Read Samoan Old Version Bible – O LE TUSI PAIA ESEKIELU, 9 Bible Online

ESEKIELU, 9 - Samoan Old Version Bible – O LE TUSI PAIA bible

ESEKIELU, 9

¹Ua ia valaau mai foi ma le leo tele, o loo ou faalogo atu, ua faapea mai, Ia faalatalata mai o e taui atu i le aai, ia taitasi ma lana mea e fasi a‘i i lona lima.

²Faauta foi, ua o mai tagata e toaono i le ala o le faitotoa aupitoaluga e fesagai ma le itu i matu, taitasi ma lana mea e ta a‘i i lona lima; a o le tasi tagata o i latou ua ofu i le ie lino, ua tau i lona itu le fagu vaitusi a le tusiupu, ua latou ulufale atu, ona latou tutū lea e lata ane i le fata ‘apa memea.

³Ona alu ae lea o le pupula o le Atua o Isaraelu nai luga o le kerupi sa i ai i ona luga, ua oo i le faitotoa o le fale. Na ia valaau i le tagata ua ofu i le ie lino, o le ua tau i lona itu le fagu vaitusi a le tusiupu.

⁴Ona fetalai mai lea o Ieova ia te ia, Ina ui ane ia i totonu o le aai, i totonu lava o Ierusalema, ma e faailogaina muaulu o tagata o e mapuitiga, ma feoi ona o mea inosia uma ua latou fai i ai.

⁵Ua ia fai atu foi ia i latou na, o loo ou faalogo atu, Ui ane ia outou i le aai, ia mulimuli atu ia te ia, ma ia outou fafasi; aua tou te faasaoina, aua le faapelepeleina.

⁶Ia outou matuā fasiotia lava toeaina, ma taulelea, ma taupou, ma tama iti, atoa ma fafine; a e aua le faalatalata i se tagata ua i ai le faailoga; ia amata foi i lo‘u malumalu. Ona latou amata lea i tagata o toeaina lava o e na i luma o le fale.

⁷Ua ia fai atu foi ia te i latou, Ina outou faaleaga ia le fale, ma faatutumuina lotoā i e ua fāsia; ina o atu ia outou. Ona latou o atu ai lea, ua latou fafasi i le aai.

⁸O loo latou o fafasi, ua tuua a‘u, ona ou faapaū fao ai lea, ma ou alaga atu, ua faapea atu, Aue, le Alii e Ieova! e te faaumatia ea e ua totoe uma ia Isaraelu ina o e sasaaina o lou toasa i luga o Ierusalema?

⁹Ona fetalai mai ai lea o ia ia te au, Ua matuā silisili lava le amio leaga a le aiga o Isaraelu atoa ma Iuta, ua tumu le nuu i le toto, ua tumu le aai i le amio faapiopio; auā ua faapea i latou, Ua lafoai e Ieova le lalolagi; ua le silafia lava e Ieova.

¹⁰O a‘u nei foi, ou te le faasaoina, ou te le faapelepeleina; ou te taui atu a latou amio i luga i o latou ulu.

¹¹Faauta foi, o le tagata ua ofu i le ie lino, o le ua tau le fagu vaitusi i lona itu, ua fai mai o ia, ua faapea, Ua ou faia e pei ona e fetalai mai ai ia te au.