Read Samoan Old Version Bible – O LE TUSI PAIA ESEKIELU, 46 Bible Online

ESEKIELU, 46 - Samoan Old Version Bible – O LE TUSI PAIA bible

ESEKIELU, 46

¹Ua faapea ona fetalai mai o le Alii o Ieova, O le puipui o le lotoā tuloto le ua faasaga i sasae, e punitia ia i aso e ono e fai ai galuega; a o le sapati e avanoa ai, atoa ma le aso o le masina faatoa vaaia e avanoa ai.

²E ulufale le alii sili i le ala o le faapaologa o le puipui i fafo, ma tu i le pou o le faitotoa, e sauni foi e ositaulaga lana taulaga mu, ma ana taulaga faafetai, e tapuai foi o ia i tala ane o le faitotoa, ona alu lea o ia; a e le punitia le faitotoa seia oo i le afiafi.

³E tapuai foi tagata o le nuu i lenei faitotoa i luma o Ieova i sapati ma masina faatoa vaaia.

⁴O le taualaga mu e avatua e le alii sili ia Ieova i le aso sapati, e ono tamai mamoe ia e sao ona lelei, ma se mamoe poa e sao ona lelei.

⁵O le taulaga i mea e ‘ai, o le efa lea i le mamoe poa, o le taulaga i mea e ‘ai i tamai mamoe e faatatau i mea ua ia te ia, o le sinu o suāuu foi i le efa.

⁶O le aso foi o le masina faatoa vaaia e avatu ai le povi poa taanoa e sao ona lelei, ma tamai mamoe e ono, ma se mamoe poa; e sao ona lelei i latou.

⁷Na te saunia foi le taulauga i mea e ‘ai, o le efa e tasi i le povi poa, ma le efa foi i le mamoe poa; a e avane i tamai mamoe e faatatau i mea ua na maua, o le sinu o suāuu foi i le efa.

⁸A ulufale le alii sili, na te ui ane i le ala o le faapaologa o lena puipui, na te ulufafo ai foi i lena lava ala.

⁹A o ane tagata o le nuu i luma o Ieova i tausamiga, o lē ulufale i le ala o le faitotoa i le itu i matu e tapuai, e ulufafo ia i le ala o le faitotoa i le itu i toga; o lē ulufale foi i le faitotoa i le itu i toga, e ulufafo ia i le ala o le faitotoa i le itu i matu; na te le ulufafo i le ala o le faitoa na ia ulufale ai, a e ulufafo o ia i le mea e feagai ai.

¹⁰A o le alii sili, a latou ulufale, e ulufale o ia faatasi ma i latou; a latou ulufafo, e ulufafo foi o ia.

¹¹O tausamiga ma faapotopotoga e fai ai le taulaga i mea e ‘ai, o le efa lea i le povi poa, o le efa foi i le mamoe poa, a o tamai mamoe e faatatau i mea ua ia te ia, o le sinu foi o suāuu i le efa.

¹²A sauni foi le alii sili se taulaga mu e manatu fua o ia ona fai, po o taulaga faafetai na te manatu fua ona fai ia Ieova, e faaavanoaina mo ia le faitotoa e faasaga i sasae, na te saunia foi lana taulaga mu, ma aua taulaga faafetai e pei ona fai i le aso sapati; ona ulufafo ai lea o ia; ona punitia lea o le faitotoa ina ua ulufafo atu o ia.

¹³E te sauni foi i aso uma le taulaga mu ia Ieova, o le tamai mamoe e tasi lona tausaga e sao ona lelei, e te sauni ai i lea taeao ma lea taeao.

¹⁴E te sauni ai foi se taulaga i mea e ‘ai i lea taeao ma lea taeao, o lona vaega e ono o le efa, o lona vaega foi e tolu o le sinu o suāuu e palu a‘i le falaoa lelei; o le taulaga i mea e ‘ai e le aunoa, o le sauniga ia Ieova e faavavau.

¹⁵Latou te saunia lava le tamai mamoe, ma le taulaga i mea e ‘ai, ma le suāuu i lea taeao ma lea taeao, o le taulaga mu e le aunoa.

¹⁶Ua faapea ona fetalai mai o le Alii o Ieova, A avatu e le alii sili se mea alofa i se tasi o ona atalii e fai lea ma tofi o ona atalii; e fai lea mo i latou ona o le tofiga.

¹⁷A e afai na te avatu se mea alofa ai lona tofi i se tasi o ana auauna, e fai lea mona seia oo i le tausaga e sa‘oloto ai, ona toe iu ane lea i le alii sili; a o lona tofi e fai lea mona atalii, o i latou lava.

¹⁸E le avea foi e le alii sili se mea ai le tofi o le nuu, e tuli ese ai i latou i lo latou tofi; a e na te avane tofi o ona atalii ai ana lava mea ua maua; ina ia le faataapeapeina ai lo‘u nuu i o latou tofi.

¹⁹Ona ia au mai lea ia te au i le ala o i le tafatafa o le faitotoa i potu paia o le au ositaulaga e faasaga i le itu i matu; faauta foi, o i ai le tasi mea i itu e lua i sisifo.

²⁰Ona fai mai lea o ia ia te au, O le mea lenei e tunu ai e ositaulaga le taulaga mo le sese, ma le taulaga mo le agasala, latou te tao ai foi le taulaga i mea e ‘ai; ina ia latou le avatu ai i le lotoā aupito i tua e faapaiaina ai le nuu.

²¹Ona ia aumaia lea o a‘u i le lotoā aupito i tua, ua ia ta‘ita‘i foi ia te au i pito lotoā e fa; faauta foi, ua taitasi le pito lotoā ma se lotoā.

²²O pito e fa o le lotoā, sa i ai lotoā ua sosoo ai, e fagafulu o kupita lona umi, e tolugafulu o kupita lona lautele; o ia pito e fa e tasi lo latou fua.

²³Na i ai foi le aupa ua soo ai, ua soo ai lava ia lotoā e fa, na fai foi mea e tunu ai mea i lalo ifo o aupa ua soo ai.

²⁴Ona fai mai lea o ia ia te au, O mea ia a latou o e tutunu mea, e tutunu ai taulaga a le nuu e i latou o e auauna i le fale.