Read Samoan Old Version Bible – O LE TUSI PAIA ESEKIELU, 43 Bible Online

ESEKIELU, 43 - Samoan Old Version Bible – O LE TUSI PAIA bible

ESEKIELU, 43

¹Ua ia ta‘ita‘i foi ia te au i le puipui, o le puipui lea ua faasaga i sasae;

²faauta foi, o le pupula o le Atua o Isaraelu ua afio mai mai sasae; o lona siufofoga foi e pei o le taalili o le vai e tele; ua malamalama foi le lalolagi i lona pupula.

³E pei ona tino mai o le faaaliga na ou iloa, e pei o le faaaliga lava na ou iloa ina ua ou sau e faaumatia le aai; o faaaliga foi e pei o le faaaliga na ou iloa i le vaitafe o Kepara; ona ou faapaūfao ai lea.

⁴Ua afio mai foi le pupula o Ieova i le fale na ala mai i le faitotoa e faasaga i sasae.

⁵Ona siitia lea o a‘u e le Agaga, ua ia au mai foi ia te au i le lotoā tuloto; faauta foi, ua tumu le fale i le pupula o Ieova.

⁶Ona ou faalogo atu lea, ua tŭlei mai lona siufofoga ia te au ai totonu o le fale; ua tu mai foi le tagata i o‘u tafatafa,

⁷ua ia faapea mai foi ia te au, Le atalii e o le tagata, o le mea e i ai lo‘u nofoālii, ma le mea e tutū ai o‘u alofivae, ou te nofo ai e faatasi ma le fanauga a Isaraelu e faavavau, e le toe faaleagaina foi lo‘u igoa paia e le aiga o Isaraelu, o i latou ma o latou tupu i a latou faitaaga, e le toe leaga foi i tino oti o latou tupu i a latou mea maualuluga,

⁸i o latou tuuina o lo latou faitotoa i tafatafa o o‘u faitotoa, ma la latou pou o le faitotoa i tafatafa o a‘u pou, o le pa foi na va a‘i i latou ma a‘u, ua faaleagaina foi lo‘u igoa paia i a latou mea e inosia ua latou faia; o le mea lea ua ou faaumatia ai i latou i lo‘u ita.

⁹O lenei, ia latou lafoai a latou faitaaga, ma tino oti o latou tupu, ia mamao ia te au, ona ou nofo ai lea faatasi ma i latou e faavavau.

¹⁰O oe na le atalii o le tagata, ia e faaali atu le fale i le aiga o Isaraelu, ina ia latou masiasi i a latou amio leaga; ia latou fuatia foi lena faatusa.

¹¹Afai foi e masiasi i latou ona o mea uma ua latou faia, ina faailoa atu ia ia te i latou le tino o le fale, ma lona faatusa, ma ona ala e ulufafo ai, ma ona ala e ulufale mai ai, ma ona tino mai uma, ma ona sauniga uma, ma ona tino mai uma, ma ana tulafono uma; ia e tusi ai i o latou luma, ina ia latou tausia lona tino mai uma, ma ona sauniga uma, ma latou faia.

¹²O le tulafono lenei o le fale, O le tumutumu o le mauga, o ona tuaoi uma e faataamilomilo ai, e matuā paia lava ia. Faauta, o le tulafono lea o le fale.

¹³O fua nei o le fata faitaulaga i kupita; o le kupita e i ai le kupita ma le alofilima; e tasi le kupita o le taele, o lona lautele foi e tasi le kupita, o le pale foi e siosioina ai ona tafatafa, e tasi le āga; o le mea aupitoaluga lea o le fata faitaulaga.

¹⁴E afua mai i le taele i le eleele, e oo i le tafatafa faasili aupitoalalo, e lua kupita, o lona lautele foi e tasi le kupita; e afua mai foi i le tafatafa faasili aupito itiiti, e oo i le tafatafa faasili aupito tele e fa kupita, o lona lautele foi e tasi le kupita.

¹⁵O le fata faitaulaga foi e fa ona kupita; e fa foi nifo e tutū ae i le fata faitaulaga.

¹⁶O le umi foi o le fata faitaulaga e sefulu ma le lua ona kupita, o lona lautele e sefulu ma le lua, e gatasitasi ona itu e fa.

¹⁷O le tafatafa faasili foi e sefulu ma le fa o kupita lona umi, e sefulu ma le fa lona lautele i ona itu e fa; o lona tafatafa foi e siosioina ai, o le vaeluagalemu lea o le kupita, ma lona taele e tasi le kupita e soo ai; o lona ala faapefai foi e faasaga i sasae.

¹⁸Ua fai mai foi o ia ia te au, Le atalii e o le tagata, o loo faapea ona fetalai mai o le Alii o Ieova, O tulafono ia i le fata faitaulaga i le aso latou te faia ai e sauni ai taulaga i ona luga, e sausau foi toto i ona luga.

¹⁹E te avatu se povi poa taanoa i ositaulaga o sa Levi, o le fanauga a Satoka o e faalatalata mai ia te au e auauna ia te au, e fai ma taulaga mo le agasala, ua fetalai mai ai le Alii o Ieova.

²⁰E te ave foi nisi o lona toto, ma tuu ai i ona nifo e fa, ma tulimanu e fa, o le tafatafa faasili, ma le pale e siosio ai; e te faamamāina ai, ma fai ai se togiola.

²¹E te ave foi le povi poa o le taulaga mo le agasala, e susunu ai i le mea sa tofia i le fale i tua o le mea paia.

²²O le aso lua e te avatu ai se tamai ‘oti e sao ona lelei, e fai ma taulaga mo le agasala; latou le faamamāina foi le fata faitaulaga, e pei ona latou faamamāina i le povi poa.

²³A uma ona faamamāina, e te avatu se povi poa taanoa e sao ona lelei, ma se mamoe poa o le lafu e sao ona lelei.

²⁴E te avatu ai i luma o Ieova, e luluina i ai foi e ositaulaga se masima, ma latou avatu ai e fai ma taulaga mu ia Ieova.

²⁵E fitu aso e te sauni ai se ‘oti taitasi i aso e fai ma taulaga mo le agasala; latou te saunia foi se povi poa taanoa, ma se mamoe poa o le lafu e sao ona lelei.

²⁶E fitu aso latou te fai ai le togiola mo le fata faitaulaga, ma faamamā i ai; e fai foi le tofia o i latou.

²⁷A mavae ia ona aso, ona faia lea e ositaulaga a outou taulaga mu ma outou taulaga faafetai i luga o le fata faitaulaga, e afua i le aso valu e oo i aso e lumanai; ona ou talia lea o outou, ua fetalai mai ai le Alii o Ieova.