Read Samoan Old Version Bible – O LE TUSI PAIA ESEKIELU, 16 Bible Online

ESEKIELU, 16 - Samoan Old Version Bible – O LE TUSI PAIA bible

ESEKIELU, 16

¹Ua oo mai foi le afioga a Ieova ia te au, ua faapea mai,

²Le atalii e o le tagata, ia e faailoa atu ia Ierusalema o ana mea e inosia,

³ma e fai atu ai, O loo faapea ona fetalai mai o le Alii o Ieova ia Ierusalema, O lou tupuga ma lou fanau mai, nai le nuu o Kanana ia; o lou tamā o lo sa Amorī, o lou tinā o lo sa Hetī.

⁴O lou fanau mai foi, o le aso na fanau ai oe na le taia lou pute, e lei mulumuluina foi oe i le vai ia faamamāina ai oe; e lei faamasimaina oe i le masima, ma ua le auia lava oe.

⁵E leai se na ia alofa ia te oe e fai ai se tasi o ia mea ia te oe, e agalelei ia te oe; a e peitai na lafoaiina oe i le fogāeleele, na inosia ai oe i le aso na fanau ai oe.

⁶Na ou ui ane i le mea sa e i ai, na ou iloa foi oe o taatia i lou toto, ona ou fai atu ai lea ia te oe ina ua e i lou toto, Ola ia; na ou fai atu lava ia te oe ina ua e i lou toto, Ola ia.

⁷Na ou faatoateleina oe e pei o moemoe o le vao, na e tupu lava ua matua, ma ua e matuā lalelei lava; ua popona ou susu, ua tupu ou fulufulu, a o oe sa le ufitia ma le lavalavā.

⁸Na ou ui ane i le mea sa e i ai, ma ou vaai ia te oe, faauta, o lou tausaga, o le tausaga o le alofa lea, ona ou faaafu lea ia te oe i lo‘u pito ofu e ufitia ai lou le lavalavā; na ou tauto foi ia te oe, ma ta osia le feagaiga ma‘u, ona fai ai lea oe mo‘u, ua fetalai mai ai le Alii o Ieova.

⁹Na ou mulumulu ia te oe i le vai, ma ou faamamāina ou toto sa ia te oe ma ou uu ia te oe i le suāuu.

¹⁰Na ou faaofuina oe i le ofu lanu eseese, ma ou faaseeina oe i le pa‘u takesa, ma ou fusi ia te oe i le ie vavae, ma ou ufiufi ia te oe i le silika.

¹¹Na ou teu foi ia te oe i mea e matagofie a‘i, ma ou avane taulima i ou lima, ma le asoa i lou ua.

¹²Na ou avane foi le mama i lou isu, ma mama taliga i ou taliga, ma le pale lalelei i lou ulu.

¹³Na teua lava oe i auro ma ario; o ou ofu foi, o le ie vavae, ma le silika, ma le ie lanu eseese; o le falaoa lelei foi, ma le meli, ma le uu na e ‘ai ai; na matuā lalelei lava oe, na manuia foi oe na fai ma malo.

¹⁴Na oo atu foi i nuu ese le logo o lou lalelei; auā sa atoa lea i lou matagofie na ou tuuina atu ai ia te oe, o loo fetalai mai ai le Alii o Ieova.

¹⁵A e peitai na e faatuatua i lou lalelei, ma e mulilua ona o lou logo, ma sasaa atu au muliluaga ia te i latou uma na ui ane; na fai ia mo i latou.

¹⁶Na e avea foi ni ou ofu ma teteuina ai au mea maualuluga lanu eseese, ma e talitane ai; e lei oo mea faapea, i le e le faia lava.

¹⁷Ua e avea foi au mea matagofie na fai i a‘u auro, ma a‘u ario na ou avatu ia te oe, ma ua e faia faatusa o tane ma oe, ma talitane ia i latou.

¹⁸Ua e avea foi ou ofu lanu eseese, ma faaofu a‘i i latou, ma ua e tuuina atu o‘u uu ma a‘u mea manogi i luma ia te i latou.

¹⁹O a‘u mea e ‘ai foi na ou foai atu ia te oe, o falaoa lelei, ma uu, ma meli na ou fagaina ai oe, ua e laulauina foi i o latou luma e fai a‘i se mea manogi lelei. Sa faapea lava, o loo fetalai mai ai le Alii o Ieova.

²⁰Ua e avea foi au tama tane, ma au tama teine na e fanau mai ia te au, ma ua e fai i latou ma taulaga ia te i latou ina ia faaumatia ai. O le mea māmā ea lea i lou talitane, ina ua e fasioti i la‘u fanau;

²¹ma ua e tuuina atu i latou ia faaui ane i latou i le afi mo i latou?

