Read Samoan Old Version Bible – O LE TUSI PAIA TANIELU, 11 Bible Online

TANIELU, 11 - Samoan Old Version Bible – O LE TUSI PAIA bible

TANIELU, 11

¹O a‘u foi, na a‘u tu atu i le tausaga muamua o Tariu le Metai, e fesoasoani ma faamalosi ia te ia.

²O lenei foi, ou te faaali atu ia te oa le upu moni. Faauta, e toe tutū mai tupu o Peresia e toatolu, a o lona toafa e sili lava ia ona mauoa ia te i latou uma; o lona malosi foi, e maua i lona oloa, na te lagaina mai ai i latou uma e tau ma le malo o Iavana.

³E tulai foi le tupu lima malosi, e pule lava ia i malo e tele, ma fai mea na te loto i ai.

⁴A oo ina tulai o ia, ona lepetia lea o lona malo, ma vaevaeina i matagi e fa o le lagi, a e le fai ma ana fanau, e le tusa foi ma lana pule e pule ai o ia; auā e liaiina lona malo, e fai foi mo nisi a e le o i latou.

⁵E malosi foi le tupu o le itu i toga, ma le tasi alii e ia te ia; e sili foi lona malosi i lona, e pule foi ia; o lana pule, o le pule tele lea.

⁶A oo i le tuluiga o tausaga, la te sosoo faatasi; auā o le afafine o le tupu o le itu i toga e sau o ia i le tupu o le itu i matu e fai ai se leleiga; a e le tumau ia te ia le lima malosi, e le tumau foi o ia, po o lona malosi; a e tuuina atu o ia, atoa ma i latou e molia o ia, ma lē fanaua e ia, atoa ma le na te faamalosia o ia i ia ona po.

⁷A o le tātupu o ona aa e tu mai ai se tasi i lana nofoaiga, e sau foi o ia ma ‘au, ma alu atu i le ‘olo o le tupu o le itu i matu, e fai lona loto ia te i latou ma manumalo ai.

⁸Na te avea foi faatagataotaua i Aikupito o latou atua, ma o latou alii, atoa ma o latou ipu manaomia o ario ma auro; e tumau foi o ia i tausaga e sili i tausaga o le tupu o le itu i matu.

⁹E alu atu foi o ia i le malo o le tupu o le itu i toga, ma toe foi i lona lava nuu.

¹⁰A o ona atalii la te laga mai, ma la faapotopoto le vao ‘au e tele; ona matuā sau ai lea o le tasi, e lofia ai e ia le nuu ma ui ane ai; ona toe laga mai lea o ia e oo i lona ‘olo.

¹¹E matuā ita foi le tupu o le itu i toga, ona alu atu lea o ia la te tau ma le tupu o le itu i matu; na te aveina atu ‘au e tele lava; a e tuuina atu i lana pule le vao ‘au e tele.

¹²A aveesea foi ia ‘au e tele ona faamaualugaina ai lea o lona loto; e manomano foi o e lafotuina e ia, a e le malosi ai o ia.

¹³Auā e toe foi mai le tupu o le itu i matu, na te aveina atu ‘au e sili ona tele i e na muamua; a mavae isi tausaga e sau ai lava o ia ma ‘au e tele, atoa ma le oloa tele.

¹⁴O ia ona po foi e toatele latou te tutū atu e tetee atu i le tupu o le itu i toga; e faamaualuga foi tagata e i lou nuu, latou te faataunuu ai le faaaliga, a e pauu i latou.

¹⁵Ona sau ai lea o le tupu o le itu i matu, e tanu e ia se mea maupuepue, na te aea aai nofo‘olo; o ‘au foi a le itu i toga, atoa ma ona tagata ua filifilia latou te le tetee atu, e leai lava se malosi e tetee atu ai.

¹⁶O lē atu ia te ia na te faia mea ua ia loto i ai, e leai foi se tasi e tu i ona luma; e tu lava ia i le nuu matagofie, e faaumaina foi i lona lima.

¹⁷E faasaga foi o ia ina ia alu atu ma le ‘au tau o lona malo uma, e faatasi foi ma ia e amiotonu, ma na faia lava; na te avatu foi ia te ia le teine muli ina ia leaga ai le loto o le teine; a e le tumau ai o ia, e le ‘au faatasi foi ma ia.

¹⁸Ona faasaga lea o ia i nuu tu tai, ma na faoa nuu e tele; a o le tasi alii na te faaiuina e ia lona gao; na te faaliliu atu foi ia te ia lea mea, a e le gaogaoina ai o ia.

¹⁹Ona toe faasaga lea o ia i le ‘olo o lona nuu; a e tausuai o ia ma paū, e le toe iloa foi o ia.

²⁰A e tu mai se tasi i lana nofoaiga, o le na te faaui ane le faau taulaga i le nuu matagofie o lona malo; a e mavae nai aso ona fano ai lea o ia, a e le o se ita po o se taua.

²¹Ona tu mai lea i lana nofoaiga o le e inosia, latou te le tuuina atu ia te ia le mamalu o le malo; a e sau faafifilemu ia, o faaoleolega foi na te maua mai ai le malo.

²²O ‘au foi a e lolofi mai e lofia ai i latou mai ona luma, e faaumatia ai i latou, atoa ma le alii o le feagaiga.

