Read Samoan Old Version Bible – O LE TUSI PAIA ESEKIELU, 3 Bible Online

ESEKIELU, 3 - Samoan Old Version Bible – O LE TUSI PAIA bible

ESEKIELU, 3

¹Ua fetalai mai o ia ia te au, Le atalii e o le tagata, ina ‘ai ia le mea e te maua; ‘ai ia lena tusi taai, i le e alu, ma fai atu i le aiga o Isaraelu.

²Ona ou faamaga lea o lo‘u gutu, ona ia fafaga lea ia te au i lena tusi taai.

³Ua ia fetalai mai foi ia te au, Le atalii e o le tagata, ina tali ia o lou manava, ia ma‘ona ai lou alo i lena tusi taai ua ou avatua ia te oe; ona ou ‘ai ai lea, ua suamalie i lo‘u gutu e pei o le meli.

⁴Ua fetalai mai foi o ia ia te au. Le atalii e o le tagata alu ia oe, ina alu i le aiga o Isaraelu, ma e tautala atu i a‘u upu ia te i latou.

⁵Auā e le auina atu oe i se nuu gagana ese ma upu faigata, a o le aiga o Isaraelu;

⁶e le o nuu e tele, ma gagana ese, ma upu faigata e te le malagona ai a latou upu. Ana ou auina oe ia te i latou, po ua latou faalogo lava ia te oe.

⁷A o le aiga o Isaraelu, e le mafafai i latou ona faalogo ia te oe, auā latou te le mafafai ona faalogo mai ia te au; auā ua muaulu malō, ma loto maaa le aiga uma o Isaraelu.

⁸Faauta, ua ou faia ou mata ia malosi, ina ia fesagai ma o latou mata, ma lou muaulu ia malō, ina ia fesagai ma o latou muaulu.

⁹Ua ou faia lou muaulu ia pei o le samira ua sili le malō i le papa; aua e te fefe ia te i latou, aua foi e te mata‘u i o latou mata, e ui lava o le aiga fouvale i latou.

¹⁰Ua ia fetalai mai foi ia te au, Le atalii e o le tagata, o a‘u upu uma ou te fai atu ai ia te oe, ia talia i lou loto, ma faalogo ai ou taliga.

¹¹Alu ia, ina e alu atu i le tafeaga o tagata o lou nuu, ma e tautala atu ia te i latou, ma e fai atu ia te i latou, O loo faapea ona fai mai o le Alii o Ieova, pe latou te faalogo mai, pe leai.

¹²Ona siitia lea o a‘u i luga e le Agaga, ona ou faalogo atu lea i o‘u tua i le leo o le taalili tele, ua faapea mai, Ia viia le mamalu o Ieova mai lona afioaga.

¹³Ua ou faalogo foi i le taalili o apaau o mea ola ua fepa‘iai, ma le taalili o mea taavavale e lata ane i ai, ma le leo o le taalili tele.

¹⁴Ua siitia a‘u e le Agaga, ua ia ave ia te au, ua ou alu ma le tiga ma le ita o lo‘u loto; a ua malosi mai le aao o Ieova i luga ia te au.

¹⁵Ona ou oo atu lea i le tafeaga i Teleapipa ie nonofo e lata ane i le vaitafe o Kepara, auā na latou nonofo i lea mea; na ou nofo foi ia te i latou i aso e fitu e fememeai.

¹⁶Ua mavae aso e fitu, ona oo mai lea o le afioga a Ieova ia te au, ua faapea mai,

¹⁷Le atalii e o le tagata, ua ou faia oe ma tagata vaai i le aiga o Isaraelu; o le mea lea ia e faalogo mai ai le upu a lo‘u gutu, ma e apoapoai atu ia te i latou mai ia te au.

¹⁸A ou fai atu i le ua amio leaga, E oti lava oe; a ē le apoapoai atu ia te ia, ma ē le fai atu i ai e apoapoai atu i le ua amio leaga ia liliu ese i lona ala leaga, ina ia ola ai o ia; e oti lena tagata amio leaga i lana amioletonu, a o lona toto ou te taui atu lea ia te oe.

¹⁹A e afai e te apoapoai atu i le ua amio leaga, a e le liliu ese o ia i lana amio leaga ma lona ala leaga, e oti o ia i lana amioletonu; a o oe, ua laveaiina oe ia te oe.

²⁰A liliu ese foi le ua amiotonu i lana amiotonu, a e fai le amioletonu, ona ou tuuina lea i ona luma se mea e tausuai ai, e oti o ia; e oti o ia i lana agasala ona ua ē le apoapoai atu ia te ia, e le manatua ana amiotonu sa na faia; a o lona toto ou te taui atu lea ia te oe.

²¹A o oe, afai e te apoapoai atu i le ua amiotonu ina ia le agasala le ua amiotonu, e le agasala foi o ia, e ola lava o ia, ina ua apoapoaiina o ia; o oe foi, ua laveai oe ia te oe.

²²Na i luga foi ia te au le aao o Ieova i lea mea; na ia fetalai mai foi ia te au, Ina tulai ina alu atu i le fanua laugatasi, ou te fai atu ai ia te oe i lea mea.

²³Ona ou tulai ai lea, ma ou alu atu i le fanua laugatasi; faauta foi, o le pupula o Ieova ua tu mai ai, pei o le pupula na ou iloa e lata ane i le vaitafe o Kepara; ona ou faapaū fao ai lea.

²⁴Ona ulu mai lea o le Agaga i totonu ia te au, na ia faatuina mai au i luga i o‘u vae, na ia fetalai mai foi ia te au, ua faapea mai ia te au, Ina alu ia oe, ina puipui ia oe ia te oe i lou fale.

²⁵O oe na foi le atalii o le tagata, faauta, latou te fusifusi ia te oe i maea, latou te nonoa ai lava ia te oe, e te le alu atu foi ia te i latou.

²⁶Ou te faapipii ae foi lou laulaufaiva i lou gutu, ina ia gūgū ai oe, e le faia foi oe ma tagata aoai ia te i latou; auā o le aiga fouvale i latou.

²⁷A ou fai atu ia te oe, ona ou faagaganaina lea o oe, e te fai atu foi ia te i latou, O loo faapea ona fai mai o le Alii o Ieova, O lē faalogo mai, ina faalogo mai ia o ia; a o le ua leai, ia leai pea ia; auā o le aiga fouvale i latou.