Read Samoan Old Version Bible – O LE TUSI PAIA IEREMIA, 9 Bible Online

IEREMIA, 9 - Samoan Old Version Bible – O LE TUSI PAIA bible

IEREMIA, 9

¹E! fia liua lo‘u ulu ma suāvai, ma o‘u mata ma punaloimata, ina ia ou tagi i le ao ma le po ona o e ua fasiotia o le tama fafine a lo‘u nuu.

²E! ta fia maua i le vao se fale apitaga e api ai malaga; ina ia ou tuua lo‘u nuu, ma alu ese ai; auā o tagata mulilulua i latou uma, o le faapotopotoga o tagata faa‘ole‘ole.

³Ua latou lolo‘u o latou laulaufaiva e pei o latou aufana, e tala pepelo ai; latou te le totoa i fai mea faamaoni i le nuu; auā ua alualu la latou amio leaga, ma latou le iloa a‘u, ua fetalai mai ai Ieova.

⁴Ia outou taitasi ma faaeteete o ia ia te ia i lana uo, aua foi ne‘i faatuatua i se uso e tasi; auā o uso uma e taitoatasi ma matuā sisio i lona uso, ma uo uma e taitasi ma fealualuai ma feaveaveai.

⁵E taitoatasi i latou ma pepelo i lana uo, e le tautala foi i latou ma le faamaoni; ua latou faamasani o latou laulaufaiva i tautala pepelo, ua tautiga i latou i fai mea faapiopio.

⁶O le mea e te nofo ai o loo i totonu o le nuu faa‘ole‘ole lea; o le faa‘ole‘ole latou te le mafafai ai ona iloa o a‘u, ua fetalai mai ai Ieova.

⁷O le mea lea, o loo faapea ona fetalai mai ai o Ieova o ‘au, Faauta, ou te suesue ia te i latou, ma tofotofo ia te i latou; auā pe se a se isi mea ou te faia i le tama fafine a lo‘u nuu?

⁸O latou laulaufaiva o u fanafana ia e oti ai; e tautalatala faa‘ole‘ole; e taitasi ma tautala ma le filemu i lana uo i lona gutu, a o lona loto ua lamalama ia te ia.

⁹Ou te le taui atu ea ia te i latou ona o ia mea; o loo fetalai mai ai Ieova. E le taui atu ea ma sui e lo‘u agaga i le nuu faapena?

¹⁰Ona o le atu mauga ou te faia le tagi ma le auega, o le pese foi e aualofa a‘i ona o mea i le vao o tataa ai manu, auā ua susunuina, ua le uia e tagata; e le lagona ai le leo o manu; ua sosola manu felelei atoa ma manu vaefa, ua latou o.

¹¹Ou te faia foi Ierusalema ma faupuegāmaa, o le mea e fale ai tanimo; ou te faatafunaina lava aai o Iuta, e le nofo ai se tasi.

¹²Po o ai le tagata poto, ia lagona e ia lenei mea? po o ai foi ua fetalai mai ia te ia le fofoga o Ieova, ia na faailoa mai ai le mea ua faaumatia ai le laueleele, ua susunuina e pei o le vao, ua le uia e se tasi?

¹³Ua fetalai mai foi Ieova, Ua latou lafoaiina la‘u tulafono na ou tuuina atu i o latou uma, ma latou le faalogo i lo‘u leo, ma latou le savavali i ai;

¹⁴a ua latou mulimuli atu i o latou loto finau vale, atoa ma Paala, na a‘oa‘oina ai i latou e o latou tamā;

¹⁵o le mea lea, o loo faapea ona fetalai mai ai o Ieova o ‘au, le Atua o Isaraelu, Faauta, ou te fafaga ia te i latou, o lenei lava nuu, i le laena, ma faainumia i latou i le vai oona.

¹⁶Ou te faataapeapeina i latou i nuu ese na le iloa e i latou, po o latou tamā; ou te auina atu foi le pelu e mulimuli ia te i latou, seia ou faaumatia i latou.

¹⁷O loo faapea ona fetalai mai o Ieova o ‘au, Ina mafaufau ia outou, ma ia outou aami atu i fafine pepese, ina ia latou o mai, ma ia outou feauina atu i fafine popoto, ina ia o mai foi i latou;

¹⁸ia latou faataalise mai, ma ia latou lagi le pese e aualofa a‘i mo i tatou, ia tafe ifo loimata i o tatou mata, ma ia maligi ifo le suāvai i o tatou laumata.

¹⁹Auā ua lagona atu le leo o le auega i Siona, E, ua faatafunaina i tatou! ua matuā mā lava i tatou, auā ua tuua e i tatou lo tatou laueleele, auā ua latou lepetia o tatou fale.

²⁰O lenei, o outou fafine, ina faalogologo mai ia i le afioga a Ieova, ia lagona e o outou taliga le upu mai lona fofoga, ma ia outou a‘oa‘o atu i a outou tama fafine se fatu, ia taitasi foi ma a‘oa‘o atu i lana uo se pese e aualofa a‘i.

²¹Auā ua alu ae le oti i o tatou faamalama, ua ulufale mai i o tatou maota, e fano ai tama iti i le ala, ma taulelea i malae.

²²Ina fai atu ia, O loo faapea ona fetalai mai o Ieova, E pauu tino o tagata oti, e pei o otaota i luga o le laueleele, e pei o le fusi saito foi i tua o lē selesele, a e leai se na te faaputuina.

²³O loo faapea ona fetalai mai o Ieova, Aua ne‘i mitamita le tagata poto i lona poto, aua ne‘i mitamita le tagata malosi i lona malosi, aua ne‘i mitamita foi le mauoa i ana oloa;

²⁴a o lē mitamita, ina mitamita ia o ia i lenei mea, ina ua mafaufau o ia, ma ua iloa a‘u, o a‘u lava o Ieova, o lē faia le alofa, ma le faamasinoga, ma le amiotonu i le lalolagi; auā o mea ia ou te fiafia i ai, o loo fetalai mai ai Ieova.

²⁵Faauta, e oo mai ona po, o loo fetalai mai ai Ieova, ou te taui atu ai ia te i latou uma o e ua peritomeina faatasi ma e ua le peritomeina;

²⁶o Aikupito, ma Iuta, ma Etoma, ma le fanauga a Amoni, o Moapi foi, ma i latou uma o e sala a latou pito ‘ava, o e nonofo i le vao; auā o ia nuu uma ua le peritomeina, ma le aiga uma o Isaraelu e lei peritomeina o latou loto.