aso ma lea aso;

²⁶a ua latou le faalogo mai ia te au, ma ua le uai mai o latou taliga, a ua latou faamaaa o latou ua; ua amio leaga i latou e sili i o latou tamā.

²⁷E te fai atu lava ia upu uma ia te i latou, a e latou te le faalogo mai ia te oe; e te valaau atu foi ia te i latou, a e latou te le tali mai ia te oe.

²⁸A ia e fai atu ia te i latou, O le nuu lava lenei ua le faalogo mai i le leo o Ieova lo latou Atua; ua le talia foi e i latou le aoaiga; ua fano le faamaoni, ma ua te‘a lava i o latou gutu.

²⁹Ina sele mamā ia lou lauulu, ma lafoai, ma ia e faia i mauga tula le pese e aualofa a‘i; auā ua teena e Ieova ma lafoaiina le tupulaga ua ia toasa i ai.

³⁰Auā ua faia le mea leaga e le fanauga a Iuta i o‘u luma, o loo fetalai mai ai Ieova; ua tuuina e i latou a latou mea e inosia i le fale ua ta‘ua ai lo‘u igoa, ina ia latou faaleagaina ai.

³¹Ua faia foi e i latou mea maualuluga i Tofeta, ua i le vanu o le atalii o Hinoma, e susunu ai o latou atalii ma o latou afafine i le afi; o le mea ou te lei poloai atu ai, ou te lei manatu foi i ai.

³²O le mea lea, faauta, o le a oo mai ai ona po, o loo fetalai mai ai Ieova, e le toe igoa ai lea mea o Tofeta, po o le vanu o le atalii o Hinoma, a o le vanu o le fasi; latou te tanumia foi i Tofeta seia le toe ofi.

³³E fai foi tino ua oti o lenei nuu ma mea e ‘ai a manu felelei ma manu e tataa; e leai foi se na te tulia.

³⁴Ou te faaiuina foi i aai o Iuta ma ala o Ierusalema le leo fiafia ma le leo olioli, o le leo o le faatoafaiavā ma le leo o le faatoanofotane; auā e fai ma faatafunaga lenei nuu.