²³A uma foi ona sosoo ma ia, e fai mea pepelo lava ia; auā e alu ae lava ia, o se nuu itiiti foi e malosi ai o ia.

²⁴E alu atu o ia ma le fifilemu i mea e sili ona lelei o le itu malo; na te faia foi mea na le faia e ona tamā, po o tamā o ona tamā; na te tufatufaina ia te i latou o mea faoa, ma vete, atoa ma oloa, na te taumafaufau i lona loto e aea ai ‘olo, seia oo i se aso.

²⁵E faamalosi atu foi o ia ma lona loto atoa e tau ma le tupu o le itu i toga, ma le itu taua e toatele; o le tupu foi o le itu i toga e laga mai o ia i le taua, ma le itu taua tele ma le malosi tele lava; a e le tumau o ia, auā latou te taupulepule ia te ia.

²⁶O e aai i ana mea taumafa, e fano ai o ia, e lolofi mai foi ana ‘au; e toatele foi e fasiotia.

²⁷E finagalo ia tupu e lua e fai mea leaga, la te tala pepelo i le laoai e tasi; a e le manuia ai, auā e oo lava le iuga i ona po ua atofaina ai.

²⁸Ona toe foi ai lea o ia i lona nuu ma le oloa tele; e ita foi o ia i le feagaiga paia; na te faia foi lona loto, ona toe foi lea o ia i lona nuu.

²⁹O ona po ua tuupoina e toe foi mai ai o ia, ma alu atu i le itu i toga; a e le iu faapei o le na muamua, po o lē mulimuli.

³⁰Auā e alu atu le fua Kitimo e tetee atu ia te ia; e tigaina ai lona loto, ona toe foi mai ai lea, o ita atu foi o ia i le feagaiga paia; na te faapea lava ona fai, na te toe foi mai ma faasaga lona manatu i e ua lafoai le feagaiga paia.

³¹O ‘au foi latou te ‘au ma ia, latou te faaleagaina le malumalu e malu ai, latou te aveeseina foi le taulaga fai soo, ma tuuina ai le mea inosia e faatafunaina ai.

³²O e agasala i le feagaiga e leaga i latou ia te ia i faaoleolega; a o le nuu o e ua iloa lo latou Atua latou te faamalolosi ma fai mea tetele.

³³O e ua popoto i le nuu latou te a‘oa‘oina atu i tagata e toatele; a o aso e tele e pauu ai i latou i le pelu ma le afi, ma le tafeaga, ma le veteina.

³⁴A pauu foi i latou, latou te maua se fesoasoani, o se fesoasoani itiiti; a e toetele e pipii atu ia te i latou ma faaoleolega.

³⁵E pauu foi nisi o e popoto, e tofotofoina ai i latou, ma faamamāina ai, ma faasinasinaina ai, seia oo i ona po o le iuga; auā e lei oo i ona po ua tuupoina.

³⁶O le tupu foi na te faia e tusa ma lona loto, ma faamaualuga o ia e ia, ma faasili ia te ia i atua uma; na te faia upu faasausili i le Atua o atua, e manuia foi o ia seia atoatoa le toasa; auā e faia lava le mea ua tuu i ai le pule.

³⁷Na te le manatu i le Atua o ona tamā, na te le manatu i le manao i fafine, na te le manatu foi i se tasi atua; auā e faasilisili o ia e ia i mea uma.

³⁸E ava o ia i le atua o ‘olo i le mea e nofo ai o ia; o le atua foi sa le iloa e ona tamā na te ava i ai, ma avatu i ai auro, ma ario, ma maa tāua, atoa ma mea matagofie.

³⁹E faia lava lea e ia i ‘olo e sili ona malolosi, i le atua ese, o le e manatua e ia ma faasilisili ona ava i ai; na te tuuina atu foi ia te i latou le pule i tagata e toatele, na te vaevaeina foi le laueleele e maua ai le taui.

⁴⁰A oo i ona po o le iuga, ona sii atu lea ia te ia o le taua e le tupu o le itu i toga; e pei se afā ona oso atu ia te ia o le tupu o le itu i matu ma kariota, ma e o tietie i solofanua, atoa ma vaa e tele; na te oo atu foi i nuu, ma lolofi i ai, ma ui ane ai.

⁴¹E oo atu foi o ia i le nuu matagofie, e faaumatia foi nuu e tele; a e sao nai lona lima o nuu ia, o Etoma, ma Moapi, atoa ma e ua sili i le fanauga a Amoni.

⁴²Na te faaoo atu lona lima i nuu, e le sao foi le nuu o Aikupito.

⁴³A e pule o ia oloa, o auro, ma ario atoa ma mea matagofie uma o Aikupito; e mulimuli atu foi ia te ia o Lipua ma Aitiope.

⁴⁴A o tala mai sasae, ma le itu i matu e atuatuvale ai o ia; ona alu atu ai lea o ia ma le ita tele ia faaumatia ma fasiotia tagata e toatele.

⁴⁵Na te faatuina fale ie o lona maota i le va o sami, i le mauga matagofie ma le paia; a e oo atu i lona iuga, e leai foi se tasi e fesoasoani ia te ia.