Read Samoan Old Version Bible – O LE TUSI PAIA ESEKIELU, 15 Bible Online

ESEKIELU, 15 - Samoan Old Version Bible – O LE TUSI PAIA bible

ESEKIELU, 15

¹Ua oo mai foi le afioga a Ieova ia te au, ua faapea mai,

²Le atalii e o le tagata, se a ea le mea e sili ai le laau o le vine i laau uma, po o se la lava o i laau o le vao?

³E ave ea sina ona laau e fai a‘i se galuega? pe fai a‘i se tautaulaga e tautau ai se mea?

⁴Faauta, e lafo i le afi e fai ma fafie, e susunu foi i le afi ona pito e lua, e mu foi lona ogaloto; e aoga ea ia i se galuega?

⁵Faauta, sa le fai a‘i se galuega ina o atoatoa, e le atili faapea ai ea ona le fai a‘i o se galuega ina ua mu i le afi, ma ua susunuina.

⁶O le mea lea o loo faapea ona fetalai mai ai o le Alii o Ieova, E pei o le laau o le vine i laau o le vao, ua ou tuuina atu ai mo le afi e fai ma fafie, e faapea foi ona ou tuuina atu e o nonofo i Ierusalema.

⁷Ou te fai foi i latou mo‘u fili, latou te o atu nai le afi, a e faaumatia i latou i le afi; ona outou iloa ai lea o a‘u lava o Ieova, pe a ou fai i latou mo‘u fili.

⁸Ou te tuuina atu foi le nuu ia faatafunaina, auā ua matuā agasala i latou, o loo fetalai mai ai le Alii o Ieova.