Read Samoan Old Version Bible – O LE TUSI PAIA ESEKIELU, 21 Bible Online

ESEKIELU, 21 - Samoan Old Version Bible – O LE TUSI PAIA bible

ESEKIELU, 21

¹Ua oo mai foi le afioga a Ieova ia te au, ua faapea mai,

²Le atalii e o le tagata, ia faasaga ou mata i Ierusalema, ma faapaū atu lau upu i mea paia, ma ē vavalo atu i le laueleele o Isaraelu,

³ma ē fai atu i le laueleele o Isaraelu, O loo faapea ona fetalai mai o Ieova, Faauta, ua ou fai oe mo‘u fili, ou te to ae la‘u pelu ai lona faamoega, ma ou faaumatia le ua amiotonu, ma le ua amio leaga ua ia te oe.

⁴O le a ou faaumatia le ua amiotonu, ma le ua amio leaga ua ia te oe, o le mea lava lea e alu atu ai la‘u pelu ai lona faamoega i tagata uma, e pau mai i le itu i toga, e pau mai i le itu i matu;

⁵e iloa ai e tagata uma, o a‘u o Ieova, ua ou toina ae la‘u pelu ai lona faamoega; e le toe foi ane ai lava.

⁶O oe foi, le atalii o le tagata, ia e mapuitiga ona ua gau o lou papatua; ia e mapuitiga ma le oono tele i o latou luma.

⁷A latou fai mai foi ia te oe, Pe se a le mea e te mapuitiga ai? E te tali atu, Ona o le tala, auā o le a oo mai; e liu suāvai loto uma, e vaivai lima uma, e faavaivai loto uma, e liu suāvai foi tulivae uma; faauta, o loo sau, e faataunuuina lava, o loo fetalai mai ai le Alii o Ieova.

⁸Ua oo mai foi le afioga a Ieova ia te au, ua faapea mai,

⁹Le atalii e o le tagata, ia e vavalo, ia faapea atu, O loo faapea ona fetalai mai o Ieova, Fai atu ia, O le pelu, o le pelu ua faamaaia, ma ua faapupulaina.

¹⁰Ua faamaaia ina ia tele ai le fasi, ua faapupulaina, ia pupula; a tatou olioli ea? O le tootoo o lo‘u atalii ua faaleaogaina ai laau uma.

¹¹Ua ia avatu ai ia faapupulaina, ina ia umia i le lima; ua faamaaia lenei pelu, ma ua faapupulaina, ina ia tuuina atu i le lima o le na te fasioti.

¹²Alaga ia, ma uio, le atalii e o le tagata, auā e i ai ia i lo‘u nuu, e i ai i alii sili uma o Isaraelu; ua tuuina atu i latou i le pelu faatasi ma lo‘u nuu; o le mea lea ia e pōpō ai i lou vae.

¹³Auā ua tofotofoina ia. I le faapefea pe a faaleaogaina le tootoo e le pelu? E mavae lava ia, o loo fetalai mai ai le Alii o Ieova.

¹⁴O oe na foi, le atalii o le tagata, ia e vavalo atu, ma ia e pati lima, ma ia foi faalua le pelu, ia faatolu lava, o le pelu ua oti ai e ua fasia; o le pelu lea o le ua fasia, le ua sili, e puipui atu ia te i latou.

¹⁵Ua ou tuu atu le pelu matautia i o latou faitotoa uma, ina ia faavaivai ai o latou loto, ma ia faateleina le malaia. Aue! ua faapupulaina ia, ua saunia e fasi a‘i.

¹⁶Alu ia i lea itu po o lea itu, o le itu taumatau, po o le itu tauagavale, so se mea ua faasaga i ai ou mata.

¹⁷O a‘u foi, ou te pati lima, ma ou faaiuina lo‘u ita; o a‘u o Ieova, ua ou fai atu ai.

¹⁸Ua oo mai foi le afioga a Ieova ia te au, ua faapea mai,

¹⁹O oe na foi, le atalii o le tagata, ia e totofi i ala e lua e oo mai ai le pelu a le tupu o Papelonia; e o mai i laua mai le nuu e tasi, filifili ia oe i se mea, filifili i le tuluiga o le ala i le aai.

²⁰Ina totofi ia se ala e oo mai ai le pelu i Rapa o le fanauga a Amoni, ma Iuta i Ierusalema ua nofo ‘olo.

²¹Auā na tu le tupu o Papelonia i fetaulaigāala i le mea e vala lua ai le ala, e fai togafiti faataulāitu, na ia luluina ana u fanafana, na ia fesili atu i tupua, na ia iloilo i le ate.

²²Na i lona itu taumatau le togafiti faataulāitu ia Ierusalema e faatu atu ai mea e lepeti a‘i, e tautala atu ai i le taua, e alalaga atu ai ma le leo tele, e faatu atu i faitotoa o mea e lepeti a‘i, e tanu ai se mea mautietie, ma fai ai se ‘olo.

²³E fai foi lea ia te i latou e peiseai se togafiti faataulāitu pepelo i le manatu o e na tauto i tautoga ia te i latou; a e manatua e ia o amio leaga ina ia pūea i latou.

²⁴O le mea lea o loo faapea ona fetalai mai ai o le Alii o Ieova, Ua manatua a outou amio leaga ona o outou, ina ua mānu a outou solitulafono, ma ua aliali mai a outou agasala i a outou mea uma e fai; ona ua manatua outou, e pūea outou i le lima.

²⁵O oe na foi, le alii sili o Isaraelu, o lē faalematau ma le amio leaga, ua oo mai lona aso, o ona po e iu ai le amio leaga.

²⁶Ua faapea ona fetalai mai o le Alii o Ieova, Ave ese ia le pulou ie, to ese ia le palealii; e le o lea lenei mea; e faamaualugaina le ua maulalo, a e faamaulaloina le ua maualuga.

²⁷Ou te fulisia, fulisia, fulisia, e le toe i ai lava lea, seia afio mai o ia ua i ai le tonu, ona ou avatua ai lea ia te ia.

²⁸O oe na foi, le atalii o le tagata, ia e vavalo, ia faapea atu, O loo faapea ona fetalai mai o le Alii o Ieova i le fanauga a Amoni, ma la latou faifai, fai atu lava i ai, O le pelu, o le pelu, ua to ae e fasi a‘i; ua faapupulaina e faaumatia ai ona o le pupula;

²⁹ina o latou vaaia le mea faatauvaa e fai atu ai ia te oe, ina o latou valoia le mea pepelo ia te oe, e tuu atu oe i luga o ua o e ua fasia, e ua amio leaga, o e ua oo mai lo latou aso, o ona po e iu ai le amio leaga.

³⁰Ou te faafoisia ea le pelu i lona faamoega? Ou te faasalaina oe i le mea na tupu ai oe, o le nuu na fanau ai oe.

³¹Ou te sasaa foi lo‘u ita i luga ia te oe, ou te tapili le afi o lo‘u ita ia te oe, ma ou tuuina atu oe i lima o tagata valelea, ua popoto i fasi tagata.

³²E fai oe ma fafie mo le afi; e i ai lou toto i totonu o le nuu; e le toe manatua lava oe; auā o a‘u o Ieova ua ou fai atu ai.