Read Samoan Old Version Bible – O LE TUSI PAIA ESEKIELU, 23 Bible Online

ESEKIELU, 23 - Samoan Old Version Bible – O LE TUSI PAIA bible

ESEKIELU, 23

¹Ua oo mai foi le afioga a Ieova ia te au, ua faapea mai,

²Le atalii e o le tagata, o fafine e toalua, o tama a le fafine e toatasi,

³na la talitane i Aikupito; na la talitane a o teine muli i laua; na omia ai o laua susu; na tatao ai susu o laua o taupou.

⁴O la igoa foi, o Aola le matua, ma Aolipa lona uso; na fai foi i laua ma‘u, na la fananau foi tama tane ma tama teine. A o laua igoa, o Aola o Samaria lea, o Aolipa o Ierusalema lea.

⁵Na mulilua Aola ina o fai ma‘u; na ia tu‘inanau atu foi i e na mananao ia te ia, o Asuria o e vāvā lalata ma ia.

⁶Ua oofu i latou i ofu uli, o ta‘ita‘i, ma faipule, o taulelea aulelei i latou uma, o ‘au o tietie i solofanua.

⁷Na ia talitane ia i latou, o i latou uma o aupito sili i tagata o Asuria, ma i latou uma na ia tu‘inanau i ai; na faaleagaina o ia e ia i a latou tupua uma.

⁸Na ia le tuua lona talitane mai Aikupito; auā na latou momoe ma ia ina o teine muli, na latou tatao foi ona susu o taupou o ia, ma sasaa a latou faitaaga i luga ia te ia.

⁹O le mea lea na ou tuuina atu ai o ia i lima o e na mananao ia te ia, o lima lava o tagata o Asuria, na ia tu‘inanau i ai.

¹⁰O i latou ua latou faatelenoa ia te ia; na latou ave foi ana tama tane ma ana tama teine; na latou fasioti foi ia te ia i le pelu, ona logologoa lea o ia i fafine ina ua latou faasalaina o ia.

¹¹Ua iloa e lona uso o Aolipa, ona faasili lea e ia o lona tu‘inanau i le tu‘inanau o lona uso, ma lona talitane na sili i le talitane o lona uso.

¹²Na ia tu‘inanau i tagata o Asuria, o e vava lalata ma ia, o ta‘ita‘i ma faipule o loo oofu faamatagofie lava, o ‘au o tietie i solofanua, o taulelea ‘aulelei i latou uma.

¹³Ona ou iloa lea ua leaga o ia, ua tasi lava lo laua ala.

¹⁴Ua faateleina e ia lona talitane; auā na ia iloa tane na tusia i le pa, o faatagata foi o Kaletaia, ua tusia i le vali mūmū,

¹⁵ua fusia o latou sulugatiti i fusi, ua i o latou ulu o pulou lanu eseese, e tino mai i alii ta‘ita‘i ‘au i latou uma, e pei o tagata Papelonia o Kaletaia ia, o le nuu na fanau ai i latou.

¹⁶Ua ia vaai atu i ai, ona ia tu‘inanau atu ai lea ia te i latou; na ia aauina atu foi auauna ia te i latou i Kaletaia.

¹⁷Ona o mai ai lea o tagata o Papelonia ia te ia i le moega e faatasi ai, ona latou faaleaga lea ia te ia i a latou faitaaga, ona leaga ai lea o ia ia te i latou, ona liliu ese ai lea o lona loto ia te i latou.

¹⁸Na ia faaalia lona talitane, na ia faaalia foi lona le lavalavā; ona liliu ese ai lea o lo‘u loto ia te ia, e pei ona liliu ese o lo‘u loto i lona uso.

¹⁹A ua ia faateleina lona talitane i lona manatu i ona po ina o teine muli o ia, na ia talitane ai i le nuu o Aikupito.

²⁰Auā na ia tu‘inanau atu ia latou momoe ma ia, o latou tino e pei o le tino o le asini, ma le sua o latou tino e pei o le sua o le tino o le solofanua.

²¹Ua e toe manatua mea leaga na e faia ina o e teine muli, ina ua omia ou susu e tagata o Aikupito ona o ou susu ina o e teine muli.

²²O le mea lea, Aolipa e, o loo faapea ona fetalai mai ai o le Alii o Ieova, Faauta, ou te faaoso e tau ma oe e sa mananao ia te oe, o e ua liliu ese ai lou loto, ou te aumaia i latou mai itu uma, latou te tau ma oe;

²³o tagata o Papelonia, atoa ma Kaletaia uma, o Pekota, ma Soa, ma Koa, o tagata uma o Asuria e faatasi ma i latou; o taulelea aulelei, o ta‘ita‘i, ma faipule i latou uma, o e ave ‘au ma e ta‘ua, o tietie i latou uma i solofanua.

²⁴E o mai i latou ia te oe ma auupega, ma kariota, ma mea taavavale, ma ‘au o nuu; latou te vagaia oe ma le talipupuni, ma le talita, ma le puloutau; ou te tuuina foi le faamasinoga i o latou luma, latou te faamasino ia te oe e tusa ma a latou faamasinoga.

