Read Samoan Old Version Bible – O LE TUSI PAIA AUEGA, 1 Bible Online

AUEGA, 1 - Samoan Old Version Bible – O LE TUSI PAIA bible

AUEGA, 1

¹E! ua nofo toatasi le aai sa tumu i tagata; ua se fafine ua oti lana tane le sa mamalu i nuu; o le sa‘o tamaitai i nuu ua fai o ia ma lē ua avatu taulaga.

²Ua matuā tagi o ia i le po ua i ai foi i ona alafau o ona loimata; o i latou uma e sa mananao ia te ia ua leai so latou e faamafanafana ia te ia; ua faa‘ole‘ole ana uo uma ia te ia, ua avea i latou ma e ita ia te ia.

³Ua tāfea Iuta ona o le puapuaga, ma le galuega tele; ua nofo o ia i nuu ese, ua le maua e ia se malologa; atoa uma e na tuliloa ia te ia ua latou maua atu ia te ia i mea va apiapi.

⁴Ua faanoanoa ala o Siona ina ua leai ni e o mai i le tausamiga; ua taaligoligoa ona faitotoa uma; ua mapuitiga ona faitaulaga, ua tiga ona taupou, ua ogotia foi o ia.

⁵Ua sili e ua faasaua ia te ia, ua manuia e ua ita ia te ia; auā ua faatigaina o ia e Ieova ona o le tele o lona solitulafono; ua o ana tama i le tafeaga i luma o e ua faasaua.

⁶Ua mavae le matagofie uma o le tama fafine a Siona; o ona alii ua pei o aila ua le maua se vao e ai ai, ua latou o ua leai so latou malosi i luma o lē tuliloa mai.

⁷O ona po o le puapuaga o Ierusalema ma lona agaleagaina ua manatua e ia ana mea e fiafia i ai sa ia te ia i ona po anamua, ina o pauu ona tagata i le lima o le na ita mai, a e leai sona fesoasoani; na iloa mai e ua ita ia te ia, sa featani i latou i lona faatafunaina.

⁸Ua matuā agasala Ierusalema; o le mea lea ua faanofoeseina ai o ia; atoa uma e na vivii atu ia te ia ua latou ta‘ufaatauvaaina o ia, auā ua latou iloa lona le lavalavā; o ia foi, ua mapuitiga o ia, ma ua ‘alo i tua.

⁹Ua i ona pito ofu lona leaga; ua le manatua e ia o lona iuga, o lea ua matuā faamaulaloina ai o ia; e leai sē faamafanafana ia te ia. Ieova e, ina silasila mai ia i lo‘u puapuaga, auā ua faasausili le ua ita mai.

¹⁰Ua faaloaloa e le ua ita mai o lona lima i ana mea faafiafia uma; auā ua iloa e ia o nuu ese ua ulufale atu i lona malumalu o e na e poloai i ai, aua ne‘i latou o ane i lau faapotopotoga.

¹¹Ua mapuitiga ona tagata uma, ua latou sailiili i mea e ‘ai; ua latou aveina atu a latou mea uma e fiafia i ai e faatau ai mea e ‘ai e faafoisia ai le ola. Ieova e, ina silasila mai ia, ma ia e silafia; auā ia ta‘ufaatauvaaina o a‘u.

¹²Se mea māmā ea lenei ia te outou, o outou uma o e ui ane i le ala? Ina vaavaai mai ia, ma ia outou iloa pe ai se tiga e tusa ma lo‘u tiga ua oo ia te au, ua faatigaina ai a‘u e Ieova i le aso o lona toasa matuā tele.

¹³Ua ia tuuina ifo le afi mai luga i o‘u ivi, ua faiaina; ua ia fofolaina le upega mo o‘u vae, ua ia faafoisia a‘u i tua; ua ia faanofotoatasiina a‘u, o loo ua vaivai i le aso atoa.

¹⁴Ua fusia le amo a o‘u solitulafono e lona lava aao; ua filia, ua oo lava i lo‘u ua; ua ia faavaivaia lo‘u malosi; ua tuuina a‘u e le Alii i lalo i o latou lima ou te le mafai ai ona tulai.

¹⁵Ua faaleaogaina e le Alii o‘u tagata malolosi uma o i totonu ia te au; ua ia tala‘i le faapotopotoga e tetee ia te au ia tu‘imomomo i o‘u taulelea; ua se soligāvine, ua solia ai e le Alii le taupou, o le tama fafine a Iuta.

¹⁶Ona o nei mea ua ou tagi ai; o o‘u mata, ua tafe ifo le vai i o‘u mata; auā ua vava mamao ma a‘u o sē faamafanafana ia te au e faafoisia mai ai lo‘u ola; ua nonofo la‘u fanau ua na o i latou, auā ua malo le ua ita mai.

¹⁷Ua faaloaloa atu e Siona ona lima, a e leai se faamafanafana ia te ia; ua poloai Ieova i e ita ia Iakopo i ona itu uma; ua fai Ierusalema ia te i latou e pei o se fafine ua faanofoeseina.

¹⁸Ua amiotonu Ieova; auā ua ou fouvale i lana poloaiga; ina faalogologo mai ia outou tagata uma, ma ia outou vaavaai mai i lo‘u tiga; o o‘u taupou ma o‘u taulelea ua o i latou i le tafeaga.

¹⁹Na ou valaau atu i e na mananao mai ia te au, a ua latou faa‘ole‘ole mai ia te a‘u; o a‘u faitaulaga ma o‘u toeaina ua oti i latou i le aai, a o latou saili i ni mea e ‘ai mā latou, ina ia faafoisia ai lo latou ola.

²⁰Ieova e, ina silasila mai ia; auā ua ou puapuaga; ua sapotu vale lo‘u manava; ua matuā tiga lo‘u loto i totonu ia te au auā ua ou matuā fouvale; o fafo ua āufanaua i le pelu, o i fale ua peiseai o le oti.

²¹Ua latou faalogo ua mapuitiga a‘u nei, ua leai se faamafanafana mai ia te au; ua faalogo i latou uma e ua ita ia te au i lo‘u malaia; ua fiafia i latou ina ua e faia; e te faaootia mai le aso na e fetalai mai ai, e avea ai i latou e pei o a‘u nei.

²²Ia oo la latou amio leaga uma i ou luma, ma ia e faia ia te i latou e pei ona e faia ia te au ona o o‘u solitulafono uma; auā ua tele o‘u mapuitiga, ua vaivai foi lo‘u loto.