²²O au mea e inosia uma ma lou talitane uma, na e le manatua ona aso a o te teine itiiti, ina ua le ufitia ai oe, ma ua le lavalavā, ma ua taatia i lou toto.

²³Ua uma foi ona e fai o au amio leaga uma, (Oi talofa, oi talofa ia te oe! o loo fetalai mai ai le Alii o Ieova;)

²⁴ona e fai ai lea mo oe o le fale taā, ma ua e fai mea maualuluga i malae uma.

²⁵Ua e fai au mea maualuluga i tuluiga o ala uma, ua e faainosia lou lalelei, ua talia foi i latou uma na ui ane ai, ma ua e faateleina lava lou talitane.

²⁶Ua e mulilua i tagata Aikupito ua outou tuaoi, o e tino latetele, ma ua faateleina lou talitane e faaonoono mai ai ia te au.

²⁷Faauta foi, ua ou faaloaloa atu lo‘u lima i luga ia te oe, ma ua ou faaitiitia au mea e ‘ai e tatau mā oe, ua ou tuuina atu foi oe i le pule a e ua ‘ino‘ino ia te oe, o afafine ia o Filisitia o e ua mamā i au amio ulavale.

²⁸Ua e talitane foi i tagata Asuria ina ua e le mălie lava, ua e talitane lava ia te i latou, a e te le āu mălie lava.

²⁹Ua e faateleina foi lou talitane i le nuu o Kanana ua oo i Kaletaia, a ua e le mălie ai lava.

³⁰Ua faapea ona vaivai o lou loto! o loo fetalai mai ai le Alii o Ieova, ina ua e faia o ia mea uma, o mea lava ua fai e le fafine talitane ma le faamatāitu;

³¹ina ua e fai lou fale taā i tuluiga o ala uma, ma ua e fai au mea maualuluga i malae uma, mona ua e le faapei o se talitane le ua tetee i le totogi;

³²a e pei o le avā ua mulilua, o lē talia tane ese a e tuu lana lava tane.

³³E avatua totogi i fafine talitane uma, a o oe ua e foai atu au totogi ia te i latou uma o e mananao ia te oe, ma ua e taui ia te i latou ia latou o ane ia te oe mai itu uma ona o au muliluaga.

³⁴Ua ese lava oe i nisi fafine i lou talitane, ina ua leai se mulimuli atu ia te oe e faitaaga ai; ma ua e avatu se totogi, a e leai se totogi e avane ia te oe; o le mea lea ua ese ai oe.

³⁵O le mea lea, le fafine talitane e, ia e faalogo mai ai i le afioga a Ieova.

³⁶O loo faapea ona fetalai mai o le Alii o Ieova; ua e sasaa atu au tupe, ma ua faaalia lou tino i lou talitane ua fai ma ē ua e manao i ai, atoa ma au tupua uma e inosia, ma le toto o au fanau, na e avatu ia te i latou;

³⁷faauta, o le mea lea ou te faapotopotoina ai i latou uma ua e manao i ai, o i latou ua e fiafia i ai, ma i latou uma ua e naunau i ai, atoa ma i latou uma ua e ‘ino‘ino i ai; ou te faapotopotoina lava i latou ia te oe mai itu uma ia leaga ai oe, ma ou faaalia ia te i latou lou tino, ina ia latou iloa lou tino uma.

³⁸Ou te faasala foi ia te oe, e pei ona faasalaina o fafine mulilulua, ma e ua faamaligi toto, ma ou avatu ia te oe le toto i le ita tele ma le fuā.

³⁹Ou te tuuina atu foi oe i o latou lima, latou te lepetia lou fale taā, ma lafo i lalo au mea maualuluga; latou te toeseina foi ou ofu, ma ave au mea matagofie, latou te tuua oe e le ufiufitia ma le le lavalavā.

⁴⁰Latou te ta‘ita‘iina ae le motu o tagata ia te oe, latou te fetogi ia te oe i maa, ma latou fasiotia oe i a latou pelu.

⁴¹Latou te susunu foi ou fale i le afi, latou te faasalaina foi oe i luma o fafine e toatele; ou te faagataina lou talitane, e te le toe avatu lava se totogi.

⁴²Ou te faaiuina ai lo‘u ita tele ia te oe, ona mavae ai lea o lo‘u fuā ia te oe; ona ou filemu ai lea, ma ou le toe ita lava.

