Read Samoan Old Version Bible – O LE TUSI PAIA ESEKIELU, 30 Bible Online

ESEKIELU, 30 - Samoan Old Version Bible – O LE TUSI PAIA bible

ESEKIELU, 30

¹Ua oo mai foi le afioga a Ieova ia te au, ua faapea mai,

²Le atalii e o le tagata, ia e vavalo atu, ma ia e fai atu, Ua faapea ona fetalai mai o le Alii o Ieova, Ina uio ia outou, Aue le aso e!

³Auā ua latalata mai le aso; ua latalata mai le aso o Ieova, o le aso faamalumalu; e fai lea ma ona po o nuu ese.

⁴E oo foi le pelu i Aikupito; e i ai foi le mata‘u tele i Aitiope pe a pauu e ua fasia i Aikupito; latou te avea foi lona vao tagata; o ona faavae foi e fulisia ia.

⁵O Aitiope, ma Futu, ma Luti, ma tagata eseese atoa uma, ma Kupu, ma tagata o le nuu o le feagaiga, e oti faatasi ma i latou i le pelu.

⁶Ua faapea ona fetalai mai o Ieova, O i latou o e lagolago ia Aikupito e pauu i latou; e mavae foi lona malosi e mitamita ai; e pau atu i Mekatala e pau mai i Seveni, e oti ai i latou i le pelu, ua fetalai mai ai le Alii o Ieova.

⁷E faatafunaina foi i latou faatasi ma nuu ua faatafunaina, e faatasia foi ona aai i aai ua faagaogaoina.

⁸Latou te iloa ai o a‘u lava o Ieova pe a ou tuuina atu se afi i Aikupito, pe a momomo foi ona fesoasoani uma.

⁹O lea aso e o atu ai a‘u sāvali i vaa, e faagateteina ai Aitiope faatalanoa, e oo foi le mata‘u tele ia te i latou, e pei o le aso o Aikupito; auā faauta, o loo o saū.

¹⁰Ua faapea ona fetalai mai o le Alii o Ieova, Ou te faaumatia le vao tagata o Aikupito i le lima o Nepukanesa le tupu o Papelonia.

¹¹E ta‘ita‘iina o ia ma ona tagata e faatasi ma ia, o e ua matautia i nuu, e faaumatia ai le nuu; latou te to ae a latou pelu i Aikupito, ma faatumuina le nuu i le fasi.

¹²Ou te faamamate i vaitafe, ou te faatauina atu foi le nuu i lima o tagata amio leaga; ma ou faatafunaina i lima o tagata ese le nuu ma mea ua tumu ai; o a‘u o Ieova ua ou fai atu ai.

¹³O loo faapea ona fetalai mai o le Alii o Ieova, Ou te faaumatia tupua, ou te faaiuina lava tupua ai Nafi; e le toe ai foi se alii o le nuu o Aikupito; ou te faatupuina foi le mata‘u i le nuu o Aikupito.

¹⁴Ou te faatafunaina foi Patoro, ma ou tuuina atu le afi i Soana, ma faaoo sala i No.

¹⁵Ou te sasaaina atu foi lo‘u ita tele i luga o Sina, le malosi o Aikupito; ou te faaumatia foi le vao tagata o No.

¹⁶Ou te tuu atu foi le afi i Aikupito; e faatigateleina Sina; e lepetia No; e puapuagatia foi Nafi i aso fai soo.

¹⁷O taulelea o Avane ma Pepeseta e oti i latou i le pelu; e tāfea foi ia nuu.

¹⁸E faapouliuligia foi le ao i Tapenesa, pe a ou gausia amo a Aikupito i lea mea, e faaiuina foi lona malosi e mitamita ai; e ufitia ia i le ao, o ana tama fafine foi e tāfea i latou.

¹⁹Ou te faaoo lava sala i Aikupito; ona latou iloa ai lea o a‘u lava o Ieova.

²⁰O lona tausaga e sefulu ma le tasi, o le masina muamua, o le aso e fitu o le masina, na oo mai ai le afioga a Ieova ia te au, ua faapea mai,

²¹Le atalii e o le tagata, ua ou gausia le lima o Farao le tupu o Aikupito; faauta foi, e le fusia ia malolo ai; e le avane foi i ai se fusi e fusi ai ia malosi ai e ‘u‘u ai le pelu.

²²O le mea lea ua faapea ona fetalai mai ai o le Alii o Ieova, Faauta, ou te faia Farao le tupu o Aikupito mo‘u fili, ou te gagauina ona lima, o le ua malosi, atoa ma le na gagauina; ou te faapaūina foi le pelu ai lona lima.

²³Ou te faataapeapeina foi Aikupito i nuu, ou te faasalalauina foi i latou i nuu eseese.

²⁴A e ou te faamalosia foi lima o le tupu o Papelonia, ma ou tuu ane la‘u pelu i lona lima; a e ou te gagauina lima o Farao, ona oi ai lea o ia i ona luma, i le oi o le ua manua.

²⁵A e ou te faamalosia lima o le tupu o Papelonia, a o lima o Farao e gagase lava ia; latou te iloa ai o a‘u o Ieova, pe a ou tuu atu la‘u pelu i le lima o le tupu o Papelonia, a e faaloaloa atu ai e ia i le nuu o Aikupito.

²⁶Ou te faataapeapeina foi Aikupito i nuu, ma faasalalau ia te i latou i nuu eseese; ona latou iloa ai lea o a‘u lava o Ieova.