Read Samoan Old Version Bible – O LE TUSI PAIA ESEKIELU, 10 Bible Online

ESEKIELU, 10 - Samoan Old Version Bible – O LE TUSI PAIA bible

ESEKIELU, 10

¹Ona ou vaai lea, faauta foi i le va i lagi ua i luga o ulu o kerupi, e peiseai o le maa safaira, e tino mai e peiseai o le faatusa o le nofoālii ua tu mai i luga ia te i latou.

²Ua fetalai atu foi o ia i le tagata ua ofu i le ie lino, ua faapea atu, Ulu atu ia i le va o mea taavavale i lalo o le kerupi, ma e faatumuina lou lima i malala ola ai le va o kerupi, ma saaluu solo ai i luga o le aai. Ona ulu ane lea o ia o loo ou vaai atu.

³Ua tutū foi kerupi i le itu taumatau o le fale, ina o ulu atu ai le tagata; ua faatumuina le lotoā tuloto i le ao.

⁴Ona alu ae lea o le pupula o Ieova nai luga o le kerupi, ua oo i le faitotoa o le fale; ua faatumuina foi le fale i le ao, ua tumu foi le lotoā i le pupula matagofie o Ieova.

⁵Ua logona foi le taalili o apaau o kerupi, ua oo lava i le lotoā aupito i fafo, ua pei o le siufofoga o le Atua e ona le malosi uma lava pe a fetalai mai o ia.

⁶Ua uma foi ona ia fetalai atu i le tagata ua ofu i le ie lino, ua faapea atu, Ina ave ia se afi ai le va o mea taavavale, ai le va o kerupi; ona ulu ane lea o ia, ma tu e lata ane i le mea taavale.

⁷Ona tago atu lea o le lima o le kerupi ai le va o kerupi i le afi ai le va o kerupi, ua avae ai, ma avane i lima o le ua ofu i le ie lino; ua talia e ia, ona alu atu lea o ia.

⁸Ua iloa i kerupi le faatusa o le lima o le tagata i lalo o latou apaau.

⁹Ona ou vaai lea faauta, o mea taavavale e fa i tafatafa o kerupi, taitasi le mea taavale i tafatafa o kerupi taitasi; ua tino mai foi o mea taavavale e pei o le tino o le maa tasesa.

¹⁰O latou tino mai foi, ua tino faatasi i latou uma e fa, ua peiseai o le mea taavale i totonu o le mea taavale.

¹¹A latou o, ua latou o i o latou itu e fa, ua latou le liliu ina ua latou o, a o le mea na faasaga i ai le ulu ua latou mulimuli atu i ai; ua latou le liliu ina ua latou o.

¹²O latou tino uma, ma o latou tua, ma o latou lima, ma o latou apaau, atoa ma mea taavavale ua tutumu ia i mata, ua soo lava, o mea taavavale lava na ia te i latou e fa.

¹³A o mea taavavale, ua valaau le tasi ia te i latou, o loo ou faalogo atu, Le mea taavale e.

¹⁴Ua tofu i latou taitasi ma mata e fa; o le ua muamua i mata, o mata o le kerupi lea, o lona lua o mata, o mata o le tagata lea, o lona tolu, o mata o le leona lea, o lona fa, o mata o le aeto lea.

¹⁵Ua siitia foi kerupi i luga. (O le mea ola lea na ou iloa i le vaitafe o Kepara.)

¹⁶A ō foi kerupi, ua o foi mea taavavale i o latou tafatafa; a faloina i luga e kerupi o latou apaau ina ia o ae i luga nai le lalolagi, e le liliu ese i o latou tafatafa ia lava mea taavavale.

¹⁷A tutū i latou, ona tutū lea o i latou nei; a aveina ae foi i latou i luga, ona aveina ae lea o i latou nei; auā ua i ai le agaga o le mea ola ia te i latou.

¹⁸Ona alu atu lea o le pupula o Ieova ai le faitotoa o le fale, ma ua tu i luga ae o kerupi.

¹⁹Ona faloina lea i luga e kerupi o latou apaau, ua o ae mai le lalolagi, o loo ou vaai i ai; ua latou o atu ua faatasi ma i latou mea taavavale, ua latou tutū foi i le puipui o le faitotoa o le fale o Ieova e faasaga i sasae; ua i luga lava ia te i latou le pupula o le Atua o Isaraelu.

²⁰O le mea ola lea na ou iloa i lalo o le Atua o Isaraelu i le vaitafe o Kepara; na ou iloa o kerupi lava i latou.

²¹Ua taitasi ma ona mata e fa, e taitasi foi ma ona apaau e fa; o le faatusa foi o lima o le tagata na i lalo o latou apaau lea.

²²O le faatusa foi o latou mata o mata ia na ou iloa e lata ane i le vaitafe o Kepara, o latou tino mai, ma i latou lava; e taitasi ma alu tonu atu i ona luma.