⁴³Ua e le manatua aso ina o e teine itiiti, a ua e faaonoono mai ia te au i ia mea uma; faauta, o le mea lea ou te taui atu ai lau amio i luga o lou ulu o loo fetalai mai ai le Alii o Ieova, e le toe fai lea mea leaga e faaopoopo i au mea uma e inosia.

⁴⁴Faauta, o i latou uma o e fai upu faatusa latou te fai le faatusa ia te oe, e faapea ane, E pei o le tinā lana tama.

⁴⁵O le tama oe a lou tinā, o le na ‘ino‘ino i lana tane ma lana fanau; o le uso foi oe o ou uso o e na ‘ino‘ino i a latou tane ma a latou fanau; o lo outou tinā o lo sa Hetī, o lo outou tamā o lo sa Amorī.

⁴⁶O lou uso e matua, o Samaria lea, o ia ma ana tama fafine ua nofo i lou itu tauagavale; ma lou uso itiiti o lē nofo i lou itu taumatau, o Sotoma lea ma ana tama.

⁴⁷A ua e le savali i o latou ala, ua e le fai foi e tusa ma a latou mea e inosia, a ua e ‘ino‘ino i lea e peiseai se mea itiiti, e sili lava ona leaga o au amio uma i a latou.

⁴⁸Ua fetalai mai le Alii o Ieova, O loo ola a‘u, e lei faia e Sotoma lou uso, o ia ma ana tama, e pei ona faia e oe ma au tama.

⁴⁹Faauta, o le agasala nei a lou uso o Sotoma, na ia te ia ma ana tama, o le faamaualuga, o le tele o mea e ‘ai, ma le matuā nofonofo faatalanoa, na ia le fesoasoani foi i lē puapuaga, ma lē mativa.

⁵⁰Sa latou faamaualuluga, ma fai mea e inosia i o‘u luma; o le mea lea na ou aveeseina ai i latou e tusa ma mea na ou iloa.

⁵¹E lei faia e Samaria le vaeluagalemu o au agasala; a ua e faateleina au mea e inosia, ua sili lava ia te i latou; o au mea e inosia uma ua e faia ua ta‘uamiotonuina ai ou uso.

⁵²O oe foi o le ua faasalaina atu ou uso, ia ia te oe lou lava mā ona o au agasala uma ua e fai, e sili ona leaga i ā latou; e sili ona amiotonu i latou ia te oe; o oe foi ia e masiasi, ma ia ia te oe lou mā ina ua e ta‘uamiotonuina ou uso.

⁵³Ou te faafoisia la latou tafeaga, o le tafeaga foi a Sotoma ma ana tama, ma le tafeaga a Samaria ma ana tama; atoa ma le tafeaga a lou nuu ua tafea e faatasi ma i latou;

⁵⁴ina ia e mā lava, ma ia e masiasi, ona o mea uma ua e faia i lou faamafanafana atu ia te i latou.

⁵⁵E toe foi ou uso o Sotoma ma ana tama i ona tuga tuai, o Samaria foi ma ana tama e toe foi i ona tuga tuai i latou; o oe foi ma au tama e toe foi outou i ona tuga tuai.

⁵⁶A e lei ta‘ua lou uso o Sotoma i lou gutu i ona po o lou faamaualuga,

⁵⁷a o lei faaalia lau amio leaga, e pei o ona po na faifaia ai oe e tama fafine a Suria, atoa ma i latou i ona itu uma, o afafine o Filisitia, o e na ‘ino‘ino ia te oe i itu uma.

⁵⁸O lau amio leaga ma au mea e inosia ua tauia ia te oe, o loo fetalai mai ai Ieova.

⁵⁹Auā ua faapea ona fetalai mai o le Alii o Ieova, Ou te fai lava ia te oe e pei ona e faia, ua e faaleaogaina le tauto i lou soli o le feagaiga.

⁶⁰A e ou te manatua la ta feagaiga ma a‘u i ona po ina o e teine itiiti, ou te faatumauina foi ia te oe le feagaiga e faavavau.

⁶¹Ona e manatua ai lea au amio, ona e masiasi ai lea pe a e talia ou uso o e matutua ia te oe atoa ma e iti ia te oe; ou te avatua foi i latou ia te oe e fai ma au tama, a e le o lau feagaiga e ala ai.

⁶²Ou te faatumauina foi la ta feagaiga ma oe; e te iloa ai o a‘u lava o Ieova;

⁶³ina ia e manatunatu, ma ia e mā, ma ia le toe tautala lava ona o lou masiasi, pe a ou faamagalo atu ia te oe i mea uma ua e faia, o loo fetalai mai ai le Alii o Ieova.