Read Samoan Old Version Bible – O LE TUSI PAIA AUEGA, 2 Bible Online

AUEGA, 2 - Samoan Old Version Bible – O LE TUSI PAIA bible

AUEGA, 2

¹E! ua faapouliuligia e le Alii i lona toasa o le tama fafine a Siona; ua ia lafo i lalo le matagofie o Isaraelu mai le lagi i le lalolagi; ua le manatua foi e ia le mea e tu ai ona aao i le aso o lona toasa.

²Ua faaumatia e le Alii, a e lei faapelepeleina e ia o fale uma o Iakopo; ua lepetia e ia i lona toasa o ‘olo o le tama fafine a Iuta; ua ia faagatasia ma le eleele, ua faaleagaina e ia o le malo atoa ma ona alii.

³Ua vavaeeseina e ia i lona toasa tele o nifo uma o Isaraelu; ua faafoi atu e ia lona aao taumatau i luma o e ita mai; ua mu foi o ia e pei o se afi mumū ia Iakopo, ua susunu ai i itu uma.

⁴Ua lolou e ia lana aufana pei o se ua ita mai; ua mau lona aao taumatau e pei o se ua ita mai, ua ia fafasi foi i e matagofie uma lava i le fale o le tama fafine a Siona; ua sasaaina e ia o lona toatamai e pei o se afi.

⁵Ua avea le Alii e pei o se ua ita mai; ua faaumatia e ia o Isaraelu, ua faaumatia e ia ona maota uma; ua faaumatia ona ‘olo, ua faateleina e ia le faanoanoa ma le faavauvau o le tama fafine a Iuta.

⁶Ua ia liaiina lava o lona āi e peiseai o se āi o se faatoaga; ua ia faaumatia le mea e potopoto ai; ua faafaagaloina e Ieova i Siona o le tausamiga, ma le sapati; o lona toasa matuā tele ua ia ‘ino‘ino ai i le tupu ma le faitaulaga.

⁷Ua tuulafoaiina e le Alii o lona fata faitaulaga, ua ia ‘ino‘ino i lana mea paia, ua tuuina atu e ia pa o ona maota i lima o e ita mai; ua latou leo tetele i le fale o Ieova, e pei ona faia i le aso o le tausamiga.

⁸Na manatu Ieova na te faaumatia le ‘olo o le tama fafine a Siona; ua ia faataoto le fua; ua le faafoi atu lona aao a ua faaumatia; ua faafaanoanoaina e ia le pa ma le ‘olo; ua faavaivai faatasi ia.

⁹Ua gogoto ona puipui i le eleele; ua faaumatia ma ua gāugau ona faamau faalava; o lona tupu ma ona alii ua i nuu ese i latou; ua leai se tulafono; o ona perofeta foi ua le maua e i latou se faaaliga mai ia Ieova.

¹⁰Ua nonofo i le eleele, ua faalologo toeaina o le tama fafine a Siona; ua latou tuu le efuefu i luga i o latou ulu; ua latou fufusi ia te i latou i ie talatala; ua punou ulu o taupou o Ierusalema i le eleele.

¹¹Ua avea o‘u mata i le tagi, ua sapotuvale lo‘u manava, ua masaa lo‘u ate i le eleele, ona ua tu‘imomomo le tama fafine a lo‘u nuu; ina ua matapogia tama iti ma tama meamea i ala o le aai.

¹²Ua latou fai atu i o latou tinā, Po o fea o i ai se saito ma se uaina? ina o matapogia i latou pei o se ua manua i ala o le aai, ina o mavae o latou ola i fatafata o latou tinā.

¹³Pe se a se mea ou te ta‘u atu ia te oe? Pe se a se mea ou te faatusaina ia te oe, le tama fafine a Ierusalema e? Pe se a se mea ou te faatatauina ia te oe, e faamafanafanaina ai oe, le taupou e, le tama fafine a Siona? Aua e tele lou manua pei o le sami; po o ai na te foia oe?

¹⁴Ua vaaia e au perofeta o mea pepelo ma mea faatauvaa mo oe; ua latou le faaalia au agasala, ina ia faafoisia lau tafeaga; a ua latou vaaia mo oe o avega pepelo ma mea e faasese ai.

¹⁵Ua pāti lima ia te oe o i latou uma e ui ane i le ala; ua latou uisa, ma latou lialiai o latou ulu i le tama fafine a Ierusalema, ua faapea ane, O le aai ea lenei sa ta‘ua ua atoatoa ona matagofie; o lē sa fiafia i ai le lalolagi uma?

¹⁶O e ita ia te oe ua faamamaga o latou gutu ia te oe; ua latou uisa, ua latou lilivau o latou nifo; ua latou fai mai, Ua tatou faaumatia o ia; e moni, o lenei le aso sa tatou faatalitali i ai; ua tatou maua mai, ua tatou iloa.

¹⁷Ua faia e Ieova le mea sa na finagalo i ai; ua faataunuu e ia le upu sa ia fetalaia mai i aso anamua; ua ia lepetia, ua leai foi sona alofa mai; o ia ua faafiafiaina ai ona o oe o le ua ita mai, ua ia faamaualugaina le nifo o e fai oe mo latou fili.

¹⁸Sa alalaga o latou loto i le Alii, Le aupa e o le tama fafine a Siona, ia tafe ifo loimata e pei o se alia i le ao atoa ma le po; aua lava e te malolo; aua le mapu ou tamatamai mata.

¹⁹Ina tulai ia, ina valaau atu i le po i le amataga o leoleoga; ia e sasaaina atu lou loto e pei o se vai i luma o le Alii; ina sisii atu ia o ou lima ia te ia ina ia ola au tama iti ua matapogia i le fia ‘ai i tuluiga o ala uma.

²⁰Ieova e, silasila mai ia, ma ia e silafia le ua e faia nei mea i ai. Pe aai ea e fafine a latou fanau o tama iti ua sapaia? Pe fasiotia ea i le malumalu o le Alii o le faitaulaga ma le perofeta?

²¹Ua taatitia i fafo i le eleele o tama ma toeaina; o o‘u taupou ma o‘u taulelea ua fasiotia i le pelu; ua e fasiotia i latou i le aso o lou toasa; ua e fasia, ua e le faasaoina.

²²Ua e tala‘iina e pei o le aso o le tausamiga i mea ou te mata‘u ai i itu uma; sa leai foi se na sao po o se na toe i le aso na toasa ai Ieova; o e na ou sapaia ma ou tausia, ua faaumatia i latou e le ua ita mai.