Read Samoan Old Version Bible – O LE TUSI PAIA ESEKIELU, 33 Bible Online

ESEKIELU, 33 - Samoan Old Version Bible – O LE TUSI PAIA bible

ESEKIELU, 33

¹Ua oo mai foi le afioga a Ieova ia te au, ua faapea mai,

²Le atalii e o le tagata, fai atu ia i tagata o lou nuu, ia faapea atu ia te i latou, A ou faaooina atu le pelu i se nuu, afai e avea e tagata o lea nuu se tagata o lo latou nuu, ma latou tofia o ia e fai mo latou tagata vaai;

³a iloa atu e ia le pelu o loo sau i le nuu, afai na te ilia le pu, ma faailoa atu i le nuu;

⁴o se na te lagona le leo o le pu, a e le anaana i ai; a oo ane le pelu, ma oti ai o ia, e i luga o lona lava ulu lona toto.

⁵Na ia lagona le leo o le pu, a ua le anaana i ai; e ia te ia lava lona toto; a o Ie na te anaana e faasaoina e ia lona ola.

⁶A e afai e iloa e le tagata vaai le pelu o loo sau, a e le ilia e ia le pu, ma ua le faailoa atu i le nuu; a oo mai le pelu, ma oti ai se tasi o i latou, ua oti o ia i lana amio leaga; a o lona toto ou te tauiatua lea i le tagata vaai.

⁷O oe foi le atalii o le tagata, ua ou tofia oe e fai ma tagata vaai i le aiga o Isaraelu; o le mea lea ia e faalogo mai ai i le upu a lo‘u gutu, ma e apoapoai atu ia te i latou i upu atu ia te au.

⁸A ou fai atu i le ua amio leaga, Le tagata amio leaga e, e te oti lava oe; afai e te le tautala atu e apoapoai atu ai i le ua amio leaga, ia liliu ese i lona ala; e oti lena tagata amio leaga i lana amio leaga; a o lona toto ou te tauiatua lea ia te oe.

⁹A o oe, afai e te apoapoai atu i le ua amio leaga, ia liliu ese o ia i lona ala; afai na te le liliu ese i lona ala, e oti o ia i lana amio leaga; a ua faasaoina e oe lou lava agaga.

¹⁰O oe na foi, le atalii o le tagata, fai atu ia i le aiga o Isaraelu, Ua fai mai la outou upu, ua faapea mai, Afai ua ia te i matou o matou solitulafono, ma a matou agasala, ma tauāu ina faaumatia ai i matou, pe matou te ola ea faapefea?

¹¹Fai atu ia ia te i latou, O loo fetalai mai le Alii o Ieova, Ou te ola a‘u, ou te le fiafia lava i le oti o lē amio leaga, a ia liliu mai lē amio leaga ai lona ala, ma ola ai; liliu ia outou, ina outou liliu ese ia i o outou ala leaga; auā pe se a ea le mea tou te fia oti ai, le aiga o Isaraelu e?

¹²O oe foi le atalii o le tagata, fai atu ia i tagata o lou nuu, E le laveaiina le ua amiotonu i lana amiotonu i le aso e solitulafono ai o ia; e le paū foi le ua amio leaga i lana amio leaga i le aso e liliu ese ai o ia i lana amio leaga; e le ola foi le ua amiotonu i lana amiotonu i le aso e agasala ai o ia.

¹³A ou fai atu i le ua amiotonu, e ola lava ia; afai e faalagolago ia i lana amiotonu, ma ua fai le amio leaga, ona le manatua lea o ana amiotonu uma, a e oti o ia ona o amio leaga ua ia faia.

¹⁴A ou fai atu foi i le ua amio leaga, E oti lava oe; afai e liliu ese ia i lana agasala, ma ua fai e ia le amio tatau ma le amiotonu;

¹⁵afai e faafoi le ua amio leaga le mea e tuu faafaatau, ma toe avane le mea na ia fao, ma ia savali i sauniga e ola ai, ma ua le fai le amio leaga; e ola lava ia, e le oti.

