Read Samoan Old Version Bible – O LE TUSI PAIA ESEKIELU, 38 Bible Online

ESEKIELU, 38 - Samoan Old Version Bible – O LE TUSI PAIA bible

ESEKIELU, 38

¹Ua oo mai foi le afioga a Ieova ia te au, ua faapea mai,

²Le atalii e o le tagata, ia e faasaga atu ia Koku, o le nuu o Makoku, le alii sili o Rosi, ma Meseko, ma Tupalu, ma vavalo atu ia te ia,

³ma e fai atu, Ua faapea ona fetalai mai o le Alii o Ieova, Faauta, ua fai oe mo‘u fili, Koku e, o le alii sili o Rosi, ma Meseko, ma Tupalu.

⁴Ou te faafoi ia te oe, ma tuuina mama i ou auvae, ma ou ta‘ita‘i atu ia te oe, ma lau itu taua uma, o solofanua, ma e o tietie i solofanua, o i latou uma o oofu i ofutau atoatoa, o le vao tagata e toatele lava, ma talita, ma talipupuni, ua ‘u‘u i latou uma i pelu;

⁵o Peresia, ma Aitiope, ma Futu, faatasi ma i latou; ua tofu i latou uma ma le talipupuni ma le puloutau;

⁶o Komeru ma ana ‘au uma; o le aiga foi o Tokaremo mai le itu i matu ma ana ‘au uma, o nuu e tele lava e faatasi ma oe.

⁷Sauni ia, ina e sauni ia oe, o oe ma lou vao tagata uma, o e ua faapotopoto mai ia te oe, ia fai foi oe ma leoleo ia te i latou.

⁸A mavae aso e tele ona asia ai lea o oe; o ona tausaga amuli e te sau ai i le nuu ua faafoisia nai le pelu, ua faapotopotoina nai nuu e tele i mauga o Isaraelu, ua faatafunaina pea lava; a e aumaia mai nuu eseese, latou te nonofo ma le filemu o i latou uma.

⁹E te alu ae, e te oo mai e pei o se afā; e tusa oe ma le ao e ufitia ai le nuu, o oe, ma au ‘au uma, ma nuu e tele e faatasi ma oe.

¹⁰Ua faapea ona fetalai mai o le Alii o Ieova, O ona po lava ia, e tutupu ai mea i lou loto, e te mafaufau foi i se manatu leaga;

¹¹e te faapea ifo, Ou te alu ae i le nuu o aai e le nofo ‘olo; ou te alu ia te i latou o e o fifilemu, o e nonofo faatalanoa, o i latou uma o nonofo ua leai so latou pa, e leai foi ni a latou faamaufaalava,

¹²po o puipui, ina ia avea le vete, ia avea foi mea e faoa; e faasaga lou lima i mea sa faatafunaina, o loo āina, o le nuu foi ua faapotopotoina nai nuu ese, ua i ai manu ma oloa, o loo o nonofo i le totonugalemu o le lalolagi.

¹³O Seepa, ma Titana, ma e faatauoa o Tasesa, ma ana leona taanoa uma, e fai atu latou ia te oe, Ua e sau ea e ave vete? ua e faapotopotoina ea au ‘au e ave mea ua fao? e ave ario ma auro, e ave manu ma oloa, e ave ai le vete tele?

¹⁴O le mea lea, le atalii e o le tagata, ia e vavalo atu ai, ma ia e fai atu ia Koku, Ua faapea ona fetalai mai ai o le Alii o Ieova, O ona po o nonofo ai ma le filemu lo‘u nuu o Isaraelu, e te le iloa ea?

¹⁵E sau lava oe ai lou nuu i le itu i matu, o oe ma nuu e tele e faatasi ma oe, o tietie uma i latou i solofanua, o le vao tagata e toatele lava, ma le itu taua e matuā tele.

¹⁶E te alu ae foi e tau ma lo‘u nuu o Isaraelu, e pei o le ao e ufitia ai le nuu; o ona aso amuli e taunuu ai; ou te aumaia foi oe i lo‘u laueleele, ina ia iloa ai a‘u i nuu ese, pe a faapaiaina a‘u ia te oe Koku e, i o latou luma.

¹⁷Ua faapea ona fetalai mai o le Alii o Ieova, E le o oe ea o le na ou fai atu ai anamua i a‘u auauna o le au perofeta o Isaraelu, o e na vavalo i ia ona po o tausaga, Ou te au mai ai oe e tau ma i latou?

¹⁸O loo fetalai mai foi le Alii o Ieova, O ia lava ona po e alu atu ai Koku i le laueleele o Isaraelu, e matuā tupu ai lo‘u ita tele.

¹⁹O lo‘u fuā foi, o le afi lava o lo‘u ita ua ou fai atu ai, O le aso lea e i ai lava le mafuie tele i le nuu o Isaraelu;

²⁰ona gatete ai lea i o‘u luma o i‘a o le sami, ma manu felelei, ma manu feai o le vao, ma mea fetolofi uma e fetolofi i le eleele, atoa ma tagata uma o i le fogāeleele, e solo foi mauga, e mafuli foi mea matomato, e sōloia foi pa uma e oo i le eleele.

²¹Ou te valaau foi i le pelu i o‘u mauga uma ia oo ia te ia, o loo fetalai mai ai le Alii o Ieova; e taitoatasi foi ma faasaga lana pelu i le tasi.

²²Ou te faasala foi ia te ia i le faamai ma le toto; ou te faatotō ifo foi i luga ia te ia ma ana ‘au, atoa ma nuu e tele ua ia te ia, le timuga tetele, ma uato‘a tetele, o le afi, ma le teio.

²³Ou te faasilisiliina o a‘u e a‘u, ma ou faapaiaina o a‘u; e iloa foi a‘u i luma o nuu e tele, e iloa ai lava e i latou o a‘u lava o Ieova.