Read Samoan Old Version Bible – O LE TUSI PAIA ESEKIELU, 14 Bible Online

ESEKIELU, 14 - Samoan Old Version Bible – O LE TUSI PAIA bible

ESEKIELU, 14

¹Ua o mai foi ia te au nisi toeaina o Isaraelu, ua nonofo mai i o‘u luma.

²Ona oo mai lea o le afioga a Ieova ia te au, ua faapea mai,

³Le atalii e o le tagata, ua faatuina e ia tagata o a latou tupua i o latou loto, ma ua tuuina i o latou luma la latou agasala e tausuai ai; latou te fesili mai ea ia te au?

⁴O le mea lea ia e tautala atu ai ia te i latou, ma fai atu ia te i latou, O loo faapea ona fetalai mai o le Alii o Ieova, Ai se tagata o le aiga o Isaraelu na te faatuina ana tupua i lona loto, ma tuuina i ona luma lana agasala e tausuai ai, ma alu ane i le perofeta; o a‘u o Ieova, ou te tali atu i lē alu ane, e tusa ma le tele o ana tupua;

⁵ina ia maua le aiga o Isaraelu i o latou lava loto, auā ua o ese i latou uma ia te au ona o a latou tupua.

⁶O le mea lea ia e fai atu ai i le aiga o Isaraelu, O loo faapea ona fetalai mai o le Alii o Ieova, Liliu mai ia, ina liliu ese i a outou tupua, ia liliu ese o outou mata i a outou mea inosia uma.

⁷Auā ai se tagata o le aiga o Isaraelu, po o se tagata ese o āumau i Isaraelu, na te alu ese ia te au, ma faatuina ana tupua i lona loto, ma tuuina i ona luma lana agasala e tausuai ai, ma alu ane i le perofeta e fesili atu ai ia te au, o a‘u o Ieova, o a‘u lava, ou te tali atu ia te ia.

⁸Ou te fai lena tagata mo‘u fili, ou te fai foi o ia ma faailoga, ma upu faatusa, ou te vavaeeseina foi o ia i lo‘u nuu; tou te iloa ai o a‘u lava o Ieova.

⁹A e afai e sese se perofeta i se upu ua ia fai atu ai, o a‘u o Ieova ua ou faaseseina lena perofeta, ou te faaloaloa atu foi lo‘u lima ia te ia, ma faaumatia o ia ai lo‘u nuu o Isaraelu.

¹⁰E taui atu lava a latou agasala; e tusa le taui o le perofeta ma le taui o lē fesili ia te ia;

¹¹ina ia le toe sese le aiga o Isaraelu i lo latou o ese ia te au, ma ia le toe leaga i latou i o latou solitulafono uma; a ia fai i latou mo‘u nuu, ma ia fai a‘u mo latou Atua, ua fetalai mai ai le Alii o Ieova.

¹²Ua oo mai foi le afioga a Ieova ia te au, ua faapea mai,

¹³Le atalii e o le tagata, a agasala mai se nuu ia te au ina ua matuā amio leaga lava, ma ou faaloaloa atu i ai lo‘u lima, ma gausia le tootoo o lana mea e ‘ai, ma tuu atu ai le oge, ma faaumatia tagata atoa ma manu o i ai;

¹⁴ana i ai tagata ia e toatolu, o Noa, o Tanielu, ma Iopu, e laveaiina e i latou na o latou lava ola i la latou amiotonu, ua fetalai mai ai le Alii o Ieova.

¹⁵Afai ou te tuuina atu manu feai e ui ai i le nuu, ma faaumatia ai tagata, ia gaogao, ma ia le toe uia ona o manu;

¹⁶ana i ai ia tagata e toatolu, ua fetalai mai ai le Alii o Ieova, o loo ola a‘u, e le laveaiina e i latou o atalii, po o afafine, na o i latou lava e laveaiina, a e faagaogaoina lava le nuu.

¹⁷Afai foi ou te faaoo atu le pelu i lena nuu, ma ou fai atu, Le pelu e, ina ui atu ia i le nuu; ou te faaumatia ai tagata atoa ma manu;

¹⁸ana i ai ia tagata e toatolu, ua fetalai mai ai le Alii o Ieova, o loo ola a‘u, latou te le laveaiina o atalii po o afafine, na o i latou lava e laveaiina.

¹⁹Afai foi ou te tuu atu i lena nuu se faamai, ma ou sasaaina atu i ai lo‘u ita tele i le faamaligi o toto, e faaumatia ai tagata atoa ma manu;

²⁰ana i ai o Noa, ma Tanielu, ma Iopu, ua fetalai mai ai le Alii o Ieova, o loo ola a‘u, e le laveaiina e i latou se atalii, po o se afafine; latou te laveaiina na o latou lava ola i la latou amiotonu.

²¹O le mea lea ua faapea ona fetalai mai ai o le Alii o Ieova; E le atili ai ea pe a ou tuuina atu i Ierusalema sala ogo e fa ua ia te au, o le pelu, ma le oge, ma le manu feai, ma le faamai e faaumatia ai tagata atoa ma manu?

²²Faauta foi, e faasaoina i ai si ona toe, e ta‘ita‘iina atu ai i latou, o atalii atoa ma afafine; faauta, e o mai i latou ia te outou, e iloa e outou a latou amio ma a latou mea e fai; ona faamafanafanaina ai lea o outou i le leaga ua ou faaoo i Ierusalema, atoa uma foi mea ua ou faaoo i ai.

²³Latou te faamafanafana ia te outou pe a outou iloa a latou amio ma a latou mea e fai; ona outou iloa ai lea, ou te lei fai fua mea uma na ou fai i ai, o loo fetalai mai ai le Alii o Ieova.