Read Samoan Old Version Bible – O LE TUSI PAIA ESEKIELU, 4 Bible Online

ESEKIELU, 4 - Samoan Old Version Bible – O LE TUSI PAIA bible

ESEKIELU, 4

¹O oe foi le atalii o le tagata, ina au mai ia se maaomea ma tuu ai i ou luma, ma e tusi i ai le aai o Ierusalema;

²ia e vagaia, ma ia e fai se ‘olo e tau ai, ma e tanu ai se mea mautietie, ia e to lauapi foi i ai, ma avane i ai mea e lepeti a‘i, ia soo ai.

³Ia e au mai foi se uamea salafa, ma e faatu ai e fai ma pa uamea i lo oulua va ma le aai; ia e matuā faasaga i ai, e vagaia foi ia, e vagaia foi e oe. E fai lea ma faailoga i le aiga o Isaraelu.

⁴O oe foi ia e taoto i lou itu tauagavale, ma ia e faaeetia ai le amio leaga a le aiga o Isaraelu, o ona aso atoa e te taoto ai e taui ai ia te oe a latou amio leaga,

⁵Auā ua ou faatatau atu ia te oe tausaga o a latou amio leaga, o ona aso atoa e tolu selau ma le ivagafulu o aso, e taui ai ia te oe le amio leaga a le aiga o Isaraelu.

⁶A faaiuina ia aso ona e toe taoto lea i lou itu taumatau, ia taui ai ia te oe le amio leaga a le aiga o Iuta i aso e fagafulu; ua ou faatatauina atu ia te oe o le aso ma le tausaga o le aso ma le tausaga.

⁷E te matuā faasaga atu ai i le vagaia o Ierusalema, e te to ese le ofu i lou lima, ma e vavalo i lona malaia.

⁸Faauta foi, ou te fusifusi ia te oe i maea, e te le feliuliuai ai seia faaatoaina e oe o aso e te vagai ai.

⁹Ia e avane mā oe o saito, ma karite, ma fua o fue, ma atasema, ma tokana, ma kaseme, ma e tuu ai i se tanoa e tasi, ma fai a‘i ni mea e ai mā oe, e faatatau i ona aso atoa e te taoto ai i lou itu; e tolu selau ma le ivagafulu o aso e te ‘ai ai.

¹⁰O lau mea e ‘ai foi e te ‘ai ai, e fuatia lea o le aso ma sekeli e lua sefulu; e te ‘ai ai e auauai i aso.

¹¹E fuatia foi le vai e te inu ai, o lona vaega e ono o le sinu; e te inua e auauai i aso.

¹²O potoi karite e te ‘ai ai, e te tunua foi i otaota mai tagata i o latou luma.

¹³Ua fetalai mai foi Ieova, E faapea lava ona aai o le fanauga a Isaraelu i a latou mea e ‘ai e leaga i nuu ese ou te tulia ai i latou.

¹⁴Ona ou fai atu ai lea, Aue le Alii e Ieova! faauta, e lei leaga lava a‘u i se mea e ‘ai, auā talu ina ou itiiti ua oo mai i nei ona po ou te lei ‘ai se mea na mate fua, po o se mea na saeia, e lei toia lava lo‘u gutu i se tufaaga o manu leaga.

¹⁵Ona fetalai mai ai lea o ia ia te au, Faauta, ua ou avatu ia te oe otaota o povi e sui a‘i otaota o tagata, e te sauni ai au mea e ‘ai.

¹⁶Ua fetalai mai foi o ia ia te au, Le atalii e o le tagata, faauta, ou te gausia le tootoo o le mea e ‘ai i Ierusalema, latou te aai ma le atuatuvale a latou mea e ‘ai ua fuatia; latou te inu foi ma le fememeai o latou vai ua fuatia;

¹⁷ina ia oge i latou i mea e ‘ai ma vai, e taitasi foi ma fememeai uma, ma tauāu ina faaumatia i latou i a latou amioleaga.