Read Samoan Old Version Bible – O LE TUSI PAIA ESEKIELU, 47 Bible Online

ESEKIELU, 47 - Samoan Old Version Bible – O LE TUSI PAIA bible

ESEKIELU, 47

¹Ona toe faafoi lea o ia ia te au i le faitotoa o le fale; faauta foi, ua alu ae le vai i lalo o le faitotoa o le fale i sasae; auā na faasaga ona lumā fale i sasae, na alu ifo foi le vai na i lalo, mai le itu taumatau o le fale i le itu i toga o le fata faitaulaga.

²Ona ia aveina atu lea o a‘u i le ala o le faitotoa i le itu i matu, na ia ta‘ita‘i faataamilo ia te au i le ala i tua i le faitotoa aupito i tua i le ala e faasaga i sasae; faauta foi, ua tafe atu ai le vai i le itu taumatau.

³Ua alu ane i le itu i sasae le tagata sa i lona lima le manoa, ona ia fuatia lea o kupita e afe, ona ia ta‘ita‘iina lea o a‘u i le tasi itu o le vai; ua gata le vai i tapuvae.

⁴Ua ia toe fuatia se afe o kupita, ona ia ta‘ita‘iina lea o a‘u i le tasi itu o le vai; ua gata le vai i tulivae. Ua ia toe fuatia se afe o kupita, ua ia ta‘ita‘iina foi o a‘u i le tasi itu; ua gata le vai i le sulugatiti.

⁵Ua ia toe fuatia se afe o kupita; ua avea ma vaitafe ou te le toe mafai ona asa; auā ua loloto le vai, o le vai e aau ai, o le vaitafe e le mafai ona asa.

⁶Ua ia fai mai foi ia te au, Le atalii e o le tagata, ua e iloa ea? Ona ia ta‘ita‘iina lea o a‘u, ma faafoi mai ia te au i le auvai o le vaitafe.

⁷Ua ou toe foi, faauta, o laau e tele lava i le auvai o le vaitafe, o i le tasi itu, ma le isi itu.

⁸Ona fai mai lea o ia ia te au, E tafe atu ia vai i le itu i sasae, ma tafe ifo i le laueleele mafolafola, ma oo i le sami; a oo atu i le sami, ona faamagaloina ai lea o le suāsami.

⁹O mea ola uma foi, e fetolofi i mea uma e oo i ai le vaitafe, e ola ia; e matuā tele foi i‘a; auā e oo i ai ia vai, ma faamagaloina ai; e ola ai foi mea uma e oo atu i ai le vaitafe.

¹⁰E tutū ai foi ē fai faiva, e pau mai i Enokati e oo i Enokelima; e fai ma mea e fofola ai upega; o ona i‘a foi e uiga eseese, e pei o i‘a o le sami tele, e matuā tele lava.

¹¹A o ana mea e palapalā ma ona fusi e le toe faamagaloina; a e tuuina atu i le masima.

¹²O le auvai o le vaitafe i lea itu ma lea itu, e tutupu ai laau uma e ‘aina, e le mamae o latou lau, e le uma lava o latou fua; taitasi le masina ma lona fuata, auā e tafe atu o latou vai ai le malumalu; e fai foi o latou fua ma mea e ‘ai, ma o latou lau e fai ma vailaau.

¹³Ua faapea ona fetalai mai o le Alii o Ieova, O le tuaoi lenei tou te totofi ai mo outou le laueleele, e faatatau i itu aiga e sefulu ma le lua o Isaraelu; e lua tofi mo Iosefa.

¹⁴Tou te fai tofi ai, o le tasi e tusa ma le tasi, o le mea na ou sii ai lo‘u lima ou te foai atu ai i o outou tamā; e maua foi e outou lenei laueleele e fai mo outou tofi.

¹⁵O le tuaoi foi lenei o le laueleele i le itu i matu, e amata mai i le sami tele i le ala o Hetelona, i le mea e ui atu ai i Setata;

¹⁶o Amato, o Perota, o Seperimo, o loo i le va o le tuaoi o Tamaseko ma le tuaoi o Amato, o Hasaratikona, o loo i le tuaoi o Haurana.

¹⁷O lona tuaoi, e pau mai i le sami o Hasarenana le tuaoi o Tamaseko, mai le itu i matu e faasaga i le itu i matu, ma le tuaoi o Amato.

¹⁸O le itu i matu lea. O le itu i sasae foi tou te fuatia, e amata mai i Haurana, ma Tamaseko, ma Kiliata, ma le laueleele o Isaraelu i Ioritana, e pau mai i le tuaoi i le sami i sasae. O le itu i sasae lea.

¹⁹O le itu i toga e faasaga i le itu i toga, e pau mai i Tamara, e pau mai i le vai o Meripa i Katesa i le alia e oo i le sami tele. O le itu lea i le itu i toga.

²⁰O le itu i sisifo, o le sami tele lea, e pau mai i le tuaoi e oo i le mea e feagai ma le ala e ui atu ai i Amato. O le itu i sisifo lea.

²¹Tou te vaevaeina lena laueleele ia te outou, e faatatau i itu aiga o Isaraelu.

²²Tou te vaevaeina ai i le vili e fai ma tofi mo outou, atoa ma tagata ese o e āumau ia te outou, o e fanaua tama i lo outou nuu; e avea foi i latou ia te outou e tusa ma tama a le eleele i le fanauga a Isaraelu, latou te fai tofi faatasi ma itu aiga o Isaraelu.

²³O le itu aiga e āumau ai le tagata ese, tou te avatu ai ia te ia lona tofi, o loo fetalai mai ai le Alii o Ieova.