Read Samoan Old Version Bible – O LE TUSI PAIA ESEKIELU, 35 Bible Online

ESEKIELU, 35 - Samoan Old Version Bible – O LE TUSI PAIA bible

ESEKIELU, 35

¹Ua oo mai foi le afioga a Ieova ia te au, ua faapea mai,

²Le atalii e o le tagata, ia e faasaga atu i le mauga o Seira, ma vavalo atu i ai, fai atu foi i ai,

³Ua faapea ona fetalai mai o le Alii o Ieova, Faauta, le mauga o Seira e, ua ou fai oe mo‘u fili, ou te faaloaloa atu foi lo‘u lima i luga ia te oe, ma ou matuā faatafunaina lava oe.

⁴Ou te faagaogaoina ou aai, e faatafunaina lava oe, ona e iloa ai lea o a‘u lava o Ieova.

⁵Auā ua ia te oe le itatuu, ma ua e tuuina atu le fanauga a Isaraelu i le malosi o le pelu i ona po o lo latou malaia, o ona po foi na iu ai le amio leaga.

⁶O le mea lea o loo fetalai mai ai le Alii o Ieova, Ou te ola a‘u, o‘u te tuuina atu oe i le toto, e tuliloa foi le toto ia te oe; na e le ‘ino‘ino i le toto, o lea e tuliloa ai le toto ia te oe.

⁷Ou te matuā faatafunaina le mauga o Seira, ma ou faaumatia o ia o le alu atu i ai, atoa ma le toe foi mai.

⁸Ou te faatutumuina foi ona mauga i ona tagata ua fasia; o ou mauga, ma ou vanu, ma ou vaitafe uma, e pauu ai i latou o e ua fasia i le pelu.

⁹Ou te faatafunaina oe e faavavau, e le toe āina ou aai; ona outou iloa ai lea o a‘u lava o Ieova.

¹⁰Ua e faapea, O ia nuu e lua, ma o la laueleele e lua e fai mo‘u, matou te nonofo ai; a e peitai ua i ai Ieova.

¹¹O le mea lea ua fetalai mai ai le Alii o Ieova, Ou te ola a‘u, ou te faia ia te oe e tusa ma lou ita, e tusa foi ma lou mataua na e faia i lou ‘ino‘ino ia te i latou; ou te faailoa atu foi o a‘u ua ia te i latou, pe a ou faasalaina oe.

¹²Ona e iloa ai lea o a‘u lava o Ieova, ua ou faalogoina au upu faifai uma ua e fai atu ai i mauga o Isaraelu, ua faapea, Ua faatafunaina ia, ua tuuina mai ia te i matou e fai ma mea e ‘ai.

¹³Ua outou tautala faasausili ia te au, ua faateleina foi a outou upu ia te au; ua ou faalogo ai lava.

¹⁴Ua faapea ona fetalai mai o le Alii o Ieova, A olioli le lalolagi uma, ou te faatafunaina oe.

¹⁵E pei ona e olioli ina ua faatafunaina o le tofi o le aiga o Isaraelu, e faapea ona ou faia ia te oe; e faatafunaina oe le mauga o Seira, atoa ma Etoma uma, o le nuu uma lava; ona latou iloa ai lea o a‘u lava o Ieova.