¹⁶O ana agasala ua ia faia e le ta‘uta‘ua ia te ia; ua ia fai le amio tatau ma le tonu; e ola lava ia.

¹⁷A ua fai mai tagata o lou nuu, E le tusa le ala o le Alii; a o i latou, e le tusa lo latou ala.

¹⁸A liliu ese le ua amiotonu i lana amiotonu, ma ua faia e ia le amio leaga, ona oti ai lava lea o ia.

¹⁹A e afai e liliu ese le ua amio leaga ai lana amio leaga, ma ua faia e ia le amio tatau ma le amiotonu, ona ola ai lava lea o ia.

²⁰A ua outou fai mai, E le tusa le ala o le Alii. Le aiga o Isaraelu e, ou te faamasinoina outou taitoatasi e tusa ma ona ala.

²¹O lona sefulu ma le lua o tausaga o lo matou tafeaga, o lona sefulu o masina, o le aso e lima o le masina, na sau ai ia te au le tasi na sao mai Ierusalema, ua faapea mai, Ua fasia le aai.

²²Na i ai foi le aao o Ieova ia te au i le afiafi, a o lei oo mai le na sao; na ia faagaganaina foi a‘u, ua oo ina sau o ia ia te au i le taeao; ua faagaganaina a‘u, ua ou le toe faalologo.

²³Ona oo mai lea o le afioga a Ieova ia te au, ua faapea mai,

²⁴Le atalii e o le tagata, o loo fai mai i latou o e o nonofo i mea gaogao i le laueleele o Isaraelu, ua faapea mai, Sa toatasi Aperaamo, na fai foi mona le nuu; a e toatele i tatou; ua tuuina mai le nuu mo i tatou e fai mo tatou.

²⁵O le mea lea ia e fai atu ai ia te i latou. O loo faapea ona fetalai mai o le Alii o Ieova, Ua outou aai mea o i ai le toto, ma ua outou vaavaai i o outou tupua, ma outou faamaligi toto; a e fai ea mo outou le nuu?

²⁶Ua outou tutū ma a outou pelu, ua outou fai mea e inosia, ua outou taitasi ma faaleagaina le avā a le tasi tagata; a e fai ea mo outou le nuu?

²⁷Ia faapea ona e fai atu ia te i latou, Ua faapea ona fetalai mai o le Alii o Ieova, Ou te ola a‘u, o i latou o e ua i ai i mea gaogao e oti lava i latou i le pelu, o le ua i le vao ou te tuuina atu lava o ia i manu feai ia ‘aina; o i latou foi o e ua i ‘olo ma ana e oti lava i latou i le faamai.

²⁸Ou te matuā faatafunaina lava le nuu, ma ou faaiuina lona malosi e mitamita ai; e faatafunaina foi mauga o Isaraelu, e le uia lava e se tasi.

²⁹Ona latou iloa ai lea o a‘u lava o Ieova, pe a ou matuā faatafunaina le nuu ona o a latou mea uma e inosia ua latou faia.

³⁰O oe foi le atalii o le tagata, o loo tautalatala pea tagata o lou nuu ia te oe e lata ane i pa ma faitotoa o fale, o loo fetautalatalai i latou o le tasi i le tasi, ua faapea, O mai ia, se‘i faalogologo pe se a se afioga ua tŭlei mai mai ia Ieova.

³¹Latou te o mai foi ia te oe pei ona o mai o lo‘u nuu, latou te nonofo foi i ou luma e pei o lo‘u nuu, latou te faalogologo foi i au upu, a e latou te le mafafai ona anaana i ai; auā ua latou alolofa fua i o latou gutu, a ua mafuli o latou loto i lo latou manumanu.

³²Faauta foi, ua tusa oe ia te i latou ma se pese mālie a le ua leo mālie, ma lē ta mālie i le laaupese; auā latou te faalogologo i au upu, a e latou te le anaana i ai.

³³A taunuu lea mea, faauta e taunuu lava, ona latou iloa ai lea sa i ai le perofeta ia te i latou.