Read Samoan Old Version Bible – O LE TUSI PAIA ESEKIELU, 18 Bible Online

ESEKIELU, 18 - Samoan Old Version Bible – O LE TUSI PAIA bible

ESEKIELU, 18

¹Ua oo mai foi le afioga a Ieova ia te au, ua faapea mai,

²Se a le mea ua outou fai ai lenei faatusa i le laueleele o Isaraelu, e faapea, Ua ‘aina e tamā o vine moto, a e magiagia ai nifo o le fanau?

³O loo ola a‘u, o loo fetalai mai le Alii o Ieova, e le toe fai lava e outou lena faatusa i Isaraelu.

⁴Faauta, o agaga uma, o o‘u lava i latou; e pei o le agaga o le tamā ona fai mo‘u, e faapea foi le agaga o le atalii; o le tagata e agasala e oti ia.

⁵A e afai e amiotonu le tagata, ma ua faia e ia le amio e tatau, ma le amiotonu,

⁶ua ia le ‘ai i luga o mauga, ua ia le tepa ae i tupua o le aiga o Isaraelu, ua ia le faaleagaina le avā a le tasi tagata, ua ia le faalatalata ane i se fafine o loo ona o faia le ma‘i,

⁷ua ia le faasaua i se tasi, ua ia toe avatu le mea na tuu faafaatau e le ua aitalafu ia te ia, ua ia le fao se mea a se tasi, ua avatu ana mea e ‘ai i le ua fia ‘ai, ua faaofuina foi le ua le lavalavā;

⁸e lei avatu se mea e au mai ai se totogi faasili, e lei talia se mea e faasili, ua faafoi lona lima ai le amioletonu, ma ua ai faamasinoga tonu i lea tagata ma lea tagata,

⁹ua ia savali i a‘u tulafono, ua anaana i a‘u faamasinoga; e faia ma le faamaoni, ua amiotonu o ia; e ola lava ia, o loo fetalai mai ai le Alii o Ieova.

¹⁰Afai e fanaua e ia se atalii e saua, ma le faamaligi toto, ma ua faia se tasi o ia mea,

¹¹ua ia le faia foi ia mea tatau uma, a ua ‘ai i luga o mauga, ma ua faaleagaina le avā a le tasi tagata,

¹²ua ia faasaua i le ua puapuaga ma le ua mativa, ua ia fao mea, e lei toe avatu le mea na tuu faafaatau, ua tepa ae i tupua, ma ua fai mea e inosia,

¹³ua ia avatu mea e au mai ai se totogi faasili, ua ia talia foi mea e faasili, pe ola ea ia? E le ola lava; ua ia faia ia mea uma e inosia, e matuā oti lava o ia; e ia te ia lava lona toto.

¹⁴Faauta foi, a fanaua e ia sona atalii, a vaai e ia i agasala uma e faia e lona tamā, ma ua mafaufau, ma ua le faia e ia mea faapea;

¹⁵e lei ‘ai i luga o mauga, e lei tepa ae i tupua o le aiga o Isaraelu, e lei faaleagaina le avā a le tasi tagata,

¹⁶e lei faasaua foi o ia i se tasi, e lei taofia le mea na tuu faafaatau, e lei faoa foi se mea, a ua foai atu ana mea e ‘ai i le fia ‘ai, ma ua faaofuina e ia le ua le lavalavā,

¹⁷ua ia faafoi lona lima ai le ua puapuagatia, ua le talia se totogi faasili, po o se mea e faasili, ua usiusitai i a‘u faamasinoga, ma savali i a‘u tulafono; e le oti o ia ona o le agasala a lona tamā, a e ola lava ia.

¹⁸A o lona tamā, ona ua ia matuā faasaua, ua ia faoa mea a le tasi tagata; ma ua fai le mea e le lelei i lona nuu, faauta, e oti o ia i lana agasala.

¹⁹A ua outou fai mai, E le tauia i se a i le atalii le agasala a le tamā? Afai e faia e le atalii le amio tatau ma le amiotonu, ua tausi i a‘u tulafono uma, ma ua faia, e ola lava ia.

²⁰O le tagata e agasala e oti lava ia; e le tauia le agasala a le tamā i le atalii, e le tauia foi le agasala a le atalii i le tamā; o le amiotonu a le ua amiotonu e i ona luga lava lea, o le amio leaga foi a le ua amio leaga e i ona luga lava lea.

²¹A e afai e liliu ese le ua amio leaga ai ana agasala uma ua na faia, ma tausi i a‘u tulafono uma, ma faia e ia le amio tatau ma le amiotonu, e ola lava ia, e le oti.

²²O ana solitulafono uma na ia faia e le ta‘uta‘ua ia te ia; o lana amiotonu ua ia faia, e ola ai o ia.

²³O loo fetalai mai le Alii o Ieova, Ou te fiafia ea i le oti o le ua amio leaga? ou te le fiafia ea pe a liliu ese i lona ala ia ola ai o ia?

²⁴A e afai e liliu ese le ua amiotonu i lana amiotonu, ma ua fai amio leaga, ma ua fai e tusa ma mea uma e inosia e faia e le ua amio leaga, e ola ea ia? O lana amiotonu uma na ia faia, e le manatua; o lana agasala ua ia agasala ai, ma ona sese ua ia sese ai, ona o ia mea e oti ai o ia.

²⁵A ua outou fai mai, E le tusa le ala o le Alii. Ina faalogologo mai ia, le aiga o Isaraelu e, E le tusa ea lo‘u ala? E le ua le tutusa ea o outou ala?

²⁶A liliu ese le ua amiotonu i lana amio, ma ua fai amio leaga, ma oti ai; o lana lava amio leaga ua ia fai e oti ai o ia.

²⁷A liliu ese foi le ua amio leaga i lana amio leaga na ia faia, ma ua fai le amio tatau ma le amiotonu, e faaolaina e ia lona agaga.

²⁸Auā ua ia mafaufau, ma liliu ese i lona solitulafono uma na ia faia, e ola lava ia, e le oti.

²⁹A ua fai mai le aiga o Isaraelu, E le tusa le ala o le Alii. Le aiga o Isaraelu e, e le tutusa ea o‘u ala? E le ua le tutusa ea o outou ala?

³⁰O le mea lea ou te faamasino ai ia te outou, le aiga o Isaraelu, taitoatasi e tusa ma ona ala, o loo fetalai mai ai le Alii o Ieova. Liliu mai ia, ina liliu ese i o outou solitulafono uma; ona le faia lea o le agasala ma mea e tausuai ai outou.

³¹Ina lafoai ia o outou solitulafono uma ua outou solitulafono ai, ma ia fai mo outou se loto fou, ma se agaga fou; auā pe se a ea le mea tou te fia oti ai, le aiga o Isaraelu e?

³²Auā ou te le fiafia lava i le oti o lē oti, o loo fetalai mai ai le Alii o Ieova; o lenei, liliu mai ia outou tou te ola ai.