Read Samoan Old Version Bible – O LE TUSI PAIA ESEKIELU, 17 Bible Online

ESEKIELU, 17 - Samoan Old Version Bible – O LE TUSI PAIA bible

ESEKIELU, 17

¹Ua oo mai le afioga a Ieova ia te au, ua faapea mai,

²Le atalii e o le tagata, ia e fai atu se tupua, ma sauni atu se faataoto i le aiga o Isaraelu; ia faapea atu,

³O loo faapea ona fetalai mai o le Alii o Ieova, O le aeto tele, ua tetele ona apaau, ma fulu apaau uumi, ua uluulu ona fulufulu, ma pulepule, na sau i Lepanona, ma na ave le moemoe o le arasi.

⁴Na ia fati le tumutumu o ona moemoe, ma na avea i le nuu faatauoa; ua ia tuu ai i le aai o tagata faatauoa.

⁵Na ia ave foi nisi fatu o le nuu, mana totōina ai i le fanua lafulemu, ua ia tuuina i tafatafa o le vai tele, ua tuu ai e pei o se sapasapa.

⁶Ua tupu foi, ma ua avea ma vine sosolo, ua maulalo lona tumutumu, ua sasau ane ona la ia te ia, ua i ai foi ona aa i lalo ia te ia; ua avea ma vine, ua tutupu ai la, ma matala mai ona lau.

⁷Na i ai foi le tasi aeto tele, ua tetele ona apaau, e tele foi ona fulufulu; faauta foi, o lea vine ua sosolo atu ona aa ia te ia, ua sasau atu foi ona la ia te ia, ia na faasūsū i ai i utu o lana faatoaga.

⁸Na totōina i le fanua lelei e lata ane i le vai tele, ina ia tutupu ona la, ma ia fua mai, ia fai foi ia ma vine tele.

⁹Ia e fai atu, o loo faapea ona fetalai mai o le Alii o Ieova, E manuia ea ia? E le liaiina ea e ia ona aa, ma salaesea ona fua, ina ia mago ai? E mago lau uma lava i ona la laau, a e le o le lima malosi, po o tagata e toatele e liaiina ai ona aa.

¹⁰Faauta foi, e manuia ea ia ina ua totōina? E le matuā mago ea pe a agi mai i ai le matagi mai sasae? E mago lava i utu na ia tupu ai.

¹¹Ua oo mai foi le afioga a Ieova ia te au, ua faapea mai,

¹²Ina fai atu ia i le aiga fouvale, Ua outou le iloa ea le uiga o ia mea? fai atu ia, Faauta, na sau le tupu o Papelonia i Ierusalema, na ia avea lona tupu, ma ona alii, na ia ave ia te i latou faatasi ma ia i Papelonia;

¹³na ia ave foi le tasi o le fanau a le tupu, ma osia le feagaiga ma ia, ma fai atu ia te ia ia tauto; na ia avea foi alii sili o le nuu;

¹⁴ina ia fai ma malo faatauvaa, ia le toe faamaualuga o ia, a ia tumau pe a anaana i lana feagaiga.

¹⁵A ua ia fouvale ia te ia i lona aauina atu o lana sāvali i Aikupito ina ia tuu mai ia te ia o solofanua ma tagata e toatele. E manuia ea ia? E sao ea lē fai mea faapea? E soli ea e ia le feagaiga a e faasaoina?

¹⁶Ua fetalai mai le Alii o Ieova, O loo ola a‘u, e moni, o le mea o i ai le tupu na tofia o ia ma tupu, e ana le tautoga na ia faaleaoga i ai, e ana foi le feagaiga na ia solia, e oti o ia i Papelonia i le mea o i ai o ia.

¹⁷O Farao foi, ma lana itu taua e toatele, ma ana ‘au e tele, e le aoga ia ia te ia i le taua i le tanu o mea mautietie, ma le faiga o ‘olo e faaumatia ai tagata e toatele.

¹⁸Ua ia faaleaoga le tauto i lona soli o le feagaiga; faauta foi, na ia avatu lava lona lima, ua ia faia ia mea uma, na te le sao lava.

¹⁹O le mea lea ua faapea ona fetalai mai ai o le Alii o Ieova, O loo ola a‘u, e moni, o le tauto i lo‘u igoa ua ia faaleaogaina, ma la‘u feagaiga ua ia solia, ou te matuā taui atu ai i lona ulu.

²⁰Ou te folasia la‘u upega ia te ia, e lāvea o ia i la‘u mailei, ou te ave foi ia te ia i Papelonia, ma ou faasalaina o ia i lea mea, ona o lana agasala ua ia agasala mai ai ia te au.

²¹O ona tagata uma e sosola, ma ana ‘au uma e oti i latou i le pelu; e faataapeapeina foi e o totoe i matāmatagi uma, tou te iloa ai o a‘u lava o Ieova ua ou fai atu ai.

²²Ua faapea ona fetalai mai o le Alii o Ieova, Ou te ave e a‘u le moemoe o le arasi maualuga, ma ou totōina; ou te fati foi se mea mu‘amu‘a ai le tumutumu o ona moemoe, ma ou totōina i le mauga e sili ona maualuga.

²³O le mauga maualuga o Isaraelu ou te totōina ai; e tutupu ai la, ma fua mai, e avea foi ma arasi tele; e i ona lalo ifo o manu felelei uma e uiga eseese, latou te aofaga i le paolo o ona la.

²⁴E iloa ai laau uma o le vao, o a‘u o Ieova, ua ou faamaulaloina le laau maualuga, ma ou faamaualugaina le laau maulalo, ua ou faamagoina le laau mata, ma ou faalauolaolaina le laau na mago. O a‘u o Ieova, na ou fai atu, ma ou faia lava.