Read Samoan Old Version Bible – O LE TUSI PAIA ESEKIELU, 1 Bible Online

ESEKIELU, 1 - Samoan Old Version Bible – O LE TUSI PAIA bible

ESEKIELU, 1

¹O le tolugafulu o tausaga, o lona fa o masina, o le aso lima o le masina, na ou i ai ma le tafeaga e lata ane i le vaitafe o Kepara, ua avanoa mai le lagi, ona ou iloa lea o faaaliga mai le Atua.

²O le lima o aso o le masina, o lona lima o tausaga lea o le tafeaga a le tupu o Ioakina,

³na oo mai ai lava le afioga a Ieova ia Esekielu le atalii o Posai le ositaulaga, i le nuu o Kaletaia e lata ane i le vaitafe o Kepara; na i luga foi ia te ia le aao o Ieova i lea mea.

⁴Na ou vaai, faauta foi, o le afā o loo sau i le itu i matu, o le ao tele, ma le afi, o loo mu lava e ia ia ia, o le pupula foi ua faataaliolioina ai le ao, mai totonu foi e tino mai e peiseai o le ‘apa pupula mai totonu o le afi.

⁵Mai totonu foi le faatusa o mea ola e fa, o lo latou tino lenei, o le faatusa o le tagata i latou.

⁶Taitasi foi o i latou ma ona mata e fa, taitasi foi ma ona apaau e fa.

⁷O latou vae, o vae sasa‘o ia, ma o latou alofivae e pei o alofivae o le tamai povi, ua eemo mai pei o le tino o le ‘apa memea ua faapupulaina.

⁸Ua i ai foi lima o tagata i lalo o latou apaau i o latou itu e fa; ua ia te i latou e fa, o latou mata ma o latou apaau.

⁹Ua faasooina o latou apaau o le tasi i le tasi; e lei liliu i latou ina o latou ō; a ua latou taitasi ma alu tonu atu i ona luma.

¹⁰O le faatusa foi o latou mata, ua ia te i latou e fa o mata o le tagata, ma mata o le leona i le itu taumatau; ua ia te i latou foi e fa mata o le povi i le itu tauagavale; ua ia te i latou foi e fa mata o le aeto.

¹¹O latou mata lava ia; a o latou apaau ua faloina i luga; taitasi ma fesootai apaau e lua, o apaau e lua foi ua ufitia ai o latou tino.

¹²Ua latou taitasi ma alu tonu atu i ona luma; o le mea a alu i ai le agaga, ua o i ai i latou, ua latou le liliu i lo latou o atu.

¹³O le faatusa foi o mea ola, ua latou tino mai e pei o malala ola o le afi ua mu, ua tino mai e pei o lamepa; ua fealualuai ia i le va o mea ola; ua pupula foi le afi, ma ua emo mai le uila ai totonu o le afi.

¹⁴Ua fetaufetuliai foi o mea ola, ua tino mai e pei o le uila.

¹⁵Ua ou vaavaai i mea ola faauta foi, o le mea taavale e tasi ua tu i le laueleele i tafatafa o mea ola, ma ona mata e fa.

¹⁶O le tino mai foi o mea taavavale ma o latou gaosiga ua pei o le tino mai o le tasesa; ua tutusa i latou e fa; o latou tino mai ma o latou gaosiga ua peiseai se mea taavale i totonu o le mea taavale.

¹⁷Ua latou o i o latou itu e fa ina ua latou o, ua latou le liliu ina ua latou o.

¹⁸O mea foi e lio a‘i i latou ua maualuluga lava, ua tupu ai le mata‘u; ua soo foi mea e lio a‘i i latou i mata, ua faataaliolioina ai i latou e fa.

¹⁹A ō atu mea ola, ona o foi lea o mea taavavale i o latou tafatafa; a siitia foi mea ola i le fogāeleele, ona siitia ai lea o mea taavavale.

²⁰O le mea a alu i ai le agaga ua o i ai i latou, o le mea lea a alu i ai lo latou agaga. Ua siitia i luga foi o mea taavavale i o latou tafatafa; auā na i ai le agaga o mea ola i mea taavavale.

²¹A o atu i latou, ona o atu ai lea o i latou nei; a tutū foi i latou, ona tutū ai lea o i latou nei; a siitia foi i latou i luga o le fogāeleele, ona siitia lea o mea taavavale faatasi ma i latou; auā na i ai le agaga o mea ola i mea taavavale.

²²O le va i lagi i luga o ulu o mea ola ua tino mai ua pei o le maa tioata matautia, ua folasia i luga o latou ulu i o latou luga ae.

²³Ua sasa‘o foi o latou apaau i lalo o le va i lagi, ua faafesagai; taitasi i latou ma apaau e lua, ua ufiufitai a‘i i latou e i latou; taitasi foi ma apaau e lua, ua ufitai a‘i e i latou o latou tino.

²⁴Na ou lagona le taalili o latou apaau ina ua latou o atu, ua pei o le taalili o vai e tele, pei o le siufofoga o Le e ona le malosi uma lava; o le taalili ua pei o le taalili o se itu taua: ua tutū i latou, ona tutuu lea i lalo e i latou o latou apaau.

²⁵Na i ai foi le taalili mai le va i lagi i luga o latou ulu; a tutū i latou, ona tutuu lea i lalo e i latou o latou apaau.

²⁶O i luga foi o le va i lagi i luga o latou ulu, ua i ai le faatusa o le nofoālii, ua tino mai e pei o le maa safaira; o i luga foi o le faatusa o le nofoālii le faatusa ua tino mai e pei e le tagata i ona lava luga.

²⁷Na ou iloa foi pei o le tino o le ‘apa pupula, ua tino mai e pei o le afi ua faataaliolio i totonu, ua tino mai i lona sulugatiti e oo ae i luga; ua tino mai foi i lona sulugatiti e oo ifo i lalo, na ou iloa ua tino mai e pei o le afi, na i ai foi le pupula ua faataaliolioina ai.

²⁸Pei o le tino mai o le nuanua e i le ao i le aso ua, e faapea ona tino mai o lona pupula o faataaliolioina ai. O lona tino mai lea o le faatusa o le pupula o Ieova. Na ou iloa ai, ona ou faapaū fao ai lea, ona ou lagona lea le siufofoga o le tasi ua fetalai mai.