Read Samoan Old Version Bible – O LE TUSI PAIA ESEKIELU, 29 Bible Online

ESEKIELU, 29 - Samoan Old Version Bible – O LE TUSI PAIA bible

ESEKIELU, 29

¹O lona sefulu o tausaga, o lona sefulu foi o masina, o le aso e sefulu ma le lua o le masina, na oo mai ai le afioga a Ieova ia te au, ua faapea mai,

²Le atalii e o le tagata, ia e faasaga atu ia Farao le tupu o Aikupito, ma vavalo atu ia te ia atoa ma Aikupito uma;

³ia e fai atu, ia faapea atu, O loo faapea ona fetalai mai o le Alii o Ieova, Faauta, ou te fai oe mo‘u fili, Farao e, le tupu o Aikupito, le tanimo tele, o lē taoto i totonu o ona vaitafe, o le fai mai, O lo‘u vaitafe, o lo‘u lava lea, na ou faia mo a‘u.

⁴Ou te tuu ane mātau i ou auvae, ma ou faapipiiina i‘a o i ou vaitafe i ou una, ou te avae foi ia te oe ai totonu o ou vaitafe; o i‘a uma foi o ou vaitafe e pipii ia i ou una.

⁵Ou te tuua foi oe i le vao, o oe ma i‘a uma o ou vaitafe; e paū oe i le fogāeleele, e le faapotopotoina oe, e le aofia foi; ua ou tuuina atu oe e fai ma mea e ‘ai a manu feai e tataa, ma manu felelei.

⁶E iloa ai foi ē nonofo i Aikupito uma o a‘u lava o Ieova, auā sa fai i latou ma tootoo u i le aiga o Isaraelu.

⁷Na latou tago atu i lou lima, ona gausia lea o oe, ona masae ai lea o latou tau‘au uma; ua latou totoo ia te oe, ona gausia lea o oe, ona tuu atu lea o i latou e tutū na o i latou lava.

⁸O le mea lea o loo faapea ona fetalai mai ai o le Alii o Ieova, Faauta, ou te faaooina atu le pelu ia te oe, ma ou faaumatia ai tagata atoa ma manu o ia te oe.

⁹E faatafunaina, ma faagaogaoina le nuu o Aikupito; latou te iloa ai foi o a‘u lava o Ieova; auā na ia fai ane, E o‘u le vaitafe, na ou faia.

¹⁰Faauta, o le mea lea ou te fai ai oe mo‘u fili atoa ma ou vaitafe; ou te matua faagaogaoina ma faatafunaina le nuu o Aikupito, e pau atu i Mekatala e pau mai i Seveni, e oo lava i le tuaoi o Aitiope.

¹¹E le ui atu ai vae o tagata; e le ui atu ai foi vae o manu; e le āina foi ia i tausaga e fagafulu.

¹²Ou te faatafunaina le nuu o Aikupito faatasi ma nuu ua faatafunaina; o ona aai foi faatasi ma aai ua faagaogaoina; e faatafunaina ai i tausaga e fagafulu; ou te faataapeapeina Aikupito i nuu, ma ou faasalalauina i latou i nuu eseese.

¹³A ua faapea ona fetalai mai o le Alii o Ieova, A mavae tausaga e fagafulu, ona ou faapotopotoina lea o Aikupito ai nuu na faataapeapeina ai i latou.

¹⁴Ou te faaea le tafeaga o Aikupito, ma ou faafoisia i latou i le nuu o Patoro, o le nuu o lo latou tupuaga, e avea foi i latou i lea mea ma malo faatauvaa.

¹⁵E sili ona faatauvaa ia i malo, e le toe faamaualuga ia i nuu; auā ou te faatoaitiitiina i latou, ia latou le toe pule i nuu.

¹⁶E le toe fai foi i latou ma faatuatuaga o le aiga o Isaraelu, e faamanatuina ai a latou amio leaga i lo latou faasaga atu i ai; a e iloa e i latou o a‘u lava o le Alii o Ieova.

¹⁷O lona lua o sefulu ma le fitu o tausaga, o lona masina muamua, o le aso muamua o le masina, na oo mai ai le afioga a Ieova ia te au, ua faapea mai,

¹⁸Le atalii e o le tagata, na pule Nepukanesa le tupu o Papelonia itu lana ia taua i latou faia le galuega tele i Turo; na tutula ai ulu uma, na fatuamoa foi o latou ua; a e leai se totogi ia te ia ma lana itu taua i Turo i le galuega na ia fai ai.

¹⁹O le mea lea ua fāapea ona fetalai mai ai o le Alii o Ieova, Faauta, ou te avatu ia Nepukanesa le tupu o Papelonia le nuu o Aikupito; na te avea lona vao tagata, na te vetea foi le vete ma faoa le oloa; e fai foi ia ma totogi i lana itu taua.

²⁰Ua ou avatu ia te ia le nuu o Aikupito ona o le galuega na ia faia; auā na latou galulue mo a‘u, ua fetalai mai ai le Alii o Ieova.

²¹O lea lava aso ou te faatupuina ai le nifo o le aiga o Isaraelu; ou te tuu atu foi ia te oe e tautala ia te i latou; ona latou iloa ai lea o a‘u lava o Ieova.