Read Samoan Old Version Bible – O LE TUSI PAIA ESEKIELU, 40 Bible Online

ESEKIELU, 40 - Samoan Old Version Bible – O LE TUSI PAIA bible

ESEKIELU, 40

¹O lona lua o sefulu ma le lima o tausaga o la matou tafeaga, o le amataga o le tausaga, o le aso e sefulu o le masina, o le tausaga e sefulu ma le fa talu ona malaia o le aai, o lena lava aso, na i ai le aao o Ieova i luga ia te au, ma na aveina atu i ai o a‘u.

²O faaaliga mai le Atua na ia aveina ai a‘u i le nuu o Isaraelu, ma tuuina ai a‘u i luga o le mauga maualuga lava, o i ai i le itu i toga se fale e peiseai se aai.

³Na ia aveina atu ai a‘u, faauta foi, o le tagata, o lona tino mai ua pei o le tino o le ‘apa memea, sa i lona lima le manoa lino, ma le u e fua a‘i, o tu o ia i le faitotoa.

⁴Ua fai mai foi le tagata ia te au, Le atalii e o le tagata, ia vaavaai ou mata, ma ia faalogologo ou taliga, ia e tuu foi i lou loto o mea uma ou te faaali atu ai ia te oe; auā ua aumaia oe iinei ina ia ou faaali atu ai ia te oe; ia e ta‘u atu i le aiga o Isaraelu o mea uma e te iloa.

⁵Faauta foi, o le pa ua soo ai le fale i fafo, o i ai foi i le lima o le tagata le u e fua a‘i, e ono kupita lona umi, o kupita e i ai le kupita, ma le alofilima; ua ia fua le lautele o le pa e tasi le u, ma lona maualuga e tasi le u.

⁶Ona alu ane lea o ia i le faitotoa o loo faasaga i sasae, ma alu ae i lona ala faaapefai; ua ia fuatia foi le faitotoa, o le u e tasi lona lautele; ma le tasi faitotoa, e tasi foi le u lona lautele.

⁷O potu foi taitasi e tasi le u lona umi, e tasi le u foi lona lautele; o le va foi o potu e lima kupita ia; o le faitotoa foi i tala ane o le faapaologa o le fale i totonu e tasi lona u.

⁸Ua ia fuatia foi le faapaologa o le fale i totonu, o le u e tasi.

⁹Ona fuatia lea e ia le faapaologa o le puipui, e valu ona kupita, ma ona pou e lua ona kupita; na u i totonu foi le faapaologa o le puipui.

¹⁰O potu foi o le faitotoa i sasae sa taitolu i itu; ua gatasitasi le fua o ia potu e tolu; ua gatasitasi foi le fua o pou i le tasi itu ma le tasi itu.

¹¹Ua ia fuatia le lautele o le puipui e sefulu ona kupita; o lona umi foi o le puipui e sefulu ma le tolu ona kupita.

¹²Sa i ai foi le mea avanoa i luma o potu i itu taitasi e tasi lona kupita; o potu foi taiono kupita i lea itu ma lea itu.

¹³Ona fuatia lea e ia le puipui mai le falealuga o le tasi potu e oo i le falealuga o le tasi; o lona lautele e lua sefulu ma le lima o kupita ia; ua faafesagai faitotoa.

¹⁴Ua ia fai foi pou e onogafulu o kupita; ua oo foi i le pou o le lotoā o le puipui e soo ai.

¹⁵E afua mai foi i luma o le puipui e ulu atu ai e oo i luma o le faapaologa o le puipui i totonu, e lima sefulu o ona kupita.

¹⁶Na i ai foi o faamalama puipuia i potu, sa i ai foi i pou i totonu o le puipui ua soo ai, ua faapea foi ma faapaologa; na i ai faamalama ua soo ai i totonu; na i ai foi pama i pou.

¹⁷Ua ia au mai foi ia te au i le lotoā aupito i tua, faauta foi, o potu ma le paepae ua faia mo le lotoā ia soo ai; e tolu sefulu o potu na i le paepae.

¹⁸O le paepae foi i tafatafa o puipui na feagai ma le umi o puipui, o le paepae aupitoalalo lea.

¹⁹Ona fuatia lea e ia o le lautele, e afua mai i luma o le puipui aupitoalalo e oo i ona luma o le lotoā tuloto i ona tua mai, e selau ona kupita i sasae atoa foi ma le itu i matu.

²⁰Ua ia fuatia foi le umi ma le lautele o le puipui o le lotoā aupito i tua, o lē faasaga i le itu i matu.

²¹O ona potu foi sa taitolu i lea itu ma lea itu; o ona pou foi ma ona faapaologa sa tusa ma le fua o le uluai puipui, e lima sefulu o kupita, o lona umi lea, e lua sefulu ma le lima o kupita o lona lautele lea.

²²O ona faamalama foi, ma ona faapaologa, ma ona pama, sa tutusa ma le fua o le puipui o lē faasaga i sasae; na latou o ae foi i ai i tulaga e fitu o le ala faaapefai; sa i ai foi ona faapaologa i o latou luma.

²³O le puipui foi o le lotoā tuloto, na faafesagai ma le puipui i le itu i matu ma le itu i sasae; ua ia fuatia foi e afua mai i le tasi puipui e oo i le tasi puipui e selau ona kupita.

²⁴Ua ia ta‘ita‘iina foi a‘u i le itu i toga, faauta foi, o le puipui o faasaga i le itu i toga; ua ia fuatia foi ona pou ma ona faapaologa e tusa ma ia fua.

