Read Samoan Old Version Bible – O LE TUSI PAIA TANIELU, 1 Bible Online

TANIELU, 1 - Samoan Old Version Bible – O LE TUSI PAIA bible

TANIELU, 1

¹O LE tausaga e tolu o le nofoaiga a Ioakima le tupu o Iuta na sau ai Nepukanesa le tupu o Papelonia i Ierusalema ma na vagaia.

²Ona tuuina atu lea e le Alii i lana pule o Ioakima le tupu o Iuta, faatasi ma nisi ipu o le fale o le Atua, na ia ave foi ia mea i le nuu o Senara i le fale o lona atua; ua na ave foi ipu i le fale oloa o lona atua.

³Ona fai atu lea o le tupu ia Asepenasa, le alii e pule i ana eunuka, na te au mai nisi o le fanauga a Isaraelu, o le fanau lava a le tupu, atoa foi ma nisi alii;

⁴o tama e le ponā lava, a ua aulelei, o e ua atamamai lava, ma ua iloa mea uma, o e ua popoto lava, ma ua tatau ona latou tutū i le maota o le tupu, ia a‘oa‘oina foi i latou i tusi ma le gagana a Kaletaia.

⁵Ua poloai foi le tupu ia latou aai i lea aso ma lea aso i mea taumafa a le tupu, atoa ma le uaina e inu ai o ia, ia tausia i latou i tausaga e tolu; a mavae ia, ona latou tutū ai lea i luma o le tupu.

⁶Sa ia i latou nisi o le fanauga a Iuta, o Tanielu, o Hanania, o Mesaelu, atoa ma Asaria.

⁷Ua faaigoa foi ia te i latou e le alii e pule i eunuka; ua na faaigoa ia Tanielu o Peletisara, a o Hanania o Sataraka lea, o Mesaelu foi o Mesako lea, o Asaria foi o Apeteniko lea.

⁸A ua manatu Tanielu, o le a le leaga o ia i mea taumafa a le tupu, po o le uaina e inu ai o ia; ona aioi atu ai lea o ia i le alii e pule i eunuka ina ia le leaga ai o ia.

⁹Na faatupuina e le Atua le alofa mutimutivale o le alii e pule i eunuka ia Tanielu.

¹⁰Ona faapea atu lea o le alii e pule i eunuka ia Tanielu, Ou te fefe a‘u i lo‘u alii le tupu, na ia pule i a outou mea e ‘ai, ma a outou mea e inu; e iloa i se a e ia o outou mata ua fole, ua le pei o tama ua outou tupulaga? o le a alataia ai ona vaea o lo‘u ulu e le tupu ona o outou.

¹¹Ona faapea atu lea o Tanielu ia Melesara, o le na tofia e le alii e pule i eunuka e pule ia Tanielu, ma Hanania, ma Mesaelu, ma Asaria;

¹²ia e tofotofo i au nei auauna i po e sefulu, ia latou au mai ai ia te i matou ni fua o laau e aai ai, ma vai e inu ai.

¹³Ona e silasila lea i o matou mata, ma mata o tama o e aai i mea taumafa a le tupu, ona e faia lea i au auauna e tusa ma lau silafaga.

¹⁴Ona usiusitai lea o ia ia te i latou i lena mea, na ia tofotofo foi ia te i latou i po e sefulu.

¹⁵Ua mavae po e sefulu, ona iloa lea ua sili ona lalelei o latou mata mona tino lelei i tama uma e na aai i mea taumafa a le tupu.

¹⁶Ona aveeseina ai lea e Melesara a latou mea taumafa mai le tupu, atoa ma le uaina na fai a inu ai i latou, ua avatu fua o laau mā latou.

¹⁷A o ia tama e toafa ua foaiina e le Atua ia te i latou le faautauta ma le atamai i tusi uma lava, atoa ma le poto; a o Tanielu ua poto ia i faaaliga uma lava ma miti.

¹⁸Ua mavae foi aso na fai atu ai le tupu e au mai ai i latou, ona au mai ai lea o i latou e le alii e pule i eunuka i luma o Nepukanesa.

¹⁹Ona tautalatala ai lea o le tupu ma i latou; a ua le maua se tasi o i latou e tusa ma Tanielu, ma Hanania, ma Mesaelu, ma Asaria; ona latou tutū ai lea i luma o le tupu.

²⁰O mea uma lava e oo ai le poto ma le faautauta na fesili atu ai le tupu ia te i latou, ua iloa ai e ia ua sāutuasefulu ona sili o lo latou poto i taulāitu, ma vaafaatau uma i lona malo uma lava.

²¹Sa i ai Tanielu ua oo i le tausaga muamua o Kuresa le tupu.