Read Samoan Old Version Bible – O LE TUSI PAIA ESEKIELU, 24 Bible Online

ESEKIELU, 24 - Samoan Old Version Bible – O LE TUSI PAIA bible

ESEKIELU, 24

¹Ua oo mai foi le afioga a Ieova ia te au i le iva o tausaga i le sefulu o masina, i le aso e sefulu o le masina, ua faapea mai,

²Le atalii e o le tagata, ia e tusia le igoa o le aso, o lenei lava aso; na papai le tupu o Papelonia i Ierusalema i lenei lava aso.

³Sauni atu ia se faataoto i le aiga fouvale, ma fai atu ia te i latou, O loo faapea ona fetalai mai o le Alii o Ieova, Faaee ia se ulo, ina faaee ia, ma liligi i ai se vai.

⁴Faapotopoto i ai ona tufaaga, o tufaaga lelei uma; o le alagavae, ma le alagalima, ina faatumu ia i ivi e sili ona lelei.

⁵Ina ave ia e ua sili ona lelei o le lafu mamoe, ma faaputuina ivi i ona lalo, ia faavevela ia, ia pupuna, ma ia latou tunua ivi o i ai.

⁶O le mea lea ua faapea ona fetalai mai ai o le Alii o Ieova, Oi talofa i le aai o e totolima, o le ulo ua i ai lona otaota, ma ua le te‘a ese ai lona otaota. Ina to ae ia tufaaga taitasi, aua ne‘i fai i ai se vili.

⁷Auā o loo i totonu ia te ia le toto o lana fasi; na ia tuu ai i luga lava o le papa iila; ua ia le sasaa i ai i le eleele e ufitia ai i le efuefu.

⁸Ua ou tuuina le toto o lana fasi i luga o le papa iila, ia le ufitia, ina ia faatupuina ai le ita, ia matuā taui atu ai.

⁹O le mea lea o loo faapea ona fetalai mai ai o le Alii o Ieova, Oi talofa i le aai o e totolima; o a‘u, ou te faateleina le faaputugafafie.

¹⁰La‘u tele ane ia o fafie, ina faamumū ia le afi, ia faaumatia le aano, ia matuā faamanogi i ai, o ivi foi ia susunuina.

¹¹I le faaee ane ai e le sua, i luga i ona malala, ina ia vevela lona ‘apa memea, ma ia aasa, ia usi ai lona leaga i totonu, ia faaumatia lona otaota.

¹²Ua lailoa lava ia i galuega mamafa, a e lei mavae atu lona otaota tele ia te ia; e i le afi lona otaota.

¹³E i ai le ulavale i lou leaga, auā ua ou faamamāina oe, a e lei mamā oe; e le toe faamamāina lava oe i lou leaga, seia ou faataunuu atu lo‘u ita ia te oe.

¹⁴O a‘u o Ieova ua ou fai atu, e oo lava, ou te faia lava; ou te le tuua, ou te le faasaoina, ou te le salamo; latou te faamasino ia te oe e tusa ma ou ala, ma au mea ua e faia, ua fetalai mai ai le Alii o Ieova.

¹⁵Ua oo mai foi le afioga a Ieova ia te au, ua faapea mai,

¹⁶Le atalii e o le tagata, faauta, o le a ou aveeseina ia te oe, i le mala, le ua e fiafia i ai; a e te le tagitu‘i, e te le tagi, e le maligi ifo foi ou loimata.

¹⁷Ia e oi lemu, aua le faanoanoa i e ua oti, nonoa ia lou pale ia te oe, ma faasee ou vae, aua le ufitia lou laugutu aupitoaluga, aua foi e te ‘ai le mea e ‘ai a tagata.

¹⁸Ona ou tautala atu lea i le nuu i le taeao, na oti foi la‘u avā i le afiafi; ona ou fai lea i le taeao e pei ona poloaiina mai ai o a‘u.

¹⁹Ona fai mai ai lea o le nuu ia te au, E te le faaali mai ea ia te i matou, po o a ea ia mea ia te i matou ua e faia?

²⁰Ona ou fai atu ai lea ia te i latou, Na oo mai le afioga a Ieova ia te au, ua faapea mai,

²¹Fai atu ia i le aiga o Isaraelu, O loo faapea ona fetalai mai o le Alii o Ieova, Faauta, ou te faaleagaina lo‘u malumalu, o lo outou malosi tou te mitamita ai, o le mea ua outou fiafia i ai, ma le mea ua naunau i ai o outou loto; o outou atalii foi ma o outou afafine o e ua tuua e outou, e oti i latou i le pelu.

²²Tou te fai foi e pei ona faia e a‘u; tou te le ufitia o outou laugutu aupitoaluga, tou te le aai foi le mea e ‘ai a tagata.

²³E i ai o outou pale i o outou ulu, ma o outou seevae i o outou vae; tou te le tagitu‘i, tou te le fetagisi; a e tauāu ina faaumatia outou ona o a outou agasala, tou te feoi foi le tasi i le tasi.

²⁴O lea e fai ai Esekielu ma faailoga ia te outou; e faapei o mea uma ua faia e ia e faapea foi ona faia e outou; a oo mai lea mea, ona outou iloa ai lea o a‘u lava o le Alii o Ieova.

²⁵O oe na foi le atalii o le tagata, o le aso ou te aveeseina ai ia te i latou lo latou malosi, o le fiafia i lo latou mamalu, o le mea ua latou fiafia i ai, o le mea ua naunau i ai o latou loto, o latou atalii ma o latou afafine,

²⁶e le sau ea ia te oe le ua sao i lea aso e logologo ai ia te oe?

²⁷O le aso lea e faagaganaina ai oe i le ua sao mai, ona e tautala lea, ma e le toe faalologo; e fai foi oe ma faailoga ia te i latou; ona iloa ai lea e i latou o a‘u lava o Ieova.