Read Samoan Old Version Bible – O LE TUSI PAIA TANIELU, 10 Bible Online

TANIELU, 10 - Samoan Old Version Bible – O LE TUSI PAIA bible

TANIELU, 10

¹O le tolu o tausaga o Kuresa le tupu o Peresia sa faaali mai ai le tasi mea ia Tanielu, o le ua igoa ia Peletisara; e moni le upu, a e tele taua; na ia iloa foi le mea, ma na iloa le faaaliga.

²O ona po ia, o a‘u o Tanielu sa ou faanoanoa ai i vaiasosa atoatoa e tolu;

³e leai se mea lelei na a‘u ‘ai ai, e leai foi se aano o manu, po o se uaina na oo i lo‘u gutu, na ou le uu ai lava, ua oo ina mavae atu vaiasosa e tolu.

⁴O le aso e luafulu ma le fa o le masina muamua, sa a‘u i ai i le auvai o le vaitafe tele, o Hitekelu lea.

⁵Ona a‘u tepa ae lea ma ou vaai, faauta foi, o le tasi tagata ua ofu i le ie lino, ma ua fusi lona sulugatiti i le auro lelei o Upasa.

⁶O lona tino foi ua pei o le tasesa lea, ma ona fofoga ua tino mai pei o le uila, ma ona mata ua pei o lamepa mumū ia, o ona lima foi ma ona vae ua pei o ‘apa memea ua faapupulaina, o le siufofoga o lana fetalaiga ua pei o le taalili o le vao tagata e toatele.

⁷A ua na o a‘u lava o Tanielu na iloa le faaaliga; auā o tagata sa matou i ai na le iloa e i latou le faaaliga, a ua ootia i latou i le tetemu tele lava, na latou sosola foi ia lalafi ai i latou.

⁸Ua tuua toatasi lava na o a‘u, ona a‘u iloa lea o lena mea tele na faaalia mai, ona leai lea o se toe malosi ia te au; ua mavae lo‘u matagofie, ua ou pulavale, ua leai lava se malosi ua toe ia te au.

⁹A ua ou lagona le siufofoga o lana afioga; ua ou lagona le siufofoga o lana afioga, ona ou moegase ai lea o a‘u ua faō, ua faō lava i le eleele.

¹⁰Faauta foi, ua pai mai ia te au le lima, ma faatootuli ia te au i o‘u tulivae ma o‘u alofilima.

¹¹Ona ia faapea mai lea ia te au, Tanielu e, o le tagata ua alofateleina, ia e mafaufau i upu ou te fai atu ai ia te oe, ma ia e tu i luga; auā ua auina mai nei a‘u ia te oe. Ua uma ona fetalaia mai ia te au o nei upu, ona ou tu ai lea, ua ou gatete.

¹²Ona faapea mai ai lea o ia ia te au, Tanielu e, aua le fefe; auā talu le luai aso na e sauni ai lou loto e mafaufau ma faatigaina oe e oe i luma o lou Atua, sa faafofogaina au upu, ua a‘u sau foi ona o au upu.

¹³A o le alii o le malo o Peresia na ia tetee ia te au i po e luafulu ma le tasi; faauta foi, o Mekaeli o so le au alii sili ia, na ia maliu mai e fesoasoani mai ia te au; na tuua foi a‘u i lea mea faatasi ma tupu o Peresia.

¹⁴O lenei, ua a‘u sau e faailoa atu ia te oe mea e tutupu i lou nuu i ona po amuli; auā e tuai ona po o le faaaliga.

¹⁵Ua ia fetalai mai na upu ia te au, ona ou faasaga lea o‘u mata i le eleele, ua ou le magagana.

¹⁶Faauta foi, o le tasi e pei se tagata ua pai mai i o‘u laugutu; ona ou tautala atu lea, ua faapea atu i le ua tu mai i o‘u luma, Le alii e, ua a‘u puapuagatia ona o le faaaliga, ua leai, se malosi ua toe ia te au.

¹⁷Ua mafai faapefea le auauna a lo‘u nei alii ona tautala ma lo‘u nei alii? auā o a‘u ua leai lava so‘u malosi, ua leai foi se mānava ua toe ia te au.

¹⁸Ona toe pai mai lea ia te au o le tasi ua tino mai pei se tagata, ua ia faamalosi mai ia te au.

¹⁹Ua faapea mai o ia, O oe o le tagata ua alofateleina, aua e te fefe, ia e manuia, ia e faamalosi, ia e faamalosi lava. Ua mavae mai lana fetalaiga ia te au, ona ou malosi ai lea, ma a‘u faapea atu, Ina fetalai mai ia lo‘u alii; auā ua e faamalosi mai ia te au.

²⁰Ona faapea mai ai lea o ia, Ua e iloa ea le mea ua a‘u sau ai ia te oe? o lenei, o le a a‘u toe foi e tau ma le alii o Peresia; faauta foi, a a‘u alu atu, ona sau ai lea o le alii o Iavana.

²¹A e peitai ou te faaali atu ia te oe le mea ua tusia i le Tusi e faamaoni; ua leai foi se tasi e fesoasoani mai ia te au i na mea, ua na o Mekaeli lo outou alii.