Read Samoan Old Version Bible – O LE TUSI PAIA ESEKIELU, 11 Bible Online

ESEKIELU, 11 - Samoan Old Version Bible – O LE TUSI PAIA bible

ESEKIELU, 11

¹Ua siitia foi a‘u i luga e le Agaga, ua ia ave ia te au i le faitotoa o le fale o Ieova i sasae e faafesagai ma le itu i sasae; faauta foi, o tagata e toaluafulu ma le toalima i le puipui o le faitotoa; ua ou iloa foi o ia te i latou o Iaasenaia le atalii o Asura, ma Pelatia le atalii o Penaia, o alii o le nuu.

²Ona fetalai mai lea o ia ia te au, Le atalii e o le tagata, o tagata ia e tautogafiti i mea leaga, ma latou pule i pulega leaga le aai nei;

³o e faapea atu, E le latalata mai; ina fai fale ia; o le ulo lenei aai, a o le tufaaga i tatou.

⁴O le mea lea ia e vavalo atu ai ia te i latou, le atalii e o le tagata, ia e vavalo atu ia.

⁵Ona oo mai ai lea o le Agaga o Ieova ia te au, ua ia fetalai mai foi ia te au, Fai atu ia, O loo o faapea mai Ieova, Ua faapea ona fai mai outou, le aiga o Isaraelu e; auā ua ou iloa mea uma lava e tutupu i o outou manatu.

⁶Ua outou faatoateleina o outou tagata fasiotia i lenei aai, ua outou faatutumuina ona ala i e ua fasiotia.

⁷O le mea lea o loo faapea mai ai le Alii o Ieova, O outou tagata ua fasiotia, ua outou tuuina ai, o tufaaga i latou, a o lenei aai o le ulo lea; a e ou te aveeseina ai outou.

⁸Ua outou fefefe i le pelu; ou te faaoo atu lava le pelu ia te outou, o loo fetalai mai ai le Alii o Ieova.

⁹Ou te aveeseina ai outou ma ou tuuina atu outou i lima o tagata ese, ou te faaooina foi sala ia te outou.

¹⁰E oti outou i le pelu; ou te faasalaina outou i le tuaoi o Isaraelu; ona outou iloa ai lea o a‘u lava o Ieova.

¹¹E le fai lenei aai, ma ulo ia te outou, e le fai foi outou ma tufaaga o i ai; ou te faasalaina outou i le tuaoi o Isaraelu;

¹²e iloa ai foi e outou o a‘u lava o Ieova; aua ua outou le savavali i a‘u tulafono, e lei faia foi a‘u faamasinoga, a ua outou fai e tusa ma tu o nuu ese e vagavagaia outou.

¹³Ua oti Pelatia le atalii o Penaia o loo ou vavalo atu. Ona ou faapaū fao ai lea, ma ou alaga atu ua leo tele, ua faapea atu, Aue, le Alii e Ieova e! e te faaumatia ea e o totoe ia Isaraelu?

¹⁴Ona oo mai lea o le afioga a Ieova ia te au, ua faapea mai,

¹⁵Le atalii e o le tagata, o ou uso, o ou uso lava, o tagata o lou aiga, atoa ma le aiga uma o Isaraelu, o i latou uma lava, o i latou ia ua fai atu i ai e o nonofo i Ierusalema, Ina o ese atu ia outou, ia mamao ia Ieova; ua tuuina mai ia i matou le nuu nei e fai mo matou.

¹⁶O le mea lea ia e fai atu ai, O loo faapea mai le Alii o Ieova; E ui ina ua ou avemamaoina i latou i nuu ese, e ui ina ua ou faataapeapeina i latou i nuu eseese, e fai a‘u ma malumalu ia te i latou i nai tausaga i nuu latou te o i ai.

¹⁷O le mea lea ia e fai atu ai, O loo faapea mai le Alii o Ieova, Ou te faapotopotoina mai outou nai nuu ese, ma aofai mai ia te outou ai nuu esese ua faataapeapeina ai outou, ma ou avatu ia te outou le laueleele o Isaraelu.

¹⁸Latou te o mai ai, ma latou aveeseina mea leaga uma o i ai, atoa ma mea uma e inosia.

¹⁹Ou te foai atu foi ia te i latou le loto e tasi, ma ou foai atu le loto fou i totonu ia te outou; ou te aveeseina le loto fatu ai totonu i o latou tino, ma ou foai atu le loto aano ia te i latou;

²⁰ina ia latou savavali i a‘u tulafono, ma tausi i a‘u faamasinoga, ma latou faia; e fai foi i latou mo‘u nuu, e fai foi a‘u mo latou Atua.

²¹A o i latou o e mulimuli atu o latou loto i loto o a latou mea leaga ma a latou mea e inosia, ou te taui atu a latou amio i luga i o latou ulu, o loo fetalai mai ai le Alii o Ieova.

²²Ona siitia lea i luga e kerupi o latou apaau, ma mea taavavale i o latou tafatafa; ua i o latou luga ae le pupula o le Atua o Isaraelu.

²³Ona alu ae lea o le pupula o Ieova nai totonu o le aai, ua tu i luga o le mauga o loo i le itu i sasae o le aai.

²⁴Ona siitia lea o a‘u e le Agaga, ua avea foi a‘u e le Agaga o le Atua i le faaaliga i Kaletaia ia te i latou o le tafeaga. Ona alu ae lea nai ia te au le faaaliga na ou iloa.

²⁵Ona ou tala atu ai lea ia te i latou o i le tafeaga o mea uma na faaalia mai e Ieova ia te au.