²⁵Ou te faaoo atu lo‘u fuā ia te oe, latou te faasaua lava ia te oe; latou te fisiesea lou isu, ma ou taliga; e oti i le pelu e ua totoe ia te oe; latou te ave au tama tane ma au tama fafine, e faaumatia foi i le afi e ua totoe ia te oe.

²⁶Latou te toese foi ia te oe ou ofu, ma ave au teuga matagofie.

²⁷Ou te faaiuina lou leaga ma lou talitane mai le nuu o Aikupito; ona e le toe faasaga ae lea o ou mata ia te i latou, ma ē le toe manatua lava Aikupito.

²⁸Auā o loo faapea ona fetalai mai o le Alii o Ieova, Faauta, ou te tuuina atu oe i lima o e ua e ‘ino‘ino i ai, o lima o e ua liliu ese ai lou loto.

²⁹Latou te ‘ino‘ino lava ia te oe, latou te ave foi au mea uma sa e tautiga ai, latou te tuua oe e le ufiufitia ma le le lavalavā; e faaalia foi le leaga o lou talitane, o lou ulavale atoa ma au faitaaga.

³⁰Ou te faia ia mea ia te oe, auā ua e mulimuli atu i nuu ese e faitaaga ai, o i latou ia ua leaga ai oe i a latou tupua.

³¹Ua e savali i le ala o lou uso; o le mea lea ou te tuuina atu ai lana ipu i lou lima.

³²Ua faapea ona fetalai mai o le Alii o Ieova, E te inu i le ipu a lou uso, e loloto ma le tele, e fai oe ma mea e featani ai ma tauemuina ai; e tele lava mea o i ai.

³³E faatumuina oe i le onaga ma le faanoanoa, o le ipu o le fememeai ma le faatafunuaga, o le ipu a lou uso o Samaria.

³⁴E te inu ai ma mitia lava, e te taei foi i ona taega ipu, ma e saeia ou lava susu; auā o a‘u ua ou fai atu ai, o loo faapea mai ai le Alii o Ieova.

³⁵O le mea lea o loo faapea ona fetalai mai ai o le Alii o Ieova, Ua e faagalogalo mai ia te au, ma ua e lafoaiina a‘u i ou tua, o le mea lea ia taui ai ia te oe o lou ulavale, ma au faitaaga.

³⁶Ua fetalai mai foi Ieova ia te au, Le atalii e o le tagata, e te le faamasino ea ia Aola ma Aolipa, ma e faaali ia te i laua mea e inosia?

³⁷Auā ua la mulilulua, ua i ai foi le toto i o laua lima; ua la mulilulua i a la tupua; o a laua fanau foi na la fanau mai ai ia te au, ua la faaui ane i le afi, ia faaumatia ai mo i latou.

³⁸Ua la faia foi lenei mea ia te au; ua la faaleagaina lo‘u malumalu i lea lava aso, ma o‘u sapati ua la solia;

³⁹ua la fasia a laua fanau mo tupua, ona o mai ai lea o i laua i lo‘u malumalu i lea lava aso e soli ai; faauta foi, na faapea ona la faia i totonu o lo‘u fale.

⁴⁰I le ma lea foi, ua oulua feauina tane ia o mai i le mea mamao, na auina atu ia te i latou le auauna, faauta foi, na latou o mai; na e taele ona o i latou, ma e valia ou mata, ma e teuteu i mea e faamatagofie a‘i.

⁴¹Na e nofo foi i luga o le moega lalelei, ua saunia le laulau i ona luma, na e faaeeina i ona luga a‘u mea manogi, ma a‘u suāuu.

⁴²Na ia te ia foi le leo o le vao tagata ua nonofo faatalanoa; na aumaia foi ia te ia e faatasi ma tagata lautele, o tagata Sepea mai le vao, sa i ai taulima i o latou lima, ma pale matagofie i o latou ulu.

⁴³Ona ou fai atu ai lea ia te ia le ua loa ona fai pea o muliluaga, Latou te faitaaga lava ea ma ia, o ia foi ma i latou?

⁴⁴A ua latou o ane lava ia te ia, e pei ona latou o ane i le fafine talitane, na faapea ona latou o ane ia Aola ma Aolipa, o fafine ulavavale.

⁴⁵O tagata amiotonu latou te faamasino ia te i laua, e pei ona faamasino o fafine mulilulua, e pei ona faamasino foi o fafine e faamaligi toto; auā o fafine mulilulua i laua, ua i ai foi le toto i o laua lima.

⁴⁶Auā o loo faapea ona fetalai mai o le Alii o Ieova, Ou te aveina ae le motu o tagata ia te i laua, ou te tuuina atu foi i laua ia faasaunoaina, ma ia vetea a laua mea.

⁴⁷E fetogia i laua e le motu o tagata i maa, e taia i laua i a latou pelu; latou te fasiotia foi a laua tama tane ma a laua tama fafine, ma susunuina o laua fale i le afi.

⁴⁸Ona ou faagataina lea o le ulavale i le nuu, ina ia a‘oa‘o ai fafine uma ia le toe fai e pei o lo oulua ulavale.

⁴⁹Latou te taui atu lava lo oulua ulavale ia te oulua, e taui foi ia te oulua le agasala i a oulua tupua; ona oulua iloa ai lea o a‘u lava o le Alii o Ieova.