²⁵O faamalama foi sa i ai atoa mona faapaologa e soo ai e pei o ia faamalama; o lona umi e lima sefulu o kupita, o lona lautele e lua sefulu ma le lima o kupita.

²⁶E fitu foi tulaga faaapefai e ui ae ai, o ona faapaologa foi o i o latou luma; na i ai foi pama e taitasi i itu i ona pou.

²⁷Na i ai foi le puipui i le lotoā tuloto o faasaga i le itu i toga; na ia fuatia foi, e afua mai i le tasi puipui e oo i le tasi puipui ua faasaga i le itu i toga, e selau ona kupita.

²⁸Ua ia au mai foi ia te au i le lotoā tuloto o le puipui i le itu i toga; ua ia fuatia foi le puipui i le itu i toga e tusa ma ia fua;

²⁹o ona potu foi, ma ona pou, ma ona faapaologa, sa tutusa ma ia fua; o faamalama foi sa i ai atoa ma ona faapaologa e soo ai; e lima sefulu o kupita, o lona umi lea, e lua sefulu ma le lima o kupita o lona lautele lea.

³⁰O faapaologa foi e soo ai e lua sefulu ma le lima o kupita o lona umi lea, e lima kupita foi o lona lautele lea.

³¹O ona faapaologa na faasaga i le lotoā aupito i tua; na i ai foi pama i ona pou; e valu foi tulaga faaapefai e ui ae ai.

³²Ua ia aumaia foi a‘u i le lotoā tuloto o faasaga i sasae; ona fuatia lea e ia o le puipui e tusa ma ia fua.

³³O ona potu foi, ma ona pou, ma ona faapaologa, sa tutusa ma ia fua; o faamalama foi sa i ai, ma ona faapaologa e soo ai, e lima sefulu o kupita, o lona umi lea, e lua sefulu ma le lima o kupita o lona lautele lea.

³⁴Na faasaga ona faapaologa i le lotoā aupito i tua; na i ai foi pama i ona pou i lea itu, ma lea itu; e valu foi tulaga faaapefai e ui ae ai.

³⁵Ua ia au mai foi ia te au i le puipui i le itu i matu, ma na fuatia ai e tusa ma ia fua.

³⁶O ona potu, ma ona pou, ma ona faapaologa, ma ona faamalama e soo ai, e limagafulu o kupita o lona umi lea, o lona lautele e lua sefulu ma le lima o kupita.

³⁷O ona pou foi na faasaga ia i le lotoā aupito i tua; na i ai pama i ona pou i lea itu ma lea itu; e valu tulaga faaapefai na ui ae ai.

³⁸O potu ma o latou ala, sa i tafatafa o pou ia o faitotoa, na latou mulumulu ai le taulaga mu.

³⁹Na i ai foi i le faapaologa o le puipui o laulau e lua i le tasi itu, ma laulau e lua i le isi itu e fasi ai le taulaga mu, ma le taulaga mo le agasala, ma le taulaga mo le sese.

⁴⁰O i le itu foi i tua e ui ae ai le ala o le faitotoa i le itu i matu na i ai laulau e lua; o i le tasi itu foi i le faapaologa o le puipui na i ai laulau e lua.

⁴¹E fa laulau na i le tasi itu, e fa foi laulau i le isi itu i tafatafa o le puipui; e valu ia laulau na latou fasi ai taulaga i o latou luga.

⁴²O laulau ia e fa mo le taulaga mu, o maa talai na fai a‘i, e tasi le kupita ma le vaeluagalemu o le kupita, o le umi lea, e tasi foi le kupita ma le vaeluagalemu o le kupita o le lautele lea, o le kupita e tasi o le maualuga lea; na latou faaee ai foi mea ua latou fasi ai taulaga mu ma isi taulaga.

⁴³Na i ai foi tafatafa e faamauina ai ua faasaga i totonu, ua soo ai, e tasi le alofilima o latou lautele; sa i luga foi o laulau tufaaga o le taulaga.

⁴⁴O potu o le au pepese sa i ai ia i tua o le puipui tuloto i le lotoā tuloto, i tafatafa o le puipui i le itu i matu, na faasaga foi ia i le itu i toga; o le tasi i tafatafa o le puipui i sasae, ua faasaga i le itu i matu.

⁴⁵Ona faapea mai lea o ia ia te au, O lenei potu o lē faasaga i le itu i toga, mo le au ositaulaga lea o e anaana i le tausiga o le fale.

⁴⁶A o le potu o lē faasaga i le itu i matu, mo le au ositaulaga lea o e anaana i tausiga o le fata faitaulaga, o le fanauga ia a Satoka e o le fanauga a Levi, o e faalatalata ia Ieova e auauna ia te ia.

⁴⁷Na ia fuatia le lotoā, o lona umi e selau kupita, e selau kupita foi o lona lautele lea, na gatasitasi ona itu e fa; o le fata faitaulaga foi na i lumā fale.

⁴⁸Ua ia au mai foi ia te au i le faapaologa o le fale, ua ia fuatia pou o le faapaologa, e lima kupita i le tasi itu, e lima foi kupita i le isi itu; o le lautele foi o le puipui e tolu kupita i le tasi itu, e tolu foi kupita i le isi itu.

⁴⁹O le umi o le faapaologa e lua sefulu kupita lea, o lona lautele foi e sefulu ma le tasi kupita; ua ia au mai foi ia te au i le tulaga o le ala faaapefai na latou ui ae ai; na i ai foi pou i tafatafa o pou, o le tasi i le tasi itu, o le tasi foi i le isi itu.